Peqqinnissaqarfimmi sulisut paarlakaallutik suliartortarnissaat Danmarkimi immikkoortortaqarfimmut isumaqatigiissutigineqartoq
Isumaqatigiissut nutaaq pinasuagassanut, ernisunut tarnikkullu nappaatilinnut sullissinerup aalaakkaanerulernissaanik iluaqutaassaaq.
Isumaqatigiissut naapertorlugu nakorsanik, peqqissaasunik sulisunillu allanik atorfinitsitsisoqartassaaq, Nuummi Dronning Ingridip Napparsimmavissuani aamma sinerissami napparsimmavinni atuutissalluni.
Assi: Bo Amstrup/Ritzau Scanpix
Danmarkimilu nunap qitiusumik immikkoortortaqarfii peqqinnissaqarfimmi naammattunik sulisoqarnissap qulakkeernissaanut ikiuutissapput. Sulisut Danmarkimeersut paarlakaallutik nunatsinnut suliartortarnissaat isumaqatigiissutigineqarpoq.
Danmarkimi napparsimmavinni immikkoortortaqarfiit sorliit suliniummut ilaarusunnersut tullinnguullugu paasiniarneqassaaq. Napparsimmavimmi ernisussiortut, pinasuagassanik tarnikkullu nappaatilinnut sullissisut pineqarput.
Naalakkersuisut tusagassiuutitigut nalunaarummi allapput.
- Isumaqatigiissuteqartoqarnera nuannaarutigaara. Nunatsinni napparsimasunut patajaannerulersitsinissamik qulakkeerivoq tamatumalu peqatigisaanik ataavartitsinerulerneq piginnaasallillu amerlinerat pissutigalugit, sulinermi aqutsisunut sulisunullu pitsaanerusunik atugassiissalluni.
- Tamatuma peqatigisaanik aaqqissuussineq ilisimasanik misilittakkanillu, Danmarkimi nunatsinnilu sulisut akornanni inerisaanissamut paarlaasseqatigiinnissamullu periarfissiivoq. Tamanna ataatsimoornermik pilersitsivoq nutaanillu periarfissiilluni, peqqissutsimut inunnullu innarluutilinnut naalakkersuisoq Anna Wangenheim oqarpoq.
Nuna tamakkerlugu atuutissasoq
Nunatsinni peqqinnissaqarfiit sulisunik pisariaqartitsinertik namminneerlutik nalunaarutigisassavaat. Tamatuma kingorna Danmarkimi immikkoortortamit aaqqissuussinermi peqataasumit nunatsinni atorfik inuttalerneqartassalluni.
Qallunaat suliartorlutik tikittut Kalaallit Nunaanniit aningaasarsitinneqartassapput, paarlakaallunilu sulisutut naalagaaffimmiit tapisiaqassalluni.
Danmarkimi napparsimmaviit immikkoortortaanni aaqqisuusinermi peqataaneq nammineq piumassutsimik tunngaveqarpoq, sulisullu tamatumani peqataasut piffissaq isumaqatigiissutaasoq naappat Danmarkimi atorfimminnut utissapput.
- Aaqqissuussineq nunatsinni Peqqinnissaqarfiup Danmarkimilu Peqqinnissaqarfiup annertuumik tatigeqatigiinnerannut qanimullu suleqatigiinnerannut takutitsisuuvoq. Nunatsinni Peqqinnissaqarfimmik nukittorsaaqataarusuppugut, Danmarkimi nunap qitiusumik immikkoortuini sulisut inerisaaqataanissamut ataavartitseqataanissamullu periarfissinneqarnissaat nuannaarutigeqaara. Aaqqissuussineq aqqutigalugu Kalaallit Nunaanni innuttaasunut sunniuteqarnissarput neriuutigaarput, Danmarkimi nunap qitiusumik immikkoortuini siulittaasoq Mads Duedahl oqarpoq.
Danmarkimi atorfilinnik paarlakaalluni sulisoqarsinnaanermut siullermeerluni isumaqatigiissusiortoqanngilaq.
Aqqissuussami atorfinitsinneqartartussat tassaapput nakorsat, peqqissaasut allallu. Aaqqissuussineq Dronning Ingridip Napparsimmavissuanut sinerissamilu napparsimmavinnut atuutissaaq.
