ULLORMUT NALUNAARUSIAQ
Ikiaroornartoq hash allakkani nassiussani nassaarineqartoq — biili aallarussaq nassaarineqartoq
Ikiaroornartoq hash allakkatigut Nuummut nassiussaq pingasunngornermi nassaarineqarpoq.
Foto: Oscar Scott Carl
Akitsuuserisoqarfiup allakkat nassiunneqartut pisarnertut misissortillugit nassiussamik hashimik imalimmik nassaarsimasoq pigaartut pisortaat Aputsiaq Hansen ilisimatitsivoq.
Allakkat Nuummiit tikittut pineqarput, politiillu suliami pasisaqarput. Misissuineq eqqarsaatigalugu pigaartut pisortaata nassaarineqartoq pillugu maannakkut sukumiinerusumik oqaaseqarusunnani oqaatigaa.
Malersuineq pillugu suliaq sisamanngormat aamma aallartinneqartoq Aputsiaq Hansen nangilluni oqaluttuarpoq.
Suliami nalunaarutiginnittoq inummit nalunaarut naapertorlugu najukkamini, sumiiffinni tamanut ammasuni, inuit nittartakkatigut naapeqatigiittarfiini suliffimminilu malersorneqartutut misigivoq. Politiit suliaq maanna misissorpaat.
Biili aallarussaq nassaarineqartoq
Nuummi tillinniartoqarsimasoq, tassungalu atatillugu biilimik aallarussisoqarsimasoq politiit aamma pingasunngornermi ullaakkut nalunaarfigineqarput.
Tillinniartoqarneranik nalunaarut pingasunngornermi ullaakkut nalunaaqutaq 07.37 tiguneqarpoq, tillinniarnerlu angerlarsimaffimmi pivoq. Tillinniarnermi pinerlisut kinaassusersineqanngitsut biilinut matuersaatinik tillillutillu biilinik aallarussipput.
Biili pingasunngornermi kingusinnerusukkut nassaarineqarpoq.
Pigaartut pisortaata eqqaaneqareersut saniatigut imigassamut aalakoornartulimmut tunngasunik, soorllu angerlarsimaffimmi eqqissiviilliortitsinermik, aqqusinermi eqqissiviilliortitsinermik, nakuusernermik, aalakoortunik inunnillu kissaatigineqanngitsumik najuuttunik qimagutsitsinermik, suliarpassuaqartoqarnera nalunaarutigaa.
