Sukkorneq: Kalaaleq pinngoqqaatimini immikkut ittumik allannguutilik timimik aalatitsinikkut katsorsarneqarsinnaavoq
Misissuinerup inernera tupaallannartoq, tassa pinngoqqaatiminni immikkut ittumik allannguutillit timimik atuigaangamik allaanerusumik qisuariartarnerat, Amerikami ilisimatuussutsikkut atuagassiami ataqqisaasumi saqqummersinneqarpoq.
Kalaallit pinngoqaatiminni immikkut ittumik allannguutillit sukkornermik eqqugaanerusarput. Maanna ilisimatusarnerup takutippaa taakkua timaasa aavisalu sukkuat timimik aalatitsinikkut allatut qisuariartartut. Timimilli aalatitsineq suli taakkununnga sunniuteqarluartumik katsorsaataavoq.
Leiff Josefsen
Kalaallit 4 procentingajaat pinngoqqaamminni immikkut ittumik allannguuteqarput, tamannalu pissutigalugu sukkornermik nappaateqalernissamut quleriaammik navianartorsiornerusarput.
Pinngoqqaatip immikkuullarissup taassuma kingunerisaanik timimik atuinermi insulinip sukkua nukinnit atorneqarluarsinnaaneq ajorpoq.
Tamanna tunngavigalugu kalaallit nunanilu allani ilisimatusartut sukkornermik nappaateqartunut pinngoqqaammik tamassuminnga peqartunut timimik atuinerup sunniutai paasiniarlugit misissuipput.
Kalaallit Nunaanni Inuunerissaavik Steno nunanit tamalaanit ilisimatusartut peqatigalugit kalaallit pinngoqqaammik allannguutilimmik taassuminnga peqartut pillugit ilisimatusarnermi nutaamik paasisaqarput.
- Peqataasuni sungiusartinneqartuni aap sukkoqassusaata uissuumminartumik apparnera, misissuinerup inernerisa takutippaat. Aalli sukkoqassusaata taama apparnera, nalinginnaasumik naatsorsuutigineqarsinnaasumik nukiit insulinimik atuilluarnerulernerannik patsiseqarani, timimik atuinerup uumassusilinni pissutsit allat, suli tamakkiisumik qulaajaavigineqanngitsut aqqutigalugit, sukkumik arrortitsinerup annertunerulersinnaaneranik patsiseqarpoq, sukkornermik ilisimatusartoq Marit Eika Jørgensen Inuunerissaavimminngaanneersoq Københavnip Universitetia suleqatigalugu misissuinermi aqutsisoq nassuiaavoq.
Paasisaq tupaallannartoq
- Misissuinerup inerneri uissuumminarput – uissuumminarnerali ilisimatusaqatigiinnit ilimagineqarsimanngilaq, taanna oqarpoq.
Inuit arfineq-pingasut pinngoqqaamminni allannguuteqartut inuillu arfineq-pingasut pinngoqqaamminni allannguuteqanngitsut misissuinermi peqataapput.
- Kalaallinut pinngoqqaatimikkut immikkut ittumik allannguuteqartunut tamanna nutaarsiassaavoq pitsaasoq, tassalu taamaakkaluaq timimik atuinerup, aap akuata sukkup qaffasissup appartinnissaanut iluaqutaalluarnera, taamaalillunilu timimik atuineq taakkunani diabetesimik nakorsaanermi pingaarutilittut toqqammavissanngorluni, Marit Eika Jørgensen oqarpoq.
Ilisimatusarnermi aqutsisoq naapertorlugu, misissuineq timimik atuinerup qanoq ililluni aap sukkoqassusaanik appartitsisarnera pillugu nutaanik paasisimasaqalersitsivoq, taamalu ilisimasaqalerneq kalaallini pinngoqqaatiminni taamaattumik allannguutilinni diabetesimik nakorsaanissamut paasinninnissamullu nutaanik periarfissiivoq.
