DANMARKIMI MINISTERI SPIRALILERNEQARSIMASUNUT TAARSIISSUTEQARNISSAMUT
Taarsissutissat qanoq amerlatigissanersut kisitsisinngorlugit oqaatigisinnaanngikkai
Spiralilerneqarsimasunut taarsiissutissuteqarnissaq Danmarkimit kinguartinneqarnissaa takorloorneqanngitsoq peqqissutsimut ministeri oqarpoq, taarsiissutissalli qanoq amerlatigissanersut oqaatigisinnaanngilaa.
Peqqissutsimut ministerip Sophie Løhdep Kalaallit Nunaannut tikeraarnini naggaserlugu peqqissutsimut inunnullu innarluutilinnut naalakkersuisoq Anna Wangenheim peqatigalugu tusagassiortunik katersortitsivoq.
Assi: Hanna Hviid
Arnanut akuersiteqqaarnagit spiralilerneqarnikunut taarsiinissamut tunngatillugu suliaq siuariarpoq. Naalakkersuisut qallunaallu naalakkersuisuisa arnat pinngitsaalillugit naartunaveersaaserneqarsimasut taarsiivigineqarnissaanut alloriaqqipput.
Arnat tamarmik immikkut 300.000 koruunit missaannik taarsiivigineqarumaartut, Inatsisinik atortitsinermut naalakkersuisup Naaja H. Nathanielsenip (IA) Sermitsiamut pingasunngormat uppernarsarpaa.
Danskit naalagaaffianniimmi qanoq taarsiissuteqartoqassava?
Saammaasseqatigiinnermut aningaasaateqarfimmik pilersitsisoqarnissaa, ilaatigut arnanut spiralilerneqarnikunut aningaasatigut taarsiissuteqarnissamut atorneqarsinnaasumik, Danmarkimi naalakkersuisut nalunaarutiginikuuaat.
Arnat danskit naalagaaffiannit qanoq amerlatigisunik taarsiivigineqassanersut Danmarkimi peqqissutsimut ministeri Sophie Løhde (Venstre) Nuummi tusagassiortunik katersortitsinermi Sermitsiamit aperaarput:
- Maannakkut iliuuseqarfigisussaavarput, tamannali pissappat Danmarkimi inatsisitigut tunngavissaq inissinneqaqqaassaaq, inatsit akuersissutigineqassaaq, saammaasseqatigiinnermut aningaasaateqarfik pilersinneqassaaq taamaalillunilu aningaasatigut taarsiissuteqarnissaq aatsaat pisinnaassalluni. Inatsisitigut tunngavissaq maannakkut inissititertariaqarparput. Uannullu pingaaruteqarsimavoq Kalaallit Nunaannukarlunga kalaallit isumasioriartornissaat.
Qanoq amerlatiginersut oqaatigisinnaanngikkallarpigit?
- Inissinneqaqqaassapput, pingaaruteqartorli tassaavoq maannakkut piffissalerneqarsimanerat, Sophie Løhde oqarpoq.
Arnat sukkanerusumik qinnuteqarpata, sukkanerusumik taarsiivigineqassapput
Saammaasseqatigiinnermut aningaasaateqarfimmit aningaasat siulliit 2026-p affaani kingullermi tunniunneqassasut, nunamut namminermut peqqissutsimullu ministeriaqarfik pingasunngornermi nalunaarpoq.
Arnat taarsiiviginiarneqarnerat sivisuallaariataarsinnaanera Naaja H. Nathanielsenip ernummatigalugu oqaatiginikuuaa:
- Uanga isumaga malillugu aningaasaateqarfimmik pilersitsinniarneq arriippallaarsinnaaneranik kinguneqarsinnaavoq. Arnat amerlasuut ukioqqortusinikuupput, suliarlu taanna naammassineqartariaqaleraluarpoq, pingasunngormat oqarpoq.
Taarsiissuteqarniarneq sivisuallaamik ingerlassanngitsoq danskit naalagaaffiannut pingaaruteqartoq Sophie Løhdep tusagassiortunik katersortitsinermi arlaleriarluni oqaatigaa.
Qinnuteqaatit qanoq sukkatigisumik suliarineqarnerat apeqqutaasoq
Arnalli tamarmik taarsiiffigineqarnissaat qanoq sivisutigissaneranut pineqartut apeqqutaapput.
- Arnat qanoq sukkatigisumik qinnuteqarnersut apeqqutaassaaq. Tassalu qinnuteqarpata suliaq aallartissaaq, aammali ataasiakkaat kingusiinnakkut qinnuteqarneranniit tamarmik ataatsikkut qinnuteqarpata suliaq soorunami sukkanerusumik ingerlassaaq.
- Suliamut tunngatillugu kinguartitsinissaq soqutigisarinngilarput, arnalli tamarmik aamma namminneerlutik qinnuteqartussaassapput, Sophie Løhde oqarpoq.
Arnat 143-t danskit naalagaaffiat eqqartuussivimmut suliassanngortinnikuuaat. Taakku tamarmik 1992 sioqqullugu, peqqinnissaqarfiup qallunaanit suli akisussaaffigineqarnerata nalaani, akuersissuteqaratik spiralilerneqarnikuunertik pillugu immikkut 300.000 koruuninik taarsiiffigitinnissamik piumasaqaateqarput.
