SISIMIUNI NAKUUSERTARNEQ
Qeqqata Kommuniani partiit tamarmik sakkortunerusumik pineqaatissiisalernissaq piumasarivaat
Qeqqata Kommuniani kommunalbestyrelse naammagiliivoq inuit taakkoqqissaat persuttaasarnerat pillugu. Inoqatinik navianartorsiortitsilluni pinerluttartunut pineqaatissiisarneq apeqquserpaat. - Inuit taakkoqqissaagajupput taamatut persuttaasarnermik iliuuseqartartut, kommunimi partiit sisamat, Siumut, Atassut, Inuit Ataqatigiit aamma Naleraq, erseqqissaatigaat.
Sisimiut ilisimaneqarpoq illoqarfittut ingerlarsorluartuusutut, kisiannili aamma ilisimaneqarpoq illoqarfittut navianartutut, tassanimi inuit sussuseqanngitsut navianartorsiortitaallutik pinerluffigitittarput. Maanna Qeqqata Kommuniani partiit tamarmiunut sakkortunerusumik pineqaatissiisoqartalernissaanik ujartuipput, minnerunngitsumillu persuttaasartut pineqaatissinneqarnerminnut atatillugu katsorsarneqartalissasut kaammattuipput.
Assiliisoq (toqqorsivimmit): Leiff Josefsen
Nunatsinni pineqaatisseeriaaseq ilumut naapertuuppa? Qeqqata Kommuniani ataatsimoorlutik taamak aperipput inuusuttup 16-inik ukiullip sakkortuumik persuttartissimanermi kingunerisaanik annertuumik ajoquserneqarsimalluni rigshospitaliliaanneqarnerata kingorna.
- Sisimiuni ukiuni kingullerni inuit aalajangersimasut inoqatiminnut
peqqarniitsumik pinnittarnerat assorujussuaq kamannarlunilu alianarpoq.
Isertuutissanngilarpullu Sisimiut nalinginnaasumik najugaqarfigalugu
toqqissisimanaraluartoq, inunnit aalajangersimasuniit Sisimiut ajortumik
tusaamaneqartinneqarnera assorujussuaq tujorminarmat. Ajornerpaavorlu
inuit taamatut pineqartut ilaqutaallu taamak ajortigisumik
misigisaqartarnerat.
Pineqaatissinneqarsimasut inissiisarfianiitsitsineq iluaqutaava?
Kommunalbestyrelse erseqqissaavoq, oqartussat ilisimasimassagaat inuit aalajangersimasuunerusut inunnik sussuseqanngitsunik persuttaasartuusut. Pisumut matumani pineqartumut tunngatillugu, tassa GUX-imi ilinniartoq 16-inik ukiulik annertuumik persuttarneqarsianeranut tunngatillugu, Kalaallit Nunaata Politiivisa suli nalunaarutiginngilaat persuttaasimasoq imaluunniit persuttaasimasut tigusarineqarsimanersut, taamaattorli takunnissimasinnaasunik ujartuillutik nalunaarnikuupput.
- Inoqatinut peqqarniitsumik persuttaasarneq akulikitsumik tusartagarput
eqqarsaatigalugu apeqquserparput nunatsinni pineqaatissiisarnerup
sakkortussusaa ilumut naapertuunnersoq? Aammalu
pineqaatissinneqarsimasunut inissiisarfimmiitinneqartarneq ilumut
iluaqutaasarnersoq?
- Apeqqusiinitsinnut tunngaviuvoq persuttaasartut tassaanerusarusarmata
arlaleriarlutik pineqaatissinneqarsimasunut inissiisarfiinnittussanngorlugit
pineqaatissinneqartarsimagaluarlutik aniguigaangamik anusinngorsimanatik
taamatut uteqqiattumik inoqatiminnut peqqarniitsumik persuttaasartut.
- Taamaattumik paaserusupparput pineqaatissinneqarsimasunut
inissinneqarsimasut ajornartorsiutiminniiit qaangiinissaat anguniarlugu
arlaatigut katsorsarneqarnissaminnut imaluunniit sulisinnaanngorsarlugit
ikiorneqarnissaannik pisussaaffilerneqartarnersut?
Taamaattoqarsimanngippat isumaqarpugut taakkua pinngitsooratik
piumasaqaataasariaqaraluartut. Taamaanngippammi ajornartorsiutit
takoriikkatsituut uteqqiattumik ingerlajuassapput, Qeqqata Kommuniani partiit tikkuaapput.
Naaja: pineqaatissiisarneq sakkortusineqassasoq Ukiuni arlalinni piumasaqarpugut
Naalakkersuisoq Naaja H. Nathanielsen (IA) paasinnilluarsinnaanerarpoq Qeqqata Kommuniani kommunalbestyrelsip pakatseqqaneranut iliuuseqartoqarnissaanillu ujartuineranut.
Taanna erseqqissaavoq Inatsisartut Naalakkersuisullu ukiuni arlalinni Kalaallit Nunaanni pineqaatissiisarnerup sukateriffigineqarnissaa anguniarlugu suliniuteqarsimasut.
- Tamannami Inatsisartuni oqallisigineqarpoq, Naalakkersuisuniillu suliaq pingaaruteqarmat pingaarnersiuinermi salliutinneqarpoq. Paasissutissat sukumiinerusut minnerunngitsumillu pineqaatisseeriaaseq pillugu innuttaasut isummersuutaat paasisaqarfigiumallugit aamma innuttaasunut paasiniaasitsivugut, taamaattumik maannakkut misissuineq annertooq ingerlanneqarpoq, oqarpoq Naaja Nathanielsen.
- Tamatuma saniatigut ukiuni arlalinni Danmarkimi naalakkersuisunut kimigiiserpugut pineqaatissiisarnermut qaffasinnerpaamik piumasaqaatit sukateriffigineqassasut, maannakkut qaffasinnerpaamik ukiuni qulini pineqaatissiisoqarsinnaavoq, uagullu kissaatigaarput taanna ukiut 16-inut sukaterneqassasoq. Nunatsinni pineqaatisseeriaatsitsinni pinerluutaasimasut ataasiakkaat suussusaat tunngaviginagit qummut killeqaannarpoq sivisunerpaamik ukiuni qulini pineqaatissiisoqarsinnaasoq. Assersuutigalugu toqutsisoqarsimatillugu, nalinginnaavoq toqutsisimasutut pineqaatissinneqartut ukiut arfinillit ukiullu arfineq pingasut akornanni pineqaatissinneqartarnerat, taakkunanngalu ikittunnguit ukiuni arfineq pingasuni pineqaatissinneqartarput. Tamanna isumaqarpoq persuttaaneq aamma saassussineq, tassa inunnik navianartorsiortitsineq, taakkunannga appasinnerusumik pineqaatissiissutigineqartartoq.
Naaja H. Nathanielsenip ilisimatitsissutigaa, paasisani kingulliit naapertorlugit danskit naalakkersuisui inatsisissatut siunnersuummik suliaqartut, Kalaallit Nunaata piumasaqaataanut, tassalu pineqaatisiisarnerup sukateriffigineqarnissaanik piumasaqaammut naleqqussaalluni pineqaatissiisarnerit sivisunerusunngortinneqartussanngussasut.
- Inatsisissatut siunnersuut Inatsisartunut aappaagu saqqummissinnaassallugu neriuutigaarput, Inatsisit atuutsinneqarnerannut Naalakkersuisoq, Naaja H. Nathanielsen Sermitsiamut oqarpoq.
Inoqatinik navianartorsiortitsilluni pinerluttoqartarnera suleqatigiissutigisariaqarparput
Ataaserli tassaavoq pineqaatissiineq, allalu tassaalluni pineqaatissinneqarsimasut katsorsarneqarnissaat. Naaja H. Nathanielsen oqaluttuarpoq, pinerluuteqarsimasunik isumaginnittoqarfik isertitsivinniittunut katsorsartinnissamik neqerooruteqartoq, taamaattorli anstaltimiinnerup sivisussusaa apeqqutaalluni, katsorsaaneq maanaannaq unitsinneqartariaqarsinnaasartoq misiliutaasumik iperagaasoqaraangat:
- Kaammattuutigerusupparput iperagaagallartoqassatillugu katsorsartinneq naammassisimanngikkaangat nanginneqartassasoq naammassillugu. Tamatumunnga piumasaqaataavoq tigusisussat piareersimanissaannik. Taamatuttaaq piumasaqaataavoq inissaqartitsisoqassasoq. Taamaammat iperagallagaasoqassatillugu tigusisussat piareersimalluarnissaat pingaaruteqarpoq, inatsisit atuutsinneqarnerannut naalakkersuisoq, Naaja H. Nathanielsen oqarpoq.
- Maani pingaaruteqarpoq kommunini tamani namminersorlutillu oqartussani iperagaasut anillaffissaat suleqatigiissutigineqassasoq, aammalu pingaaruteqartorujussuuvoq tamattalu suleqatigiilluta suliassaraarput inuusuttut pinerlunniartalernissamut aarlerinartorsiuteqartut ilaqutaat ilanngullugit piaartumik pinaveersaartitsilluni iliuuseqarfigineqartarnissaat. Tassami pinerlunniartalernerisa kingunerisaat sakkortoorujussuusarput, matumanilu pineqartumi, angummut inuusuttunnguamut eqqugaasumut annertuumik kinguneqarpoq, tamannalu assorujussuaq uissuumminarlunilu annilaarnarpoq, naammassivoq Naaja H. Nathanielsen.
