Umiarsuup kujataani kivinera Oceans North Kalaallit Nunaannut ernumatitsivoq

Oceans North Kalaallit Nunaannit Adolf Jensenip qanittukkut kivineratigut Nanortaliup imartaata qanittuani immap peqqissusaanut inuiaqatigiinnullu kinguneqapilussinnaanera aarleqqutigaa

AAMMA ATUARUK

Umiarsuaq kivisimasoq dieselimik 20.000 literit angullugit imalik

Qujamasuutigaarput, umiarsuarmiittut tamarmik ajunngimmata, aammalu ajoqusertoqarsimanngimmata, Jenseeraq Poulsen ONKN-ip pisortaa oqarpoq nangillunilu:

- Imaassinnaasorli suli sumiiffimmi immami avatangiisaanilu mingutsitsisoqarsinnaasoq, inuillu inuussutissarsiutaannik akornusiisoqartoq.

20.000 liiteri uulia

Umiarsuaq 30 meterinik takissuseqartoq ulloq septembarip ulluisa 19-anni ikkarlinnermi kingorna kivoq.

Politiit nalunaaruteqarnerattuut umiarsuaq uuliamik dieselimik 15-20.000 literimik umiarsuarmiittoqarpoq, aammalu motoorip uuliassaanik 1.000 literip missaniittumik aamma usilluni.

Upalungaarsimanissamik suliaqartut assiaqutinik puttasunik 25 meterisut takitigisumik ammalortunngorlugu umiarsuaq assersimavaat uuliakoortoqassagaluarpat uulia aniasoq siaruattaaliorlugu. 

Politiit kingorna uppernarsarpaat, umiarsuaq immap naqqanut kivisimasoq uuliamillu aniasoqartoq, kisianni suli ilisimanngilaat, uulia suminngaaneernersoq, imaluunnit qanoq annertutigisumik maqisimanersoq.

Uulia immami uumasunut arlalitsigut ajoqutaasinnaasoq, Ocean North Kalaallit Nunaat allappoq. Soorlu timmissat meqqui uuliatiterneqaraangamik meqquisa imermik pitarneqarsinaannginnerat katattarpoq. 

Immami miluumasut akornanni nannut aamma arferit soqqallit uuliamik maqisoqarnera peqqutigalugu sunnertianerpaasarput. Nannut amertik eqqiarniarlugu aluttortarpaat taamaasillutillu uuliamik iioraasarlutik. Arferit soqqallit aamma taamaasiortarput soqqatik uuliartaqaleraangata. Aalisakkat aamma toqqaannartumik sunnerneqarsinnaapput masimikkut erlavimmikkullu, imaluunniit toqqaannanngikkaluamik annikinnerusumik alliartornerannut imaluunniit kinguaassiorsinnaanerat ajoquserneqarsinnaalluni. 

Ocean North Kalaallit Nunaat naapertorlugu uulia immap naqqaniileruni, siunissaq sivisooq isigalugu ukiuni qulikkaani ajortumik sunniuteqarsinnaavoq, taamaattumillu aaliangiisuulluinnarpoq sukkasuumik iliuuseqarnissaq sapinngisamillu annertunerpaamik uuliakkoornermik saliinikkut.

-  Iluanaarpugut, pisoq taanna allanut naleqqiullugu annertuallaanngimmat, Jenseeraq Poulsen oqarpoq nangillunilu:

AAMMA ATUARUK

Oqartussat umiarsuup kivisimasup nalaani suli suliaqarput

-  Kisianni kalaallit qanoq annertutigisumik pinngortitamik isumalluuteqarnerat isigissagutsigu, taava sapinngisarput tamaat uuliakoortoqarsinnaanera annikinnerpaaffissaaniitinniartariaqarparput – maannakkut siunissamilu.

Piffissaq apeqqutaaginnalerpoq

Jenseeraq Poulsenip uparuarpaa, annertusiartuinnartumik umiarsuarnik kalaallit nunaata imartaani angallattoqarnera ilimanartoq piffissaq apeqqutaaginnalersoq ajornerusumik pisoqarsinnaaneranik.

- Immaqa piffissanngorpoq atortutigut pisinnaasarput uuliakoortoqarsinnaaneranut upalungaarsimaniarluni nunatta sineriaani annertusaanissarput, aammalu uuliakoornermik assersuisinnaaneq kiveqqasumillu atortunik sioqqanik kinnganernilluunniit milluuasinnaasunik atortorissaarutimik umiarsuaaqqamilluunniit, ROV-inik assingusunilluunniit, ajutoornerup annertussusia millisinniarlugu kiisalu sukkasuumik sunniuteqartumillu iliuuseqarsinnaaneq pilersinniarlugu, Jenseeraq Poulsen naggasiivoq.