Umiarsuarmi takornariartaammi tamanut ammasumik takuniaatitsinikkut isumaqatigiissut nalliuttorsiutigineqarpoq
Air Greenlandip Hurtigrutenillu 2025-mi ilaasunik 7.000-it missaanniittunik timmisartuussinissamik isumaqatigiissuteqarnerannut atatillugu, aaqqissuussami innuttaasut 80-it missaanniittut peqataapput.
Isumaqatigiissut naapertorlugu Hurtigrutenip umiarsuaani ilisimasassarsiorfiusuni marlunni, M/S Fridtjof Nansenimi aamma M/S Roald Amundsenimi, inuttanik ilaasunillu timmisartuussinissaq Air Greenlandip akisussaaffigissavaa.
Ulloq taanna pingasunngornermi juunip 19-ianni, Nuummi innuttaasunut soqutiginnittunut umiarsuarmut pulaarnissamut M/S Fridtjof Nansen ammatitsivoq. Tassani innuttaasut kinaassutsiminnik uppernarsaat atuuttoq takutillugu umiarsuarmut ilisimasassarsiorfimmut ikisinnaapput, umiarsuullu ilua misigisineqarsinnaavoq.
Atsioqatigiinnermi peqataasut arlallit oqalugiarput; ilaatigut Kommuneqarfik Sermersuumi borgmesteri Avaaraq S. Olsen (IA), Air Greenlandimi pisortaaneq Jacob Nitter Sørensen Hurtigrutenimilu pisortaaneq Daniel Skjeldam.
Tamanut ammasumik takuniaatitsinerup saniatigut aamma kulturikkut takutitsinerit ingerlanneqarput. Allaaserisap qulaani pingasunngormat pisunit assit takusinnaavatit.
