Sermersooq: 15 millionit koruunit Kivitsisamut
Hempel Fonden, A.P. Møller Fonden, Villum Fonden aamma Oak Foundation Denmarkimit tamarmik immikkut 3,75 millionit koruuninik katillugillu 15 millionit koruuninik aningaasaliinerini tunngavissiilluarnissaq Kivitsisallu ineriartuinnarnissaa qulakkeerneqarpoq.
Foto: Kommuneqarfik Sermersooq
Nunatsinni meeqqat atuarfii assigineqaratik Igalikumi sisamanik atuartulinnit Nuummi atuarfittaami 1.200-nik atuartulimmut assigiinngitsigipput.
Assigiinngissuseq aaqqiissutissanik immikkut ittunik illoqarfiillu nunaqarfiillu suleqatigiilluarnerata pisariaqarneranik kinguneqarpoq.
Kivitsisa nuna tamakkerlugu kommunit ataatsimoorlutik meeqqat atuarfianni ineriartortitsineraq suliaqartuuvoq, tassanilu suleqatigiinneq ilinniartitaanermi digitalimik ineriartortitsinermut illersuutaassasoq, Kommuneqarfik Sermersooq allappoq.
Hempel Fonden, A.P. Møller Fonden, Villum Fonden aamma Oak Foundation Denmarkimit tamarmik immikkut 3,75 millionit koruuninik katillugillu 15 millionit koruuninik aningaasaliinerini tunngavissiilluarnissaq Kivitsisallu ineriartuinnarnissaa qulakkeerneqartoq, Kommuneqarfik Sermersooq nittartakkamini allappoq.
Digitalimik aaqqiissutissat pitsaanerulersitsissapput
Nunatta isorartussusaa inuttussusaalu ilinniartitaanermi aaqqiissutit digitaliusut atorlugit pitsaassutsimik kivitsinissamut periarfissaqarluarneranik isumaqarpoq.
Kivitsisa 2018-imiilli nunatsinni meeqqat atuarfiini tamani atortulersuutit digitaliusut atorlugit aqqutissiuivoq.
Kommunit tallimat taakku suleqatigiinnertik ingerlatiinnarniarniarlugu aalajangerput, ukiuni pingasuni suliniuteqarniarlutik, aningaasaateqarfinnit sisamanit 15 millionit koruuninik tapiiffigineqartumik:
- Ukiut kingulliit arfinillit Kivitsisa suleqatigiillualernermut meeqqallu atuarfiisa pissanganartumik nutaamik sammiveqalernerinut sinaakkusiisuuvoq. Ataatsimoorussamik allaffeqarnermi nutaanillu aningaasaliiffigitinnikkut tunngavissinneqarluarpugut aaqqiinerit pilersitatta ineriartortiinnarnissaannut taakkulu aaqqissuussaanerup atuarfeqarnerullu iluaniitilernisaannut suliaqarsinnaalerluta.
- Ineriartortitsineq sivisusarpoq, nuannaarutigeqaarpullu aningaasaateqarfiit sisamaasut aallaqqaataaniillu suliniut tapersersorusummassuk tunngavissiilluaqataarusummatalu, Kivitsisami siulersuisuini siulittaasoq, Malene Broberg oqarpoq.
Tunngaveqarnerulernissamut pilersaarut suleqatigiissutigalugu
Tunngaveqarnerulernissamut pilersaarut ilaatigut nuna tamakkerlugu allaffeqarfimmut ilikkariartornermut siunnersorteqalernissamik ilinniartitsisullu mentorillu akornanni piginnaanertusaanissamik kiisalu atuartitsissutissanik ineriartortitsinissamik imaqarpoq. Tunngaveqarnerunernissamut pilersaarut Ilinniartitaanermut Aqutsisoqarfik aammalu Ilinniarnermut Ilisimatusarfik, suliaqarnissamut pingaaruteqartumik inissisimasussaasut, qanimut suleqatiginerini pilersinnaqarpoq.
- Inersiartortitsiniarutta ataatsimooruttariaqarparput. Taamaammat assut nuannerpoq Kivitsisap suliaqaqqinnissaa ilaatigut Ilinniartitaanermut Aqutsisoqarfik Ilinniarnermullu Ilisimatusarfiup qanimut suleqatigineqarnerani pilersinneqarmat. Suliniut nutaat aallartinnissaannut assut qilanaarpugut. Qularutiginngilluinnarparput atuartunut ilinniartitsisunullu ulluinnarnik ilikkarfiulluartunik kinguneqarumaartoq, Malene Broberg oqarpoq.
