Ajornartorsiutit
ilaat uisorernerinnakkut pinngortarput; allat ukiuni 60-70-ini
ilisimaneqarsimasarlutik.
1960-ikkunni
inunngortut ukiut qulit sioqqullugit kingornatigullu inunngortunit
marloriaammik amerlanerupput.
Ajornartorsiutit
ilaat uisorernerinnakkut pinngortarput; allat ukiuni 60-70-ini
ilisimaneqarsimasarlutik.
1960-ikkunni
inunngortut ukiut qulit sioqqullugit kingornatigullu inunngortunit
marloriaammik amerlanerupput.
1960-ikkunni inuusut amerlaqisut
utoqqalinersiaqarnissamut 67-inik ukioqalernissaat 2020-kkunni pisussaanera
naatsorsussagaanni kisitsillaqqissorsuusariaqanngilaq.
Ukiuni
makkunani utoqqaat amerleriapiloorsimapput 2026-mi amerlanerpaassallutik,
amerleriarneruvorlu 18-it 67-illu akornanni ukiullit sulisinnaasut
ikileriarnerat ilutigalugu.
Ukioqqortussutsip
ineriartornera ikinnerujussuit amerlanerujussuarnik pilersuisuunissaat
inuiaqatigiit aningaasaqarnerannut sequmissutaasinnaavoq. Taamaakkaluartoq
ukiuni aalajangersimasuni inunngorsimasut amerlaqisut soraarninngorniarlutik
suliunnaartut allaanngilaq naalakkersuinermik sulialinnik qoqassiisut.
Ukiorpassuarni
utoqqalinersianut aningaasartuutit missingersuusiornermi
ikinaarneqartarsimapput.
Ukioq
mannamut aningaasanut inatsimmi 2028-mi utoqqalinersianut 549 millionit
koruunit aningaasaliissutaassasut naatsorsuutigineqarpoq.
Aappaagumut
aningaasanut inatsisissatut siunnersuummi Aningaasaqarnermut
Akileraartarnermullu Naalakkersuisup Múte B. Egedep marlunngornermi
saqqummiussaani aningaasartuutit 2028-mi 635 millionit koruuninut
qaffanneqarsimapput.
Tassalu
tassanngaannaq 86 millionit koruuninik amerlineqarsimapput
utoqqalinersiaqalersussat amerlaqisut ukiorpassuarni ilisimaneqartut nunatta
karsianut ullumikkut kasuttortut kingunerisaanik.
Ukioq manna kontop imarisai amerlipiloortut
Múte B.
Egede nunatta karsia pineqartillugu mianersoqqusivoq, naalli annertuumik
sipaarniartoqaraluartoq 2026-mi utoqqalinersianut inatsisit naapertorlugit
aningaasartuutit 573 millionit koruuniniit 2029-mi 663 millionit koruuninut
qaffassimapput.
Aappaagumut
aningaasanut inatsisissaq naammassilluanngitsorluunniit qaffaaneq
atuutilereerpoq.
Ukioq manna
aningaasanut inatsimmut 482 millionit koruunit utoqqalinersianut
aningaasaliissutaapput, upernaarli paasinarsivoq konto taanna 60,9 millionit
koruuninik qaangerneqartoq.
Ukiuni
kingullerni utoqqarnut atatillugu iluarsiissutit utoqqalinersiaqartut
amerliartornerannut ilanngukkutsigit taava nunatta karsiata utoqqarnut
aningaasartuutai 2026-29-mut ukiuni sisamani 348 millionit koruuninik
qaffassimassapput. Taamaalillutik utoqqaat tassaalerput inatsisinik
tunngaveqarluni aningaasartuutit amerlinerisa 75 procenteraat, taamatullu
ineriartorneq annertuumik sivisuumillu nunatta karsianik tatisissaaq.
Tamatuma
saniatigut utoqqaat amerliartornerisa kingunerisaanik Namminersorlutik
Oqartussat kommunillu annertuumik utoqqaat isumagineqarnerannut
peqqinnissaqarfimmullu aningaasaliissapput, ilaatigut utoqqaat illuinut,
inissianut utoqqarnut tulluarsakkanut peqqinnissaqarnikkullu naammassisinnaasat
annertusillugit. Aningaasaliinerussaaq annertooq aningaasanik sulisussanillu
kinguneqartussaq, taakkuli ullumikkut ukiunilu aggersuni amigaatigineqassapput.
Múte ileqqorissaarnissamik kaammattuisoq
Naalakkersuisut
ajornartorsiuteqaleraangata avataaniit immikkut ilisimasalinnik aaqqiiniarput,
taakku soraarnerussutisiaqalernissamik iluarsaaqqinnissamik innersuussillutik
namminersortut pisortallu karsiisa iluini.
Suliaq ima
siusitsigisukkut naammassineqassaaq innersuussutit 2026-imi naalakkersuinikkut
naapeqatigiiffissatut tunngaviusinnaallutik.
Immikkulli
ilisimasallit avataaneersut pituttugaareersimapput, Naalakkersuisut
innersuussimmata naalakkersuinikkut naapeqatigiiffiusinnaanngitsunik.
– Taamaaliorpugut
pinngitsoortinniarlugu immikkut ilisimasallit siunnersuuteqarnissaat
utoqqalinersiat annertuumik ajorseriarnissaat, tamanna aningaasaqarnikkut
iliuusissatut silatusaarnerusinnaammat, Múte B. Egede nassuiaavoq.
Iliuuserineqassanngitsunut ilaavoq utoqqalinersiat annertuumik
ajorneruleriarnissaat.
– Tamanna
utoqqartatsinnut iliuuserisinnaanngilarput, Múte B. Egede oqarpoq.
Taarsiullugu
avataaniit isummersortitat soraarnerussutisinissamut nammineq ileqqaarnissaq
samminerussavaat.
Sulinermik
inuussutissarsiuteqartorpassuit isumaqatigiissummik iluani
soraarninngornissaminnut ileqqaartinneqartarput, inuppassuaqarporli
annikitsumik suliffeqarnermut pituttorsimasunik. 2018-imi pinngitsaaliilluni
soraarninngornissamut ileqqaartitsinissaq atuutilerpoq, sulili oqallisaaavoq -
naalakkersuinermik suiallit akornanni kiisalu inunni inatsimmi
ilaatinneqartuni. Avaqqunneqarsinnaanngilarli, nunatta karsiatami kisimi
utoqqalinersiat qaffannerat nammassinnaanngilaa. Taamaattumik immikkut ilisimasallit
soraarninngornissamut nammineerluni ileqqaarneq pingaartinnerussavaat,
taamaaliornikkut utoqqalinersiat isertitakinnerpaanut aningaasaliissutaallutik.
