Sila allanngorartoq: Aputip sisoorsinnaanera aarlerinartoq
Sinerissami sumiiffinni arlalinni kiannerulerlunilu anorersuarpoq. Qaqortumi aputip sisoorsinnaanera kommunip mianersoqqussutigaa.
Qaqortumi sumiiffinni arlalinni aputip sisoornissaa aarlerinartoq Kommune Kujallermi upalungaarsimasunit ilisimatitsissutigineqarpoq.
Assiliisoq: Isumaginninnermut, Ilaqutariinnermut, Suliffeqarnermut Nunanullu Namminermut Naalakkersuisoqarfik.
Qaqortumi aperujussuarsinnarluni siallernera kiannerulerneralu pissutigalugit sumiiffiit arlallit aputip sisoorsinnaaneranik aarlerinartorsiorput.
Silap allanngorarnera pissutigalugu aputip sisoornerit tassanngaannaq aallartissinnaavoq.
Taamaattumik Kommune Kujallermi upalungaarsimasut Qaqortumi sisoortoqarnissaa aarlerisaarutigaat.
- Apisaqattaareernerata kingorna maannalu sialuit apummut oqimaallisitsineranni sumiiffinni ukunani : Hastrupvej - Peterhøeghsvej - nakkartarfiullu isuata qulaani Arsaattarfitoqqallu qulaatungaani aputip sisoorataarsinnaanera upalungaarsimanermik suliaqartut mianersoqqussutigaat, Kommune Kujalleq facebookimi quppernermini allappoq.
Upalungaarsimanermik suliaqartut sumiiffiit malinnaavigivaat, ullunilu qaninnerni tamanna pillugu nalunaaruteqaqqissallutik.
Anorersuartoq
Kommune Kujalleq assigalugu sinerissami sumiiffinni arlalinni sila kiallunilu anorersuarpoq.
Kapisilinni pingasunngornermi anorlernerani 40 m/s-itut sakkortutigisumik anoraasuartarnissaa ilimagineqarpoq, silasiorfiit nalunaarutigaat. Pingasunngornerup ualinerata tungaanut anorlernissaa ilimagineqarpoq. Sanaartornermi atortut, umiatsiat assigisaallu isumannaaqqullugit Kommunip innuttaasut kajumissaarpai. Anorersuarnerani ajortorujussuarmik pisoqarpat upalungaarsimasut 113-imut sianerfigalugit piareersimassapput.
