Ullut 14-ikkaarlugit akunnermi ataatsimi najorsinnaagaa 

DANMARKIMI NAALAKKERSUISUT TATINEQARTUT

Sapaatit akunnerani qaangiuttumi sisamanngornermi Naalakkersuisoq Aqqaluaq B. Egede kiisalu Naalakkersuisut siulittaasuat Múte B. Egede Danmarkimi isumaginninnermut ministerimik Sophie Hæstorp Andersenimik ataatsimeeqateqarput ilaqutariit kalaallit pineqartillugit angajoqqaatut piginnaaneqarnermut misissuinermi suli atorneqartartoq pillugu. Ataatsimiinnerup kingorna Naalakkersuisunut ilaasortat inerneranik kipiluttunartorsiortut ersarippoq. 

Múte B. Egede ataatsimiinnermiit Nordatlantens Bryggemiit toqqaannartumik DR2-i immiussisarfimmukarpoq, tassani aallakaatitassiami Deadlinemi danskit naalakkersuisuinik naammaginninngilluinnarnini oqaatigalugu: ”Isumaqarpunga angusaqarsimanata. Pissutsit taamaaginnarput, akuersaarneqarsinnaanngilarlu Danmarkimi naalakkersuisut suliami uani taama paamaartiginerat”.

 Múte B. Egede naapertorlugu misissuinerit taamaattut Danmarkimi erngerlutik unitsinneqartariaqarput, suliallu tamarmik taanna atorlugu aalajangikkat nalilersoqqinneqartariaqarlutik.

 Oqaatigineqarpoq Múte B. Egedep suliaq pillugu Danmarkimi ministeriuneq Mette Frederiksen ataatsimeeqatiserisimagaa. 

– Tallimanngormat kingullermi takuara. Pingajussaanik kissumiarsinnaavara, 38-nik ukiulik Keira Alexandra Kronvold panimminik Zammimik novembarip 7-ani inuusumik inunngornerata kingorna akunnerit marluk qaangiuttut arsaarneqartoq oqaluttuarpoq.

 Najornerani misigissutsunik takutseqqusaanngitsoq

Keira Ilulissat eqqaani nunaqarfimmit Qeqertameersuusoq panimminik arsaarneqaramili eqqartuussissuserisuni Stage Advokatfirmameersoq Jeanette Gjørret peqatigalugu Thisted Kommunemit akuerineqartumit ullut 14-ikkaarlugit akunnermit ataasiinnarmit sivisunerusumik najornissaanik ilungersuuteqarsimavoq.

 – Zammi Kalaallit Nunaat, qatanngutai angutaalu pillugit oqaluttuunniarsarisarpara. Kissumiarlugu sinittarpoq, takusinnaavarali kalaallisut oqaluffigigaanganni sinimminik qungujuttartoq. Akunneq ataaseq qaangiukkaangat angajoqqaarsiaanut tunniuteqqusarpaat. Najornerani misigissutsinik takutitseqqusaanngilanga, tunaartaasoq oqartarpoq. Aamma qiaqqusaanngilanga qungujulasariaqarlungalu nuannaartariaqarlunga. Ajornakusooqaaq. Maanna arsaarinnissutaaneraniit ullut 42 ingerlareersimapput, eqqarsaatigiuarparali, Keira januaarip 16-ani sulileqqittussaq oqarpoq.

 Oqaluffimmi tapersersuutaasumik oqaloqateqarneq

Keira Alexandra Kronvold qallunaamik tunaartaasumik tapersersorteqalersimavoq, Thisted Kommunemillu sapaatit akunneranut marloriartumik psykologimik kalaallimik oqaloqateqarsinnaatitaalluni, saniatigullu Thisted Kirkemi tapersersoqatigiilluni oqaloqateqarsinnaalluni.

 – Kiisami kalaallimik psokologeqalerpunga oqaloqatigisinnaasannik. Tamatuma saniatigut najukkanni oqaluffik atortarpara, tuppallersaasutut, ikiuutaasumik neriunnerullu aqqani. Angerlarsimaffinni Zammip siniffeerangua nakkuttarpara sulilu amusarissani nallungissamut atisaateqarlunga. Aammali imminut paarinerulersimavunga. Arpattarpunga, sapinngisannik sininneruniartarlunga nerilluarlungalu. Paniga paarisinnaaniarlugu. Tallimanngornerit allortarlugit najorsinnaatitaavara. Tallimanngornernilu najorsinnaatinnagu Eurofloristimit naasunik pajuttarpara. Aamma paninnut angajullermut Zoemut taamaaliortarpunga kommunimit arsaarneqarama. Kingorna oqaluttuuppaanga naasut saniminiittut sinittarsimalluni.

 Meeqqani pillugit naneruusertoq

Kalaallit Nunaanni Danmarkimilu suliaq pillugu annertuumik oqallinneq Keirap tuppalliutigeqaa.

– Angajoqqaarpassuit orniguttarput sassarlunga oqaluttuarsinnaagama qujaniarlutik. Suliaq uannuinnaq tunnganngilaq. Suliarpassuaqarpoq amerlavallaarujussuartunik, angajoqqaaqatikkalu oqarfigisarpakka ataatsimoortariaqartugut, angajoqqaarpassuillu kalaallit meeqqaminnik arsaarneqartut pillugit naneruummik ikitsilluta.

 Palasip suliaq aalassaatigaa

Thisted Kirkemi palasi Benne Holwerda Keira Alexandra Kronvoldimut suliami akuliussimavoq. Oktobarimi Thisted Kommunemi meeqqanut inuusuttunullu ataatsimiititaliami ilaasortanut allagaqarpoq, oqaluttuarluni takusimanerarlugu ”anaanaq nalinginnaasumik annertunermilluunniit silassorissuseqartoq meeqqani tigummiinnarniarlugu sunilluunniit iliuuseqaruttoq”. Benne Holwerda aamma Ankestyrelsenimut illersuisitut najuuppoq, ajoraluartumik suliaq Keiramut ima inerneqarluni, meeraata inungornerminiiit arsaarinnissutaanissaanik kommunip aalajangiinera atuutiinnartussatinneqarluni.

 – Aalajangiusimavara Keira kommunimit misigineqartutut allaanerusutut takugakku. Keira arlaleriartumik oqaloqatigisarpara, takusinnaavaralu anaanaq isumaginnilluartoq, aammali takusinnaallugu kultoorimit allameersuusoq. Aalassaatigeqaara kommunip meeraata inunngorneraniit arsaarinnisssutaatinniarnera tamannalu Ankestyrelsenimit atuuttussaatinneqarluni. Innarliineruvoq annertooq taamaallaat atorneqartariaqartoq meeqqap inuunerata peqqissusaatalu ulorianartorsiunnginnissaa anguniarlugu, uanilu suliami taamaaqqajanngilaq, Benne Holwerda oqarpoq.

 Anaanaasup paniatalu attaveqarnerat kipitinniarneqartoq

Keirap killilerujussuarmik panimminik najuisinnaanera pillugu palasi pukkitsormiunit kingoqqisuusoq oqarpoq:

 – Inuttut isumaqarpunga taama sivikitsigisumik najorsinnaanera tupinnaannartoq, eqqartuussissuserisuinilli tusaasinnaavara tamanna Danmarkimi nalinginnaasupilussuusoq. Soorunami pisut apeqqutaasarput, angajoqqaallu pineqartut meeqqap inuuneranik ulorianertorsiortitsisinnaasut pineqarput, taamaattumik suliat allaallutik. Matumanili misigisimavunga aallaqqaataaniit anaanaasup paniatalu attaveqatigiinnerat kipitinniarneqartoq. Isumaqarpunga taama annertutigisumik aalajangiineq tunngavissaqanngitsoq, tupigeqaaralu kommunip aalajangiinera Ankestyrelsenimit atuutiinnartussaatitaammat, Benne Holwerda oqarpoq.