KOMMUNIMUT QINERSINEQ 2025
Simigaq Heilmann borgmesterinngornissaminut piareeqqavoq
Simigaq Heilmann (D), Kommune Qeqertalimmi inuttullu qinerneqarnerpaatut ajugaavoq aammalu Demokraatit maanna sisamanik ilaasortaatitaqalernissaannut siuttuusimalluni, maanna taanna Kommune Qeqertalimmi borgmesterinngornissaminut ilimanarnerpaanngorpoq.
Simigaq Heilmann kommunalbestyrelsimut qinersinermi 204-nik inuttut qinerneqarluni taaguunneqarnerpaatut ajugaavoq.
Assi: Privat
Siullermik Siumut aamma Naleraq, maannali ilimanarsilluinnarpoq Demokraatit, Inuit Ataqatigiit, Naleraq aamma immaqa Atassut.
- Politikkikkut isumaqatigiissutissatta piareernissaa qanillivarput, neriuppunga ullumikkut naammassisinnaassallutigu, tassami poorski sioqqullugu isumaqatigiinniarnerit naammassiniarnissaat anguniarsimavarput, Simigaq Heilmann (D) Sermitsiamut oqarpoq nangillunilu:
- Maannakkut isumaqatigiissutip imarisaa saqqummiussinnaanngilara, taannami atsiorneqaqqaartussaammat, kisianni isumaqatigiinniarnerit ajunngitsumik ingerlasimapput, maannakkullu kingulliit iluarsiniarlugit sulissutigaarput, Simigaq Heilmann (D) oqarpoq.
Simigaq Heilmannip oqaatigaa nammineq neriulluni Atassut suleqatigiinnut ilanngussinnaassasoq, taamaalissappallu Demokraatit, Inuit Ataqatigiit aamma Naleraq peqatigilersussaassammagit.
Borgmesterinngornissaminut piareersimasoq
Simigaq Heilmannip oqaatigaa kommunimi borgmesterinngornissaminut piareersimalluni. Ilanngullugu oqaatigaa amerlasuut kaammattuisimasut Inatsisartuniiginnarnissaanik, tassami Qeqertarsuaq ukiuni arlalinni Inatsisartuni sinniisoqarsimanngimmat:
- Paasisinnaavara Qeqertarsuarmiut Inatsisartuni sinniisoqarusuttoq, kisianni eqqaamassavarput Inatsisartuni nunarput tamaat sullinneqartussaammat, sumiiffiit aalajangersimasut kisiisa pinnagit. Nunarput ajunngitsumik ineriartussasoq kissaatigaara, kisianni minnerunngitsumik kommunitta ajunngitsumik ineriartornissaa aamma kissaatigaara, taamaattumik borgmesterinngornissara imaluunniit Inartsisartutut ingerlaannarnissara toqqaasussanngussaguma, taava borgmesterinngornissara toqqassavara, kommunitsinni ineriartortitsineq annertunerusoq aallartissallugu nukikka atorusukkakkit, Simigaq Heilmann oqarpoq.
Simigaq Heilmann aamma innersuussivoq kommunit nunap ineriartortinneqarneranut sunniuteqartorujussuummata aammalu kommunit namminersorlutik oqartussat qanittumik suleqatigiittarmata, tassanilu pingaartumik borgmesterit Naalakkersuisullu qanimut suleqatigiittarmata, ilaatigut politikkikkut ataqatigiissaarisartut aqqutigalugit.
