ILINNIARNEQ
Nuunnissamut pilersaarutit suli paasissutissiissutigineqanngitsut
Imarsiornermik Ilinniarfik Issortarfimmut 5-imi ininiit attartukkaaniit ukiup naannginnerani nuuttussaavoq. Sumullu nuuttoqassanersoq suli nalunarpoq.
Naalakkersuisut init maanna atorneqartut ilinniartitsinermut pikkorissartitsinermullu naammagaat. Naalakkersuilli imarsiornermik ilinniagaqarneq pikkorissartitsiffiusinnaasullu ukiuni aggersuni ineriartortinnissaat periusissiarinikuuaat, taamaammallu init tulluarunnaartussaassallutik.
Assi: Oscar Scott Carl
Imarsiornermik Ilinniarfik ukiup naannginnerani Issortarfimmut 5-imi ininit attartukkaniit nuuttussaassaaq.
Attartornermut isumaqatigiissummi ukiumut 1,35 millionit koruunit akiliutigineqartartut taamaatinneqarput, Namminersorlutillu Oqartussat imarsiornermut aalisarnermullu ilinniarfissamik ujaasileruttorlutik.
Issortarfimmiittup attartornerata saniatigut ilinniarfik pikkorissartitsinernut Nuummi ininik allamiittunik namminersortuniit aamma attartortarpoq, taakkulu ukiumut 700.000 koruuningajannik akeqartarput. Tassa aningaasartuutit 2 millionit koruunit qaangerlugit amerlassuseqarput. Tamanna Naalakkersuisunut ilaasortap Nivi Olsenip (D) apeqqummut akissuteqaataani marsimi saqqummiunneqartumi atuarneqarsinnaavoq.
Ilinniartut ilinniartitsisullu ukiup naanerani sumut nuussanersut suli inissinneqanngilaq. Allaffimmi pisortap Vivi F. Brobergip Sermitsiamut uppernarsarpaa.
"Illumut ukiup naannginnerani allamut nuunnissarput siuartinneqarnikuunera ilumoorpoq. Sumulli nuunnissarput suli paasinngilarput. Aalajangerneqareerpat nalunaarutigiumaarparput", oqarpoq.
Atugassarititaasut ullutsinnut naleqqunnerusut
Demokraatit sinnerlugit Inatsisartunut ilaasortap Bo Martinsenip imarsiornermik ilinniarfimmi ilinniartunut ilinniartitsisunullu atugassarititaasut pillugit siunissamut pilersaarutit ilinniartitaanermut naalakkersuisumut Nivi Olsenimut marsimi apeqqutigai.
Namminersorlutik Oqartussat Imarsiornermik ilinniarfiup atugarisaasa piffissamut naleqquttut nutaaliaasullu imarsiornermik ilinniakkanik inerisaanissamut piffissamullu naleqquttunik sinaakkuteqarnissaannik qulakkeerinninnissaq siunertaralugu ujartuisut Nivi Olsen apeqqummut akissutigaa. Taamaalillunimi imarsiornerup iluani tunngaviusumik ilinniarnerit, soorlu naalagassatut ilinniarnerit, umiarsuup aquttuatut aamma ilinniarnerit allat tapersersorneqassallutik. Inuussutissarsiutigalugu aalisartunngornianiit aqumiunngornianut kiisalu qalorsualiornernik aalisariutip qaavani qalulerisunngorniarnermut. Aamma imarsiornermi tunngaviusumik ilinniakkap qaffasissusai 3-miit 1-mut kiisalu inersortaammi naalakkatut sætteskipperitullu.
Ilinniartitaanermut naalakkersuisoq Nivi Olsen Namminersorlutik Oqartussat Imarsiornermik Ilinniarfiup ineriartortinneqarnissaanut nutaaliaanerusumik, piffissamut naleqqunnerusumik aamma ilinniarfiup sinaakkutissaanik pitsaanerusunik ujartuisut akissummi allappoq.
Toqqorsivimmit: Leiff Josefsen
Ilinniartitaaneq pitsanngorsarneqarlunilu nutarterneqassaaq
Nivi Olsen init maanna atuuttut ilinniartitsinermut pikkorissartitsinermullu naammaginartut oqarpoq. Naalakkersuisut ukiuni aggersuni imarsiornermik ilinniagaqarneq pikkorissartitsinerlu ineriartortinneqarnissaannik periusissiaqarput, tassungalu atatillugu init maanna atuuttut atorlugit piviusunngortitsisoqarsinnaanani.
"Taamaattumik Naalakkersuisut tungaanniit nutaaliaanerusumik, piffissamut naleqqunnerusumik aamma ilinniarfiup sinaakkutissaannik pitsaanerunissaannik aqqutissiussisoqarusuppoq, sinaakkutit nunani allani imarsiornermik ilinniarfiit pitsaassusaannut assingusut atorneqalerpata ilinniarnerit qaffatsinneqarlutilllu nutarterneqarsinnaalissapput", Nivi Olsen akissummi allappoq, aamma naalakkersuisoqarfiup "nutaalianik piffissamullu naleqquttunik sinaakkuteqarnissaanik pisariaqartitsineranik naammassinnisinnaasumik massakkorpiaq suliariumannittussarsiukkaat" ilanngullugu paasissutissiissutigalugu.
Nutaamik sanaartorneq
Naalakkersuisut ilinniarfiup illutaanik piginnittuunissaq pitsaanerpaassasoq isumaqarput. 2023-mi isumassarsiami allassimavoq nutaamik illuliornissamut aningaasartuutit missingersuutigineqartut 132 millionit koruunit missaanniissasut, maannakkullu missingersuummi tamanna 151 millionit koruuninut qaffariarsimalluni.
Aammattaaq ilaatigut Sisimiuni Saviminilerinermik Ilinniarfiup sanaartorneqarneranut aningaasartuutit annertungaatsiarnerat eqqarsaatigalugu, “Namminersorlutik Oqartussat Imarsiornermik Ilinniarfiup illutaanik nutaanik piffissami qaninnermi sanaartortinneqarnissaat Naalakkersuisut naatsorsuutiginngilaat".
Taamaattumik Namminersorlutik Oqartussat illumik pioreersumik pisinissaat attartornissaalluunniit ilimagineqarsinnaavoq.
Imarsiornermik Ilinniarfiup sumiilernissaa paasiniarlugu Sermitsiap Ilinniartitaanermut Naalakkersuisoqarfik apeqquteqarfigaa, aviisilli suliarineqarnerata naammassinerani suli akissuteqarfigineqarani.
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
