FOLKETINGIMI OQAATSINIK ATUINEQ
Statsministeri: Pingasuulluta nunatut naligiissutut suleqatigiissaagut
Folketingimi ammaanersiornermut atatillugu oqallinnermi Aki-Matilda Høegh-Dam oqaaseqartartutut oqaaseqaataanut naatsumik qisuariaateqarnissaq inerteqqutaavoq, aamma oqalugiaatip danskisut nutserneqarnera folketingimi ilaasortanut agguaanneqarsimagaluarpalluunniit. Statsminister Mette Frederiksen isummersornerminik isertuarani saqqummiussivoq, aamma nammineq folketingip siulittaasoqarfiata aalajangiussaannut akuliussinnaatitaannginnini erseqqissaatigigaluarlugu.
Screenshot Folketingip ammaanersiornermi oqalugiaat tunngavigalugu oqallinnerannit sisamanngornermi oktobarip pingajuani 2024-mi aallakaatitsinermit
Statsminister Mette Frederiksen immikkut qujassuteqarpoq atlantikup avannaamiut folketingimi ilaaasortaatitaannut tamanut, taakku nunat inuilu sinnikkatik qasusuillutik folketingi aqqutigalugu sullissinerat pillugu.
Immikkut aamma maluginiarnarpoq, taassuma oqaatsinik atuinermut tunngatillugu folketingip ataatsimiittarfiaanni sulinerup ilusilersugaaneranut tunngatillugu isummersormat.
"Tassaavugummi nunat pingasut tamatta immikkut oqaasillit"
- Ilissi peqataavusi Naalagaaffeqatigiinnerup allanngornerani, maannalu sukkasuumik allanngoriartorpoq. Kissatigaara nunat pingasuusut innuttaasuisa atugaannut piviusunut allannguutit taakku naleqquttuunissaat.
- Nunat pingasuuvugut tamattalu immikkut kinaassuseqarluta, aamma tassaavugut nunat pingasut tamatta immikkut oqaasillit. Ullumikkut ataatsimiittarfimmi tamanna sammineqarpoq.
- Folketingi tassaavoq maani folketingip inersuani ataatsimiinnernik pilersaarusiortartoq. Tamanna akuliuffigissanngilara, aamma pisinnaatitaaffeqanngilanga folketingip siulittaasoqarfiani aalajangiussanut akuliutissallunga.
- Kisianni oqaatigerusuppara, naalagaaffeqatigiinneq pillugu sulinitsinni tamatigut eqqumaffigisariaqaratsigu, suleqatigiinneq nunat pingasut akornanni naligiinnermik aallaaveqassasoq, inuiaqatigiit pingasut naligiittussaapput aamma immikkuullarissumik kultureqarnerat ilanngullugu, Statsministeri ilaatigut taamak oqarpoq innersuussillunilu siunissamiimmata suliassarpassuit, ataatsimut tamarmik nunat taakku pingasut siuariartuutissaannik aqqutissiiussineq siunertaralugu.
