Politikerit atorfilittallu Nuummi inissianik
aningaasaliisunut kommunip karsianut pitsaanngitsumi kinguneqartunik arlalinnik
attartornissamik isumaqatigiissuteqarsimanerat, Kommuneqarfik Sermersuup
kigaatsumik paasiartorpaa.
Sermersuup
isumaqatigiissutinik atuukkunnaarsitserusuppoq, taamaaliornissarli
pisariitsuinnaanngilaq, kommunilu inissianillu aningaasaliisut imminnut
eqqartuussivilersuunniarlutik illuatungeriillutik ilimasaaripput.
INUIT PINGAARUTILIMMIK INISSISIMASUT MARLUK
2018-imit 2020-mut Kommuneqarfik Sermersooq inuussutissarsiornermi
attartornissamik isumaqatigiissutinik arlalinnik, ukiut siuliini pisortat
inissianik aningaasalersuisarnermik taarsigassarsiarititaannik
neriorsuusiorfiusunik isumaqatigiissuteqarpoq.
Taamaalilluni piffissami
Sermersuumi periutsitut taaneqartup atorneqarnerani, politikerini
allaffissornermilu inuit pingaarutilittut inissisimasut
kikkuussuserneqarsinnaapput.
Kommuneqarfik Sermersooq kommunit 2009-mi kattussuunneqarnerisa kingorna
pingasunik borgmestereqarpoq.
- 1. januar 2009 – 11. juni 2019: Asii Chemnitz Narup, Inuit Ataqatigiit
- 11. juni 2019 – 15. juni 2022: Charlotte Ludvigsen, Inuit Ataqatigiit
- 15. juni 2022 kingorna: Avaaraq S. Olsen, Inuit Ataqatigiit
Ukiut aalassassimaarfiusut kommunaldirektørinik taarseraaffiusorujussuit
kingorna eqqissisoqarpoq.
- 1. december 2016 – 5. september 2017: Lars Møller-Sørensen
(utaqqiisaagallartumik atorfilik)
- 5. september 2017 – 6. juli 2021: Lars Møller-Sørensen
- 6. juli 2021 – 15. november 2021: Marie Fleischer (utaqqiisaagallartumik
atorfilik)
- 15. november 2021 kingorna: Ole Jakobsen.
Attartornissamik isumaqatigiissutit amerlaneritigut borgmester Asii Chemnitz
Narupimit kommunaldirektør Lars Møller-Sørensenimillu atsiorneqartarput.
Nuuk
City Invest ApS-imik attartornissamik isumaqatigiissut, taamaallaat Lars
Møller-Sørensenimit kommuneingeniør Hans Henrik Winther Johannsenimillu
atsiorneqartoq kisimi taakkununnga ilanngilaq.
Politikerit atorfilittallu Nuummi inissianik
aningaasaliisunut kommunip karsianut pitsaanngitsumi kinguneqartunik arlalinnik
attartornissamik isumaqatigiissuteqarsimanerat, Kommuneqarfik Sermersuup
kigaatsumik paasiartorpaa.
Sermersuup
isumaqatigiissutinik atuukkunnaarsitserusuppoq, taamaaliornissarli
pisariitsuinnaanngilaq, kommunilu inissianillu aningaasaliisut imminnut
eqqartuussivilersuunniarlutik illuatungeriillutik ilimasaaripput.
Ilaqutariilli 331-t kommunip inissianillu aningaasaliisartut aningaasanik
politikimillu assortuunneranni, nammineq piumassuserinngisaminnik
inissinneqarput.
Kikkut tamarmik sianiinaarneqarsimasutut misigipput
Sermersuumi periutsitut taaneqartumi pineqartoq ilaatigut tassaavoq inissianik
attartortitsineq pillugu peqqussut ilaatigullu inissianik aningaasalersuisarneq
pillugu inatsit. Malittarisassat marluk taakku inissianik inissianik
aningaasalersuinermi taarsigassarsiffiusuni inissianik attartornermut
akiliutinik aalajangersaanermut tunngatillugu imminnut aporaapput.
Kommuni peqqusersaarfigineqartutut misigivoq: Inissianik attartornermik
isumaqatigiissutit ullumikkut misissorneranni, ullumikkut inissiamik
attartortitsinermi akiliut, kommunip 2010-kkunni qisuariarnani akuerisaa,
pisunit tallimanit pingasuni qaffasippallaartoq paasinarsivoq.
Attartortitsinermut isumaqatigiissut allanngortinniarlugit inissianut
aningaasaliisunut kimigiiserpoq: Attartortitsisut attartortitsinermik
isumaqatigiissutip aallartinneranit kingumoortumik inissianik
attartortitsisarnermut akiliutip taamanikkut isumaqatigiissutaasup,
inissianillu attartortitsinermik akiliutip, kommunip ullumikkut naapertuuttutut
isigisaata assigiinngissutaa akilissavaat.
Attartortitsisuttaaq aamma nammineq
isummaminik inissianik attartortitsinerup qaffaataa, isumaqatigiissutinut ilanngunneqartoq,
inissianilli attartortitsinermik peqqussummik unioqqutitsisoq utertillugu
akilissavaat.
Inissianik aningaasaliisut atugassarititaasut nutaat akuersaanngippasigit,
kommunip pisortat inissianik attartortitaat 125 millionit koruunit
ingerlaannartumik utertissavai. Inissianik aningaasaliisut
peqqusersaarfigineqartutut misigipput: Taakku inissianik attartortitsinermik
akiliut ukiuni 20-ni ernialigaanngitsunik taarsersugassaanngitsunillu
taarsigassarsitinneqarsimanertik tunngavissaatillugu annertussusilerpaat.
– Sermersooq inissianut aningaasalersuutinut taarsigassarsititsisoqarnera
tunngavigalugu inissianik attartornermut akiliummut annikillisaavigineqarput,
isumaqatigiissullu tunngavit pingaaruteqartorujussuaq taanna, suliami matumani
pisortat taarsigassarsititsinerat
ilaatinnagu atsiorneqarsimanavianngikkaluarpoq, pisortaq Jackie Lyng Nuuk City
Invest ApS-meersoq Sermitsiamut oqarpoq.
Inissiaatileqatigiiffik kommunilu ulloq 1. december 2020 Nuukullak 3-mi 3E-milu
inissianik, ukiumut 7.577.012 kr-nik akiliutigineqartartussanik, ukiumullu 1,5
procentinik qaffattartussamik inissianik 73-nik attartornissamik
isumaqatigiissuteqarput.
Inissianik attartortitsineq pillugu peqqussut
naapertorlugu inissianik attartornermut akiliut annerpaamik 5.399.403
kr-iussasoq, isumaminillu inissiamik attartornermut akiliutip qaffattarnera
inatsisinik unioqqutitsinerusoq, kommuni ullumikkut naliliivoq.
– Qanoq ililluni millionerpassuarnik nikingassut manna pilerpa?
– Kommunip attartornermut akiliutaa inatsisit malillugit naatsorsorneqanngilaq,
taamanikkullu aaqqissuunneqarnerani immikkuualuttut ataasiakkaat ullumikkut
ilisimanngilakka, kommunaldirektør Ole Jakobsen Sermitsiamut oqarpoq.
– Kommuni attartornissamik isumaqatigiissusiorami, Sermersooq piaaraluni
iliorpa?
– Taamaassorinngivippara, kommunili eqqarsarluarsimagunanngilaq. Inissianik
attartornissamik isumaqatigiissut piffissami illoqarfimmi inissianik
pissarsiniarluni ulappunnerup nalaani isumaqatigiissusiorfigineqarpoq.
Tamannalu aningaasartuuteqarfiuvoq, Ole Jakobsen oqarpoq.
Pissutsinik ilisimaarinnittut
Eqqartuussissuserisut Malling & Hansen Dammikkut inuussutissarsiornermi
attartukkanik isumaqatigiissutit qulingiluat misissorpaat, tassanilu inissianik
aningaasalersuisarnermik malittarisassat naapertorlugit 125 millionit koruunit
taarsigassarsiaqarpoq. (Allaaserisaq »Attartornermut isumaqatigiissutit
aaku« takuuk).
Eqqartuusissuserisut erngerlutik ajornakusoornartoq tikkuarpaat.
– Kommuneqarfik Sermersooq pissutsip ilisimaaralugit attartornermut
isumaqatigiissusiorsimasoq oqartoqarsinnaavoq, uanga isiginnittaasera
naapertorlugu attartornermut inatsimmi attartornermut akiliutip
aalajangersarneqarnissaanut maleruagassat taamalu ineqarnermut
taarsigassarsinissamut piumasaqaatit annertuumik unioqqutillugit, Niels Hansen
Damm allappoq.
Eqqartuussissuserisulli ajornartorsiut inissianik aningaasaliisunut tutsippaa.
– Attartornissamik isumaqatigiissutit aalajangersakkanik taamaattunik
imaqarneranni, allaat inissianik aningaasalersuinermi taarsigassarsiat
attanneqarsinnaannginnerat, attartortitsisut akisussaaffigalugulu
aarlerinaatinik tigumminniffigaat, Niels Hansen Damm allappoq.
Pisortaq Jackie Lyng piaaraluni iliuuseqarsimannginnerarpoq, attartornissamummi
isumaqatigiissutit kommunip inissiaatileqatigiiffiani Iserit A/S-imi allaffimmi
suliarai.
– Attartornissamik isumaqatigiissutit Iserit A/S-mi atorfilik peqatigalugu
suliaraakka, isumaqatigiissutimmi sapinngisamik ersarissuunissaa
kissaatigigakku, Jackie Lyng Sermitsiamut oqarpoq.
Eqqartuussissuserisulli eqqunnginneraapput.
– Kommuni attartornissamik isumaqatigiissusiornermigut inatsisinik
unioqqutitsinermik akuersinngilaq. Attartortitsinermik isumaqatigiissutinik ima
iluaqutsiitigisunik, allaat inissianik aningaasalersuisarnermut inatsimmik
unioqqutitsisunik isumaqatigiissusiornissamik kissaateqarneq, attartortitsisut
aalajangigassaraat, Niels Hansen Damm allappoq.
Allatulluunniit oqaatigalugu: »Sunaluunniit uppernaakkaangami amerlanertigut upperisassaaneq ajorpoq«.
Sermitsiaq inissianik aningaasaliisunik allanik, attartornissamik
isumaqatigiissummik borgmesterimit Asii Chemnitz Narupimit
kommunaldirektørimillu Lars Møller-Sørensenimit atsiorneqartumik
saqqummiivigineqaramik eqqortumik iliortutut misigisunik oqaloqateqarpoq.
Eqqartuusissuserisulli taamatut tunngavilersorneq itigartippaat.
– Kommuneqarfik Sermersoorluunniit attartornissamik isumaqatigiissutini
atsiornermigut atugassarititaasunik akuersissutit isumaqarfigineqaraluarpat,
tamatuma attartornissamik isumaqatigiissutit inatsisinik
malinnittunngortinngilai.
Niels Hansen Dammilu ima erseqqissaavoq:
– Kommuneqarfik Sermersuup isumaqatigiissummik inatsisinik unioqqutitsisumik
atsiornermigut, isumaqatigiissummik inatsisinik
malinnittunngortitsisinnaanngilaq.
