Spiralilersuisimaneq pillugu misissuinerup inernera atuarlugu sunnertinnanngitsuunngilaq. Pisimasoq tamarmi amiilaarnaqaaq, ullumikkullu qanoq pisoqarsimanera paasiuminaatsipparput. Nakorsat niviarsiaqqat aqqaneq-marlunnik 13-inillu ukiullit qanoq iliorsimanerlutik aamma sooq taamaaliorsimanerlutik nassuiaatiginagu, angajoqqaallu akuersinerat siumungaaq pissarsiarinagu spiralilersissimagaat, aamma arnat inersimasut sooq taamaaliorsimanerlutik nassuiaatiginagit spiralilersissimagaat.
Arnat 20-t missaaniittut aamma nunap immikkoortortaani nakorsap nammineq spiraliliaanik 1965-imi ikkussiffigineqarsimapput, taannalu naak peqqinnissaqarfimmit spiralimik Lippes Loopimik ikkussuinissamut akuerineqanngikkaluarluni isertortumik nammineerluni spiraliliortarsimavoq.
Spiralilersuisimaneq pillugu misissuinerup inernera atuarlugu sunnertinnanngitsuunngilaq. Pisimasoq tamarmi amiilaarnaqaaq, ullumikkullu qanoq pisoqarsimanera paasiuminaatsipparput. Nakorsat niviarsiaqqat aqqaneq-marlunnik 13-inillu ukiullit qanoq iliorsimanerlutik aamma sooq taamaaliorsimanerlutik nassuiaatiginagu, angajoqqaallu akuersinerat siumungaaq pissarsiarinagu spiralilersissimagaat, aamma arnat inersimasut sooq taamaaliorsimanerlutik nassuiaatiginagit spiralilersissimagaat.
SERMITSIAQ ISUMAQARPOQ
Sermitsiami allaaserisaq pingaarnerutitaq.
Arnat 20-t missaaniittut aamma nunap immikkoortortaani nakorsap nammineq spiraliliaanik 1965-imi ikkussiffigineqarsimapput, taannalu naak peqqinnissaqarfimmit spiralimik Lippes Loopimik ikkussuinissamut akuerineqanngikkaluarluni isertortumik nammineerluni spiraliliortarsimavoq.
Filmitut quilertanartutut nipeqarpoq, kisianni soorlu oqartoqartarnerattuut piviusut takorluukkanit amiilaarnarnerusarput.
Arnat spiralimik ikkussffigineqartarsimanerat ukiuni qulikkuutaani ingerlanneqarpoq, ilisimasatsinnillu kingulliit 1990-ikkut aallartinneranni pisimapput. Tamatta arnamik spiralimik ikkussiffigineqarsimasumik nalunngisaqarpugut, aamma arnamik ataatsimik marlunnilluunniit meerartaarsinnaanngitsunik nalunngisaqarpugut.
Misissuineq aamma Naalakkersuisut siulittaasuata Jens-Frederik Nielsenip ministeriunerlu Mette Frederiksenip arnanut utoqqatsernerat suliap tamatuma naggatiginngilaa. Aatsaat aallartippoq. Maanna akisussaaffik tiguneqassaaq, aamma inatsisitigut akisussaaffik. Arnat tusindilippassuit inuunerannik sunniisumut danskit naalagaaffiat akisussaasuusoq misissuinermimi aamma inerniliunneqarpoq.
Danskit naalagaaffiata innuttaasunit amerliartornissatsinnik akornusersuinerata kinguneri ullumikkut atorpagut. Tamanna ilaatigut inuiaqatigiit aningaasaqarneranni malugineqarsinnaavoq – soraarnerussutisiaqalertartut amerliartorput, taakkuninngali isumassuisussat ikiliartorlutik.
Naalakkersuisut siulittaasuat Jens-Frederik Nielsen ministeriunerlu Mette Frederiksen septembarip 24-ani pisortatigoortumik utoqqatsissapput. Ministeriunerup arnat toqqarlugit isigalugit utoqqatsissasoq naatsorsuutigaarput, taamaallaammi taamaalillutik takuneqartutut paasineqartutullu misigisinnaallutillu misigissutsikkut anniaatitik suliarilersinnaassavaat.
Kalaallit qallunaallu akunnerminni sorsunnersuup kingulliup kingorna pissutsinik misissuinerat ataatsimut, maanna aallartinneqartoq, saammaateqatigiinnermut paasinninnermullu iluaqutaassaaq. Misissueqqissaartarfiup ilaatigut politikkikkut aalajangiinerit pisimasullu pingaarutillit, soorlu sumi inunngorsimaneq tunngavigalugu akissaasersuineq, nunaqarfinnik matusinerit, qitornavissianngortitsisarnerit il.il. misissussavai. Danmarkittaaq Kalaallit Nunaanni milliardilinnik iluanaaruteqartarsimasoq piffissamili kingullermi aamma paasinarsiartulerpoq, taamaammat aningaasaqarnikkut misissuineq aamma naleqqulluinnamat misissuinermut ilanngunneqartariaqarpoq.
Piffissami inuuffitsinni nunap inoqqaavitut inuiaqatigiit qanoq ittut inuuffigalugit paasiartuleruttorparput. Danmarkip nunasiaateqartutut iliuuserisimasaata kinguneri atorpagut, tassani naalagaaffik Danmark nunatsinnik aqutsillunilu nakkutilliisuusimavoq. Niviarsiaqqanut arnanullu spiralilersuisimaneq ukiropassuit ingerlanerini pisimasorpassuit ilaannaraat.
Kamanneq, aliasungaarneq, soriarsinnaanngitsutullu misigineq ajornanngeqaaq. Arnat qanoq pineqarsimanerat, aammali tamatuma kinguneri tusarlugit sakkortuvoq. Pisimasut pillugit paasissutissat piviusullu misissorneqartariaqarnerat inunnullu oqaluttuarineqartariaqarnerat pingaaruteqarpoq. Tamakku tamarmik qulaajarneqartariaqarput.
