Angajoqqaat suaaruteqartut: Meeqqanut paaqqinnittarfigut ajornartorsiorput

Angajoqqaat ilaasa meeqqani sulisussaaleqineq pissutigalugu sapaatip-akunneri tamaasa siusinnerusukkut aasariaqartarlugu oqarpoq.

Alla ukiut 15-it matuma siorna meeqqanik paaqqinnittarfimmut perorsaasunik sulisoqanngitsumut isersimalluni oqaluttuarpoq, tassanilu meeqqat eqqiaasumit paarineqarput - pisoq ajornartorsiutinik ullumikkut suli atuuttunik ersersitsisoq taanna isumaqarpoq.

Ilaqutariit sapaatip-akunneranut marloriarlutik meeqqaminnik aalliaartariaqartartut alla nassuiaavoq.

Angajjoqqaat meeqqerivimmiittuutillit isornartorsiuillutik oqaluttuassaat imaaginnavipput. Angajoqqaat ulluunerani paaqqinnittarfinni sulisut akisussaaffimmik tigusisut nersualaartarlugillu atugassarititaasut isornartorsiortarpaat.

Niels Peter Lange arfinilinnik ukiulimmik Nuummi meeqqerivimmiittuuteqarpoq. Ilaqutariit ernertik sulisussanik amigaateqarneq pissutigalugu sapaatip-akunneranut arlaleriarlutik siusissukkut aasarpaat, taanna oqaluttuarpoq.

- Akunnermusiaqartuugama soorunami akissarsiannut sunniuteqartarpoq, taanna oqarpoq.

Niels Peter Lange Sermitsiamit oqaloqatigigatsigu ilaqutariit ernertik sulisussaaleqineq pissutigalugu aajaarsinnaaneraat meeqqerivik ullaaq taanna aperisimavoq.

- Sulisariaqarama taamaaliorsinnaananga oqarpunga. Iliuusissaaleqisutut misigaanga, sulinngikkumali akissarsiassaqanngilanga, Niels Peter Lange oqarpoq.

Aamma sulisut pisuutinnagit erseqqissarpaa.

- Taakku pisuunngitsut nalunngilara. Ilungersortut qaangiuttoorlutillu sulisartut nalunngilara, Niels Peter Lange oqaluttuarpoq.

Aningaasaqarnermut sunniuteqartoq

Ullaat tamaasa meeqqerivimmi pissutsit qanoq innersut nalusarpaa. Sulisut ullumikkut naammappat?“ Meeqqerivik sulinermini sianissava? Nalorninermigut eqqissisimasumik sulinissani ajornakusoortittarpaa.

- Meerarput aagaangatsigu meeqqanut 15-inut sulisoq ataasiinnaakkajuttarpoq, taanna oqaluttuarpoq.

- Qanoq sulisussaaleqisoqartiginera angajoqqaajulluni annernarpoq. Ulapinnartorujussuuvoq. Qaammatit tamaasa akiliuteqartaraluarluni ima eqqarsarnarpoq: meerara toqqissisimava?, Niels Peter Lange oqarpoq.

Sapaatip-akunnerata ingerlanerani aalliaartarnerit ilaqutariit aningaasaqarnerannut ileqqaagaqarnerannullu sunniuteqartalersut taanna oqaluttuarpoq.

- Sapaatip-akunneri tamaasa aalliaartarnerput akissarsiassannik annaasaqaatigisarallu feeriarnissatsinnut ileqqaagaqarnitsinnut sunniuteqarpoq. Soorunami nuannersumik feeriarnissaq kissaatigineqarpoq, kisiannili angalanissamut akissaqarnerluta ernummatigaara. Qanoq tamanna piviusunngorsinnaassagami?, Niels Peter Lange oqarpoq.

Paarsinerusut

Ilaqutariit allat assannik amigaateqarnerup kingunerinik malugisaqarsimasut tassaapput Paninnguaq aamma Phillip Jacobsen, meeqqaminnik marlunnik Nuummi meeqqerivimmiittuutillit.

Ukioq Danmarkimit Kalaallit Nunaannut uteramik sulisussaaleqineq pillugu tusagaqarsimagamik piareersimasimapput, meeqqerivimmiittuuteqaleqqaarnertilli tupaallaatigaat.

Ullumikkulli meeqqerivik sulisullu nuannaralugit, aallaqqaammulli unammillernartoqarsimasoq naqissuserpaat.

- Inersimasut meeqqat ineriartornerallu maluginiartarpaat. Tamanna pitsaasorujussuuvoq, perorsaanermili ineriartortitsinissamut inissaqarpallaanngilaq. Paarsinerupput, Paninnguaq Jacobsen oqaluttuarpoq.

Assaat amigaataanerisa kinguneraat?

- Aap, taama isumaqarpunga, taanna oqarpoq.

Taakku assaat amigaataanerat meeqqeriviliaasseqqaarnermi ilaanni ersarissumik malugaat. Paninnguaq Jacobsenip ernini sarliaraa sulisup ilaata ernuttani meeqqerivimmi tassaniittarsimagaluartoq, qujanartumilli allamut nuussimasoq oqaluttuaraa.

- Tamanna paasillugu tupannarpoq. Qanoq iliussanerlunga naluara, Paninnguaq Jacobsen oqarpoq.

Toqqissisimaneq pineqartoq

Paninnguaq Jacobsenip taama misigisaqaraluarluni sulisut ajornartorsiutaanngitsut naqissuserpaa. Illuatungiatut ippoq.

- Sulisut pikkoreqaat. Meeqqat asalluinnarlugillu tamaasa ilassilluartarpaat. Atugassarititaasulli ajorluinnarput, taanna oqaluttuarpoq nangillunilu:

- Suliffik aallussilluarfigineqarsinnaavoq, ulluinnarnili akigitinneqartut taamaatsillugit aningaasarsiorniarluni arlalinnik suliffeqartariaqaraanni pitsaanerpaamik sulisoqarsinnaanngilaq. Qasulluinnartoqassaaq, Paninnguaq Jacobsen oqaluttuarpoq.

Paninnguaq Phillipilu assaat amigaataanerisa meeqqanut qanoq sunniuteqartarneranik arlalinnik assersuutissaqarput. Arlaleriarlutik meeqqatik siusissukkut aasariaqarsimavaat, kingullermillu ullaakkut arfineq-pingasunut meeqqerivimmukaassigaluaramik sulisut ilaat takkutinngitsoorsimapput.

- Sulisut aalajaakkaluaqisut assaat naammanngillat. Aanaa ikiuussinnaammat iluatsitsivugut, taanna nassuiaavoq.

Inuiaqatigiinni ajornartorsiut

Ajornartorsiut ilaqutariinnut ataqatigiissaarinermut aningaasaqarnermullu tunngaannanngilaq, aammali ulluinnarni toqqissisimanissamut tunngassuteqarpoq. Meeqqat sulisullu ajornartorsiummut ukiorpassuarni atuuttumut eqqugaanissaat angajoqqaat ernummatigaat. Tamatuma saniatigut inuiaqatigiit sulisunik pikkorissunik annaasaqassapput.

Anaanaasoq Sermitsiamut saaffiginnikkami meeqqani marluk meeqqerivimmut tunniussinnaannginnamigit angerlarsimaannartunngornissani eqqarsaatigalugu oqaluttuarpoq. Qaffasissumik kandidatitut ilinniagaqarlunilu ulluinnarni atuartitsisuuvoq.

Sulisussaaleqineq pillugu ernumanermi aalliaartarnermilu angajoqqaat amerlanerit paaqqinninnerinnaanngitsumik kissaateqarput. Meeqqerivinni pinnguarnissamut, pinngorartitsinissamut ineriartornissamullu piffissaqartoqaqqilernissaa kissaatigaat.

Niels Peter Lange aamma taama neriuuteqarpoq.

- Meeraq ajornanilu nerilluarsimasoq oqarfigineqartarpugut. Meeqqat titartaarsimanersut, assassorsimanersut ullorluunniit taanna aalajangersimasumik suliaqarsimanersut oqarfigineqarneq ajorpugut. Taamaallaat: meeraq nerillunilu ajunngilaq. Tassa, taanna oqarpoq.