Toqusup timaanik ikuallaavik 20 millionit koruuninik akeqassaaq
Qeqqata Kommuniani kommunalbestyrelsimi ilaasortaq Navarana Lennert-Andersen (IA) kommunimi toqusup timaanik ikuallaavittaarusuppoq. Qeqqata Kommuniani toqusup timaanik ikuallaavimmik pilersitsinissaq 20 millionit koruuneqassasoq, naalakkersuisoqarfimmit paasissutissiissutigineqarpoq.
Arkivfoto
Qeqqata Kommuniani kommunalbestyrelsi maajip 30-ani ataatsimiinneranni Navarana Lennert-Andersenip (IA) siunnersuutini saqqummiutaa maanna nangillugu eqqartorneqarpoq.
Qeqqata Kommuniani ilaatigut toqusup timaanik ikuallaaveqalernissaq taassuma siunnersuutigaa.
Siullermik oqaluuserineqarnerani aalajangiunneqarpoq allaanerusunik upperisalinnik ilisisarnerup annertussusaanik Peqqinnissaqarfikkoorlugu Palaseqarfikkoorlugulu misissuisoqassasoq, kiisalu toqusut timaannik ikuallaaviit pillugit Naalakkersuisut misissuinerannik aperineqassasut.
Kisitsisit
Sisimiuni Palaseqarfiup paasissutissiissutiginikuuaa, 2023-mi innuttasoq ataaseq lutherikkunnut ilaasortanngorsimasoq innuttaasorlu ataaseq ilaasortaajunnaarsimasoq.
2023-mi innuttaasut 54-it toqukkut qimagussimapput innuttaasuniillu taakkunannga arlaannaalluunniit lutherikkunniit ilaasortaajunnaarnikuunani.
2024-mi innuttaasoq ataaseq lutherikkunnut ilaasortanngorpoq innuttaasullu tallimat ilaasortaajunnaarlutik. 2024-mi juunip naanerani innuttaasut 19-it toqukkut qimagussimapput, taakkunannga arlaannaalluunniit lutherikkunniit ilaasortaajunnaarnikuunani.
Palaseqarfiup aammattaaq paasissutissiisutigivaa, kisitsisit innuttaasunik sullissivimmut
nassiunneqartartut, taakkulu toqusut amerlassusaat aamma lutherikkuunniit ilaasortanngorsimasut ilaasortaajunnaarsimasullu amerlassusaat nalunaarutigisaraat.
Sisimiuni innuttaasut qassit lutherikkunnut ilaasortaanersut palaseqarfimmi kisitsisaatigineqanngillat, tassanngaanniillu qassit ilaasortaajunnaarsimanersut kisitsisaatigineqarani, Sisimiunut Sisimiuniillu nuuttoqartarsimasinnaammat.
20 millionit koruuninik akeqassaaq
Naalakkersuisoqarfiup akissutaani ilaatigut allassimavoq missiliuummi illu, ikuallaavittalik filterertalillu, sanaartorfissagissaaneq pilersaarusiornerlu ilanngullugit 20.000.000 koruunit missaanni akeqassasoq.
Taamanimiilli atortussanut akit qaffannikuummata naatsorsuutigineqassaaq, 2020-mi nalilerneqartumiit toqusut timaannik ikuallaaviliornermut akeq qaffasinnerussasoq.
Naak milliornerpassuugaluartut, kommunalbestyrelsimi ilaasortat suli inuup timaanut ikuallaavittaarusupput.
- Toqusup timaanik ikuallaasarnerit nunani allani periarfissaapput, taamaattumik isumaqarpugut nunatsinni aamma tamanna periarfissaasariaqartoq. Suli ilisisassagutta nunarujussuaq iliveqarfimmut atortariaqassagatsigu, Steffen Johansen Naleqqameersoq siunnersuummut isumaqataalluni kommunalbestyrelsimi sisamanngornermi septembarip 26-ani ataasimiinnermi oqarpoq.
Missingersuummi kissaatitut
Naalakkersuisoqarfiup erseqqissarpaa, toqusut timaannik ikuallaavimmik pilersitsineq Namminersorlutik Oqartussanut tunngassuteqartussatut isigisariaqanngitsoq. Taamaattumik Teknikkeqarnermut Avatangiisinullu immikkoortortaqarfiup Kommunalbestyrelsimut innersuussutigaa toqusut timaannik ikuallaavimmik sanaatornnissaq missingersuutinut kissaatitut aappaagu saqqummiunneqassasoq.
