RG-mi siulittaasoq: Aqutsisut nutaat periusissiaq nutaaq malissavaat
Susanne Rajamandimik suleqateqarneq ingerlaannartumik atorunnaarsinneqarpoq. Ingerlatseqatigiiffik inussutissarsiummik misilittagaqarluartumik Kalaallit Nunaannilu najugalimmik pisortaanermik pisariaqartitsivoq, Royal Greenlandip siulersuisuini siulittaasoq oqarpoq.
- Suleqatigiinnitsinnik unitsitsinerput ima paasisariaqarpoq aqutsisunik taarseerusuttutut. Aalajangiineq siulersuisut tamarmik aalajangiinerannik tunngaveqarpoq, tamannalu qaqutigoortuunngilaq, Maliina Abelsen oqarpoq.
Assi: Leiff Josefsen
Susanne Rajamand ukiut marluk sinnerlugit Royal Greenlandimi pisortaaneroreersorlu nutaamik atorfinitsitsisoqartariaqartoq ingerlatseqatigiiffimmi siulersuisut aalajangerput.
Susanne Rajamandimik suleqateqarunnaarniarluni aalajangerneq allanik piginnaasalinnik pisariaqartitsisoqarnera pissutigiinnarlugu pisoq Royal Greenlandimi pisortaq Maliina Abelsen Sermitsiamut oqarpoq.
- Ingerlatseqatigiiffik aqutsisuni allaanerusumik pisariaqartitsilerpoq. Royal Greenlandip atorfissaqartitaa tassaavoq pisortatut inuussutissarsiummillu misilittagaqarluartoq Kalaallit Nunaannilu najugaqartoq. Tamatuma saniatigut aqutsinermi misilittagaqarluartoq, Royal Greenlandimi siulersuisut siulittaasuat Maliina Abelsen Sermitsiamut oqarpoq.
Taamaalilluni Susanne Rajamand februaarip aallaqqaataani 2023-mi atorfinitsinneqarnini naammassivaa:
- Oqartoqarsinnaavoq ingerlatseqatigiiffik assigiinngitsut aqqusaarlugit ingerlasoq. Ingerlatseqatigiiffiullu Susanne Rajamandip aqutsinermut, aningaasartuutinik annikillisaanermut Kalaallit Nunaannilu aqutsinermik ukatarinninnissamik piginnaaneri pisariaqartissimavai, oqarpoq.
Aqutsisut Kalaallit Nunaanniissapput
Kalaallit Nunaanni Namminersorlutik Oqartussat ingerlatseqatigiiffiutaata annersaani aqutsisut Kalaallit Nunaanni najugaqarnissaat pingaaruteqartoq Namminersorlutik Oqartussat ataatsimeersuarnermi naqissuserpaat.
- Kalaallit Nunaanni najugaqartumik pisariaqartitsillusi oqaatigaat. Tamanna Susanne Rajamandip suleqatigiunnaarneranut pissutaava?
- Naamik, tamanna pissutaanngilaq. Kisianni Kalaallit Nunaanniittumik pisortaqarneq ajornannginnerulersitsissasoq qularnanngilaq, tamannali Susanne Rajamandimik suleqateqarunnaarnitsinnut pissutaanngilaq, Maliina Abelsen akivoq.
- Inatsisartunut qinersisoqarnissaa sioqqullugu pisortaaneq soraarsissallugu aalajangerparsi. Sooq piffissami matumani suleqatigiinneq taamaatippisiuk?
- Qinersisoqarnissaa apeqqutaatinnagu suliffeqarfimmik ingerlatsivugut, aamma qinersisoqarnissaanik sunnerneqartussaanata. Oqartoqarsinnaavoq siulersuisut Royal Greenlandimut periusissiaq nutaaq 2024-mi decembarimi akuersissutiginikuuaat. Soorunami aqutsisut periusissiami anguniakkat angunissaannut piginnaasaqarnersut isiginiassavarput, aammalu suut tamarmik imminnut naapertuunnersut, oqarpoq.
Kina sulilissava
Siulersuisunut ilaasortaq Preben Sunke pisortaanerup taartissaata nassaarineqarnissaata tungaanut Royal Greenlandimi pisortaanertut atuuttussanngortinneqarpoq. Nutaamik pisortaanertaarnissaq qaammatit arfinillit qulingiluallu akornanni pisinnaasoq siulersuisuni siulittaasoq paasissutissiivoq.
Preben Sunke Forenet Kreditimi Nykreditimilu siulersuisunut siulittaasup tulliattut inissisimavoq Danish Crownimilu ukiut 30-t sinnerlugit pisortatut tullersortiusimalluni.
Royal Greenland piffissami ilungersunartorsiornikuuvoq. 2023-milu akileraarutit suli ilanngaatiginagit 255 millionit koruuninik amigartooruteqarpoq.
Ingerlaannaq atuutilersumik soraarsitsineq pillugu siulittaasoq ima oqarpoq.
- Suliffeqarfimmi pisortaanerugaanni siulersuisunik suleqateqarsinnaajunnaarnerup tungaanut atorfeqartoqartarpoq. Suleqatigiinnitsinnik unitsitsinerput ima paasisariaqarpoq aqutsisunik taarseerusuttutut. Aalajangiineq siulersuisut tamarmik aalajangiinerannik tunngaveqarpoq, tamannalu qaqutigoortuunngilaq, Maliina Abelsen oqarpoq.
Susanne Rajamand piffissami ikaarsaariarfiusumi Royal Greenlandimit immikkut ittumik ikiortigineqarsinnaasoq Maliina Abelsen ilisimatitsivoq, soraarsitsinerlu isumaqatigiissummi malittarisassat atuuttut malillugit suliarineqarsimasoq.
Soraarsitsinermi ajunngitsorsiassanut tunngatillugu taama isumaqatigiissuteqarneq suliffeqarfiup aningaasaqarneranut naapertuuttoq Maliina Abelsen oqarpoq.
