Siulersuisuni siulittaasuusimasoq KNR-imut uterpoq
KNR-imi ajornartorsiutinik aaqqeeriartussamik siulersuisuni siulittaasussamik nutaamik Naalakkersuisut toqqaapput.
Siulersuisuutitaqarfimmi maanna atuuttumi KNR pingajussaanik nutaamik siulittaasortaarpoq.
Assiliisoq: Leiff Josefsen
Innuttaasunik kiffartuussivimmi KNR-imi siulersuisuni Naalakkersuisut nutaamik siulittaasussamik toqqaapput.
Nukaraq Eugenius, 2015-imit 2019-imut siulittaasuusimasoq, siulittaasutut uterpoq.
- Maanna nuannaarutigingaarlugu Naalakkersuisut nalunaarutigissavaat KNR-ip siulersuisuini siulittaasumik nutaamik toqqaasoqarmat. Siulittaasoq nutaaq tassaavoq Nukaraq Eugenius, tusagassiuutinut nalunaarummi Naalakkersuisut allapput.
Siulersuisuni maannakkut atuuttuni pingajuattut siulittaasunngortuugami suliassaqassaqaaq, piffissamilu tamatumani innuttaasunik kiffartuussivimmi unammillernartorpassuit pisimapput.
Naalakkersuisoq neriuuteqarluartoq
Mette Steenholdt 2023-mit 2026-mut siulittaasussatut toqqarneqaqqaarnikuuvoq, ukioq mannali februaarimi tunuarpoq. Tamatuma kingorna Rosannguaq Rossen siulittaasunngorpoq, juunimili aamma tunuarpoq.
Siulersuisuni siulittaasut taarseraannerisa saniatigut aamma soraarsitsinerit sulisullu suliffimmi avatangiisit ajortut pissutigalugit napparsimanermik nalunaaruteqartarnerat unammillernartorujussuusimapput.
Siulittaasunngorlaap pissutsit allanngortissagai, Naalakkersuisup Aqqaluaq B. Egedep neriuutigaa:
- Maanna piffissami atuuffimmi pingajussaa KNR-ip siulersuisuini siulittaasumik nassaarniartussaasimavugut, siornatigutuullilu ajornanngitsuinnaasimanngilaq. Taamaattumik neriuuteqarluarpugut Nukaraq Eugeniusilu KNR-ip siuttuatut suleqatiginissaa qilanaaralutigu, naluanarummi Aqqaluaq B. Egede (IA) oqarpoq.
Maannakkut siulersuisuusut decembarip 31-iani 2026-p tungaanut atuuttussaapput.
