KOKAIN PILLUGU SULIAQ
Tarnikkut nakuuserneq pillugu suliaq siulleq aallartippoq
Eqqartuussivimmi Sermersooq Kredsretimi kokain pillugu suliaq annertooq aamma allanik suliassartaqarpoq. Unnerluussaasut pingaarnerit ilaat tarnikkut nakuusersimasutut nunatsinni siullersaalluni unnerluunneqarpoq. Tarnikkut nakuuserneq pillugu pineqaatissiisinnaaneq 2024-miit atuutilersussamik pinerluttulerinermut inatsimmi nutaamik ilanngussaavoq.
Eqqartuussivimmi suliami unnerluutigineqartut S aamma N-mik taasatsinnut tunngasoq Nuummi eqqartuussivimmi ulluni tallimani ingerlanneqassaaq.
Assiliisoq: Morten Okkels
Nunatsinni ikiaroornartulerineq pillugu eqqartuussivitsigut suliat annersaasa ilaata ingerlanneqarnerani Sermitsiaq suli najuuppoq. Inuit marluk kokainimik annertuumik tigummiaqarsimasutut unnerluussaasut aappaa tassaavoq 37-nik ukiulik N.
Ikiaroornartulerineq pillugu unnerluussinerup saniatigut N unnerluutigineqarpoq aapparisimasaminut tarnikkut nakuusersimasutut.
TARNIKKUT NAKUUSERNEQ PINERLUTTULERINERMI INATSIMMI
§ 88 a.: Inuk inoqutigiinni allap akuuffigisaani ilaasoq qanittumilluunniit attuumassuteqartoq imaluunniit siusinnerusukkut inoqutigiinnut taakkununnga taamatut attuumassuteqarsimasoq, aamma piffissap ingerlanerani uteqqiattumik, allamut pineqartumut assuarnartumik aqutsissutitut naleqquttunik, ingasattumik nikassaanermik, ajortumik pinninnermik imaluunniit kannguttaatsuliornermik pissusilersortoq, matumani naqisimanninnikkut, pinngitsaaliinikkut imaluunniit nakuusernikkut nammineq inuuneqarnissamut siunissarlu pillugu nammineq aalajangiisinnaanissamut killilersuineq ilanngullugit, tarnikkut nakuusersimasutut eqqartuunneqassaaq.
Tarnikkut nakuuserneq pinerluttulerinermi inatsimmi nutaajuvoq. Tarnikkut nakuuserneq pillugu unnerluussisoqarsinnaaneq aatsaat 2024-mi atuutilerpoq, N-ilu Kalaallit Nunaanni siullersaalluni unnerluutigineqarpoq. Taamaattumik soqutiginarpoq unnerluutigineqartoq pillugu eqqartuussivimmi qanoq ingerlasoqarnersoq malinnaaffigissallugu.
Malittarisassaq nutaaq atuutilersinneqarpoq pingaartumik inooqatigiittut, inooqatigiissimasut imaluunniit ilaqutariit akunnerminni imminnut timikkut annersaatinngikkaluarlutik tarnikkut nakuusertarnerat eqqarsaatigalugu.
N-ip tarnikkut nakuusersimaneragaanini nassuerutigiumanngilaa eqqartuussivimmilu apeqqutit akerusuppai. Suliap immikkoortuani matumani annertuumik ajornartorsiuteqartumik N-ip aapparisimasaatalu akornanni pisimasunut tunngassuteqarpoq. Taakku marluullutik ataatsimik peqarput.
Oqarasuaatikkut sianernerit tusindilikkaat
Unnerluussisup uppernarsaatit nassarpai, tassani takuneqarsinnaavoq N-ip arnamut oqarasuaatikkut amerlasoorpassuariarluni sianeqattaartarsimasoq. 2024-ip ingerlanerani N arnamut tusindilikkaanik sianeqattaartarsimavoq normunit assigiinngitsuniit.
- Tamanna ilumoorsimasinnaavoq. Oqarasuaatimimi tigunissaanut isumaginninnerluttuuvoq, N oqarpoq.
Taanna arnarlu imminnut arlalippassuariarlutik immiuttarsimapput, immiussallu ilai assortuunnermut tunngassuteqartut arnap ilaqutaasaluunniit politiinut annguttarsimavaat.
Eqqartuussivimmi immiussat ilaat tusarnaarneqarput, tassani N kamalluni arnaq pasivaa allamik atoqateqartartuunerarlugu. N uppernarsaateqarnerarpoq. Taamatuttaaq mobilikkut allakkat, imminut toqunnissamik sioorasaarutitut paasineqarsinnaasut aamma saqqummiunneqarput.
Unnerluussisoq isumaqarpoq oqarasuaatitigut saaffiginnissutit aqqutigalugit arnamik pineqartumik aqutsinissamik uupakaatitsinissamillu (manipulation, aaqq.) siunertaqarsimasoq.
N naapertorlugu, nammineq siornatigut inooqatigisimasaminik ilaqutaanillu assut ajortumik pineqarsimanerarpoq. Taassuma iliuuserisimasai assigiinngitsuni pisimasuni tamassuminnga tunngaveqartumik isigineqartariaqartut N isumaqarpoq.
N-ip oqaatigisimasaata ilaat immikkut maluginiarneqarpoq, oqarasuaatikkut assortuunnerit ilaanni N aapparisimasaminut arnamut arnallu ataataanut oqarpoq, "tamassi ikuallassavassi".
N isumaqanngilaq tamanna nakuusernissamik sioorasaarinertut paasineqartariaqartoq. Kisianni unnerluussisoq taamak isumaqarpoq, taamaattumik oqaaseqatigiit taakku unnerluussutip allattorsimaffiani immikkut ittumik inissisimavoq.
Apeqqutit taakku sapaatip akunnerani tulliuttumi uterfigissavagut, tassani aamma arnaq pineqartoq nammineq tusarnaarsinnaassavarput. Taannami uppernarsaasutut aggersarneqarpoq.
