SAS-ip taamaatitsiinnarnera Greenland Airportsimit uggorineqartoq
Greenland Airports naapertorlugu SAS-ip Nuummut timmisartuussisarunnaarluinnarnatik ilisimatitsissutigaa.
Greenland Airportsip Kalaallit Nunaannut niuernerup ineriartornissaa nunanilu tamalaani Kalaallit Nunaata ornigarneqarnissaanut soqutiginninneq suli upperilluinnarpaa, suliffeqarfiup niuernermut pisortaa SAS-ip Nuummut aasakkut timmisartuussisarunnaarneranut qisuariaateqarnermut atatillugu ilisimatitsivoq.
Toqqorsivimmit assi: Oscar Scott Carl
Pisisartut SAS-ip Nuummiit Københavnimut timmisartuussinissaanut bilitsisisimasut timmisartuussinissap taamaatiinnarneqarneranik ulluni makkunani nalunaarfigineqarput.
Greenland Airportsip SAS-illu Nuummut timmisartuussineq siulleq nalliuttorsiutigimmassuk qaammatit aqqanillit qaangiupput, taamaatitsiinnarnernillu nalunaarut SAS-imeersoq Greenland Airportsimi niuernermut pisortap René Von Ahm Laursenip aamma uggoraa:
“SAS-ip 2026-mi aasakkut Nuummut timmisartuussisarunnaarniarluni aalajangernera soorunami uggornarpoq,” niuernermut pisortaq Sermitsiamut allakkatigut akissuteqarluni oqarpoq.
Timmisartuussisarunnaavittoqanngitsoq
Ilaatigut ikummatissap akitsoraluttuinnarnera ilaasartullu ikilinerat pissutigalugit taama aalajangertoqartoq SAS-ip nammineq ilisimatitsissutigisimagaa pisortaasup innersuussutigaa:
„Timmisartortitseqatigiiffiit maanna nunanit tamalaanit timmisartuussiffigineqartarmata, taamaammallu aqqutit angallassisinnaanerlu allanngorartuaannartut paasilluarparput,“ René von Ahm Laursen oqarpoq.
Aqqut timmisartuussiffiujunnaavinngitsoq pisortap oqaatigaa:
“SAS pitsaasumik ineriartornartumillu oqaloqatigaarput, taakkualu aqqut timmisartuussiffiujunnaavinngitsoq Nuullu 2027-p tungaanut pilersaarutaasa suli ilagigaat ilisimatippaatigut.”
Naatsorsuutigisanik nikisitsinngitsoq
SAS aasakkut Nuummut Nuummillu sapaatip akunneranut pingasoriarluni timmisartuussisarnissaa pilersaarutaagaluarpoq, taamaatitsiinnarnerilli Greenland Airportsip ilaasunik angallassinerup ineriartornissaanut upperinnikkunnaassutiginngilaa:
„Greenland Airportsimiit angallannerup ineriartornissaanut naatsorsuuterput nikidinneqanngilaq, aamma Kalaallit Nunaannut niuernerup ineriartornissaa Kalaallit Nunaatalu nunanit tamalaaneersunit ornigarneqarsinnaasutut soqutigineqarnerulernera suli upperilluinnarparput,“ René Von Ahm Laursen oqarpoq.
Air Greenland immikkut timmisartuussisalissasoq
timmisartortitseqatigiiffiit allat aasaq manna Nuummi timmisartuussisalernissartik pilersaarutigigaat Greenland Airportsimit nuannaarutigineqartoq taanna allappoq.
SAS-ip timmisartuussinissaminik taamaatitsiinnarnera ingerlatseqatigiiffimmit malinnaavigineqartoq, Air Greenlandilu aasaanerani immikkut timmisartuussisalerniarluni pilersaaruteqartoq Greenland Airportsip sullitaasa annersaanni, Air Greenlandimi, piujuartitsinermut attaveqatigiinnermullu pisortap Inga Dora G. Markussenip uppernarsarpaa.
