Sermersooq: Atuartut amerlanerit ilinniartitsisunik amerlanerusunik pisariaqartitsipput
Ukiumi atuarfiusumi nutaami atuartut ukiumut atuarfiusumut siulianut sanilliullugit amerlanerussapput, tamannalu ilinniartitsisunik sisamanik atorfinitsitsinissamik pisariaqartitsinermik kinguneqassaaq, Kommuneqarfik Sermersuumi Meeqqanut Atuarfeqarnermullu Ingerlatsivimmit misissuinerup takutippaa.
Illoqarfiit pingaarnersaanni nunaqarfinnilu atuarfinni 16-ini ukiumi atuarfiusumi tulliuttumi atuartut 2.870-iussasut misissuinerup takutippaa
Toqqorsivimmit assi: Leiff Josefsen
Ilinniartitsisunik pisariaqartitsineq pillugu misissuinerup kingulliup takutippaa illoqarfiit pingaarnersaanni atuarfinni nalunaaquttap-akunneri atuartitsiffiusut 830.498-iussasut, taakkulu siorna atuartitsiffiusumit nalunaaquttap-akunnerinik 11.053-inik amerlanerupput.
Kommunimi illoqarfinni nunaqarfinnilu atuarfinni 16-ini atuartut 2.870-it aallartissasut ingerlatsiviup missingerpaa.
- Ukiumi atuarfiusumi kingullermit atuartut 66-inik amerleriarput. Atuartut amerlassusissaasa katinneranni atuartut 248-t immikkut atuartinneqassapput. Ukiumut atuarfiusumut kingullermut naleqqiullugu atuartut arfinilinnik amerlanerupput. Klassit 151-it pilersinneqarnissaat naatsorsuutigineqarpoq, tassalu ukiup atuarfiusup siulianit klassinik tallimanik ikinnerullutik. Tassunga ilanngullugu immikkut atuartitsinermi klassit 41-t pilersinneqarnissaat naatsorsuutigineqarpoq. Ukiup atuarfiusup siulianut sanilliullugu klassit pingasunik amerlillugit pilersinneqarnissaat naatsorsuutigineqarpoq, ingerlatsivimmi pisortaq Nukaaraq Møller, Meeqqanut Atuarfeqarnermullu Ataatsimiititami politikkerinut pingasunngornermi aggustip arfineq-aappaanni ataatsimiittussanut innersuussummini, taama allappoq.
Ilinniartitsisunik nutaanik sisamanik atorfinitsitsinissamut kommuni aningaasanik nassaartariaqartoq misissuinerup takutippaa, tamannalu aningaasaqarnermut ataatsimiititaliap kingusinnerusukkullu kommunalbestyrelsip isummerfigissavaat.
