SPIRALILERSUISIMANEQ PILLUGU SULIAQ
Tusagassiorfik: Arnat 20-t taarsiivigineqarnissamik qinnuteqartut
Spiralilerneqarnikut taarsiivigineqarnissamik qinnuteqartut ilimagisamit amerlanerulereersimapput, tamannali aaqqiivigineqarsinnaasoq Naaja H. Nathanielsenip siusinnerusukkut oqaatiginikuuaa.
Naalakkersuisut siulittaasuat Jens-Frederik Nielsen aamma danskit ministeriunerat Mette Frederiksen arnanut akuersitinneqaratik spiralilerneqarsimasunut septembarip 24-ani utoqqatserput. Nuummi Katuami pivoq, kulturikkullu illorsuup silataani naasortaliisoqarpoq.
Assi: Mads Claus Rasmussen/Ritzau Scanpix
Arnat 20-t 1992-imi januaarip kingorna akuersiteqqaarnagit spiralilerneqarsimasut allamilluunniit naartunaveersaaserneqarsimasut, sapaatip-akunnerata ataatsip affaatalu ingerlanerani taarsiivigineqarnissamik qinnuteqarsimapput.
Inatsisit atortitsinermut naligiissitaanermullu naalakkersuisoqarfik KNR-imut ilisimatitsivoq.
Arnamut ataatsimut 300.000 koruunit missaannik taarsiisoqassasoq inatsisit atortinneqarnerannut naalakkersuisoq Naaja H. Nathanielsen (IA) Sermitsiamut siusinnerusukkut oqarpoq. Arnalli ilaannut suliap sakkortussusaa aallaavigalugu aningaasanik amerlanerusunik taarsiisoqarsinnaanera periarfissaalluni.
Naalakkersuisut taarsiissutissatut 4,5 millionit koruuninik aningaasaliipput, tassa arnamut ataatsimut 300.000 koruuninik taarsiisoqarpat katillugit 15-it taarsiivigineqarsinnaallutik.
Sulialli amerlanerussappata aningaasaliissutit amerlineqarsinnaasut Naaja H. Nathanielsenip sapaatip-akunnerata siuliani oqaatigereerpaa.
- Qinnuteqartut amerlanerussappata ilassutitut aningaasaliisoqarnissaanik Inatsisartunut qinnuteqarnissara partiinut isumaqatigiissutiginikuuara. Maannali aningaasat naatsorsuutigineqartutut taakkuupput, Sermitsiamut oqarpoq.
Qinnuteqarsinnaaneq ukiup naaneranut killeqarpoq. Tamatumalu kingorna sulianut tunngasunik ilisimasallit taarsiissutissat qanoq amerlatigissanersut aalajangersussavaat.
