KOMMUNE ERNUMASOQ
Qarasaasiakkut ataqatigiissumik aaqqissuussineq nutaaq 19-eriarluni kinguartinneqarpoq
Qarasaasiakkut ataqatigiissumik aaqqissuussineq nutaaq kommunit suliffissarsiortunut ikiorsiissutinik pisortallu ikiorsiissutaannik inatsisit nutaat naapertorlugit sullissinerminni iluaqutigisassaat suli atuutilersinneqanngilaq, tamannalu illoqarfiit pingaarnersaata kommunianut ilungersunartorsiortitsivoq.
Qarasaasiakkut ataqatigiissumik aaqqissuussineq nutaaq, kommunit suliffissarsiortunut ikiorsiissutinik aamma pisortat ikiorsiissutaannik tunniussisarneranni iluaqutaasussaavoq, taannali suli piareerneqanngilaq.
Assi: Leiff Josefsen
Namminersorlutik Oqartussat inatsisiliaasa nutaat suliarineqartarneranni IT-mik atortorissaarutit atorneqartussat atulersinneqarnissaat kinguaattoorfiuvoq. Kinguaattoornerit Kommuneqarfik Sermersuumut ajornartorsiortitsipput, inatsisimmi nutaat naapertorlugit allaffissornikkut ingerlatsineq aningaasarpassuarnik atuiffiusarmat.
Suliami pineqarput suliffissarsiortutut ikiorsiissutinut pisortanillu ikiorsiissutinut malittarisassat nutaat, ukiumik ataatsimik kingusinaarlutik 2024-p aallartinnerani atuutilersinneqartut.
Atuutilernissaa oqartussanit kinguartinneqarpoq, tassami qarasaasiakkut periaaserineqartussaq suli piareerneqarsimanngimmat. 2023-mi decembarimi illoqarfiit pingaarnersaata kommuniata Namminersorlutik Oqartussat ernummateqarnerminik allaffigai, tamatumani kommunimit allaffissornikkut qarasaasiakkut periaaserineqartussaq pisariaqartinneqartoq piareerneqarsimanngippat, malittarisassat atuutilernissaat mianersoqqussutigineqarluni.
Mianersoqqussulli tusaanngitsuusaarneqarpoq malittarisassallu atuutsinneqalerlutik, qarasaasiakkulli periaaserineqartussaq suli atorsinnaanani.
Kinguaattoornerit ataavartumik nalunaarutigineqartartut
Sapaatip akunnerata tulliani ataatsimiinnissami illoqarfiit pingaarnersaanni kommunimi ingerlatsivimmit qinikkanut paasissutissiissutigineqassaaq, qarasaasiakkut periaaserineqartussap atuutilersinneqarnissaa, ukiortaap kingorna 19-eriarluni kinguartinneqartarsimasoq:
- Inatsisit atuutilerneranniilli Inussuk-IT-p (Nunatsinni pisortat ataatsimoortumik qarasaasiaqarnikkut ingerlatsiviat) minnerpaamik 19-eriarluni qarasaasiap atuutilernissaa kinguartinneqartoq nalunaarutigisarpaa. Kinguaattoornernik nalunaarutiginninnerni qarasaasiaq atorneqartussaq ullut 14-it qaammatilluunniit ataatsip ingerlanerani piareersimassasoq ilimagineqartaraluarpoq. Taamaattumik kommunimi sulisut aqutsisullu naatsorsuutigisaraluarpaat aaqqiissutissaq atorneqarsinnaasoq qanittuararsuussasoq, kommunimi ingerlatsivik suliamik saqqummiussinermini taama allappoq.
Qarasaasiakkut ajornartorsiuteqarneq pissutigalugu, innuttaasut ilaat pisassaminnit ikinnerusunik tunineqartarput – allalli pisassaminnit amerlanerusunik tunineqartarlutik, ingerlatsivik ajornartorsiut pillugu taama allappoq:
- Tamanna pissutigalugu innuttaasut ilaat pisinnaatitaaffimminnit ikiorsiissutinik ikinnerusunik tunineqartarput. Tamatuma akerlianik innuttaasut arlallit akiligassaat akilerneqarsimapput, naak tamatumunnga pisinnaatitaaffeqarunnaareeraluarlutik, suliap saqqummiunneqarnerani taama allassimavoq.
Immikkut nammineerluni ikiorsiisoqartartoq
Kommunip aningaasat tunniunneqartartut nammineq suliarisarpai, qarasaasiakkummi atortorissaarutit suli piareersimanngimmata, tamannali kommunimi sulisunut piffissartornarpoq.
Kommuneqarfik Sermersooq septembarip naanissaata tungaanut nammineerluni ikiorsiissutinik tunniussisassaaq:
- Tamatuma kinguneranik Kommuneqarfik Sermersooq inatsisit atuutilernerannit qaammatit qulingiluat qaangiutereeraluartut inatsisinik atuutsitsinissamut suli naammattumik atortorissaarummik ineriartortitsisimanngilaq. Taamaattorli suli tatigisariaqarlugu atortorissaarutit ’erniinnaq’ piareerneqarumaartut, kommunimi ingerlatsivik allappoq.
Kommunimi ingerlatsivik naliliivoq, ajornartorsiutit pissutigalugit aningaasat suliffissarsiornermut, siunnersuinermut piginnaanngorsaanermullu atorneqarsinnaagaluartut atorneqartariaqarsimasut, tamatumalu kingunerisinnaallugu suliffissaaleqisut suliffittaarsinnaajunnaarnerat sivisuumillu suliffissaaleqisunngorlutik.
