Atuarfik Inussuk Nuummiittoq suli
atorneqarsinnaanngilaq, aammattaaq atuarfiup Ukaliusap oqoqarnera
pissutigalugu matuneqarpoq.
Kommuneqarfik Sermersuumi
kommunalbestyrelsimi Siumup gruppiata pissutsit naammatsiffigaat
kommunimillu pitsaanerusumik paasissutissinneqarnissaq ujartorlugu.
Atuarfik Inussuk Nuummiittoq suli
atorneqarsinnaanngilaq, aammattaaq atuarfiup Ukaliusap oqoqarnera
pissutigalugu matuneqarpoq.
Kommuneqarfik Sermersuumi
kommunalbestyrelsimi Siumup gruppiata pissutsit naammatsiffigaat
kommunimillu pitsaanerusumik paasissutissinneqarnissaq ujartorlugu.
- Atuartut qanoq pineqassappat?
Atuartut inaarutaasumik misilitsittussat maanna atuarnerat iluamik
naammassiniarlugu qanoq qulakkeeriniartoqarpa? Atuartut ulluinnaat
qanoq sunnerneqarpa, aamma aaqqiissutissat suut piareersarneqarpat?
Siumup gruppiani ilaasortaq Dorthe-Marie Mogensen-Fontain aperaaq,
angajoqqaallu isumakuluutaat paasisinnaalluarnerarlugu.
Paasissutissat ammasumillu
ingerlatsineq naammanngitsut
Kommuneqarfik Sermersuumi
kommunalbestyrelsimi ataatsimiititalianilu attuumassuteqartuni
ammasumik ingerlatsisoqannginnera isornartorsiorneqarpoq. Qinikkat
ajornartorsiutit pillugit naammattumik ilisimatinneqarsimanngillat,
aamma unammilligassat qanoq iliuuseqarfigineqarnissaat pillugu
pilersaarusiortoqarsimanngitsoq Dorthe-Marie Mogensen-Fontain
oqarpoq.
- Naammaleqaaq. Angajoqqaat,
ilinniartitsisut, sulisut innuttaasullu ersarissunik
paasissutissinneqartariaqalerput. Kommunalbestyrelsimut ilaasortatut
atuartut qanoq inissinneqartarnersut, taakkualu atuarnerannut qanoq
qulakkeerinnittoqarniarnersoq aamma naammaginartumik
nassuiaaffigineqanngilagut, oqarpoq.
NCD-p tukak qimaannarlugulu
kinguneri akisusut
Nuuk City Developmentip (NCD)
pilersinneqarnera kingornalu matuneqarnera ajornartorsiutinut
attuumassuteqartoq Siumumit aamma erseqqissarneqarpoq. Suliniut
sukumiisumik misissorneqaranilu, kinguneri
paasissutissiissutigineqaratillu kommunimut akisusut partii
isumaqarpoq.
- NCD-mi aqutsinerluttoqarsimasoq
isumaqarpugut. Qineqqusaarnermi Martha Abelsenip (S)
torersaasariaqartoq oqariartuutigereerpaa, kingunerimi Kommuneqarfik
Sermersuumut akisuallaarmata. Maannamut angusat naammaginanngillat,
aperisariaqarpugullu siunissami suut piareersimaffigisariaqarnersut,
Dorthe-Marie Mogensen-Fontain oqarpoq.
Arlaannaannulluunniit
attuumassuteqanngitsunik
misissorneqaqqugaat
NCD-p ingerlatsinera,
aningaasaqarnera aalajangiisoqassatillugu suleriusaat pillugit
arlaannaannulluunniit attuumassuteqanngitsunit misissorneqassasoq
Siumup gruppiata arlaleriarlutik piumasarinikuullugu oqarput,
tamannali suli naammassineqarsimanani.
Taamaammat apeqqutit
pingaarnerit suli akissutisineqanngimmata, kommunimit sanaartukkanut
suliniutit angisuut eqqarsaatigalugit tatiginnileqqinniarneq
ajornakusoorpoq.
- Tamanna aqutsinerup
kukkuluttorneqarneranut takussutissaavoq, suliaq
malinnaavigilluarneqarsimanngilaq. Kinguneri kommunimut taama
akisutigippata soorunami suliaq misissorneqartariaqaraluarpoq.
Kisianni suli inernera utaqqivarput, Dorthe-Marie Mogensen-Fontain
Siumut sinnerlugu oqarpoq.
Immikkut ittumik
ataatsimiittoqartariaqartoq
Atuarfiit matuneqarnerat atuartut
siunissaannut toqqaannartumik sunniuteqarmat qinikkat immikkut
ittumik ataatsimiigiaqquneqartariaqartut, Siumup gruppia isumaqarpoq.
Ataatsimiinnermi suut tamarmik saqqummiunneqassapput,
atuarfiliornermilu ajornartorsiutit aaqqinneqarnissaata tungaannut
atuartut qanoq ilillutik pitsaasunik avatangiiseqarsinnaanersut
pilersaarusiorneqassalluni.
Atuarfik Inussuk atuarfiit
pisoqaanerusut marluk ajornartorsiutaannut aaqqiissutissatut
pilersaarutaaqqaarsimasoq Siumut erseqqissaavoq, maannali taanna
atorneqarsinnaanngimmat apeqqutaalerpoq ukiuni tulliuttuni atuarfiit
allat matusariaqarpata qanoq pisoqassanersoq.
