KL

DK

Watson eqqartuussivimmi - misissuineq naammassineqarpoq

Paul Watsonip tigummigallarneqaannarnissaa unnerluussisussaatitaasut kissaatigaat. Kalaallit Nunaanni Politiit suliamik misissuinerat naammassisimasoq Eqqartuussinermi unnerluussisup oqaatigaa. Eqqartuussivik avatangiisinik illersuiniap tigummigallarneqarnissaanik sivitsuisoq illersuisut sakkortuumik isornartorsiorpaat.

Paul Watson pingasunngornermi eqqartuussivimmiissaaq, tigummigallarneqaannassanersorlu eqqartuussiviup aalajangerumaarpaa.
Jensine Berthelsen
Thomas Munk Veirum
Tusagassiortoq
Saqqummersinneqarpoq

Pingasunngornermi ullaap tungaani avatangiisinik illersuisuiniartup Paul Watsonip eqqartuunneqarneranik malinnaaniartunik Nunatsinni Eqqartuussiviup eqqartuussivia 1-i illersuisuinik ulikkaarpoq.

Sermitsiamit aamma pisimasoq nunanit tamalaanit maluginiarneqartoq malinnaaffigaarput.

Watsonip Japanimut tunniunneqarnissaa pillugu oqartussaasut aalajangernissaata tungaanut, Nuummi tigummigallarneqassanersoq eqqartuussiviup aalajangertussanngoqqippaa.

Taanna 2010-mi Japanimiunik arfannianik saassussisimasoq Japanimi oqartussaasut isumaqarput, pisimasullu malitsigisaanik nunani tamalaani avatangiisinik illersuiniamik tigusarinninnissamik Japan nalunaaruteqarpoq.

Sapaatip-akunneri pingasut tigummigallarneqarnissaa kissaataasoq

Eqqartuussineq nalunaaqutaq qulingiluanut aallartimmat unnerluussisussaatitaasoq oqarpoq tigummigallarneqarnera sapaatip-akunnerini pingasuni oktobarip 23-ata 24-ataluunniit tungaanut sivitsorneqartariaqartoq.

Unnerluussisussaatitaasut aamma ilisimatitsipput Paul Watson pillugu suliaq septembarip 29-ani politiit naammassigaat. Siusinnerusukkut ilisimatitsissutigineqarpoq politiit misissuinerat Danmarkimi inatsisinik atortitsinermut ministereqarfimmut ingerlateqqinneqartoq, taakkualu tunniussisoqarnissaa aalajangiiffigissavaat.

Inatsisinik atortitsinermut ministereqarfiup aalajangiinera Nunatsinni Eqqartuussivimmut suliassanngortinneqarsinnaavoq, tamatumalu kingorna Nunatta Eqqartuussisuuneqarfianut suliassanngortinneqarsinnaalluni.

Illersuisut: Tigummigallarneqarneq ullunit 14-init sivisunerutinneqartariaqanngitsoq

Eqqartuussissuserisoq Jonas Christoffersen illersuisutut tunngavilersuivoq Paul Watson iperagaasariaqartoq imaluunniit ullunit 14-init sivisunerusumik tigummigallarneqassanngitsoq. 

Japanimiup arfanniap 2010-mi pisumut atatillugu ajoqusersimanera pillugu uppernarsaatinik amerlanerusunik pissarsiumallutik illersuisut aamma piumasaqarput.

Illersuisut uppernarsaatit saqqummiutitikkusuppaat, unnerluussisussaatitaasulli itigartitsipput.

Peqqarniissusaa apeqquserneqartoq

Aamma arfanniap ajoquserneqarsimanera illersuisut apeqquserpaat.

Watsonip pinerlunnerata peqqarniissusaa aaqqissuussaasumik pinerlunnerusoq ukiullu ataatsip tungaanut pineqaatissinneqarnermik kinguneqarsinnaasoq, unnerluussisussaatitaasoq oqarpoq.

Watson Japanimiunut arfanniartunut butansyremik miloriussisimasutut unnerluutigineqarpoq, taamaaliornermigullu inuk ataaseq ajoquserpaa.

- Piaaraluni tamakkuninnga milorujussisoqarpoq, taamaattumik inunnik ajoqusiiniarluni milorujussisoqarpoq, eqqartuussivimmi unnerluussisussaatitaasoq Mariam Khalil oqarpoq.

Illersuisut uppernarsaatinik amerlanerusunik saqqummiussinissamut akueriniarneqaraluarput, tamannali eqqartuussisumit itigartinneqarpoq.

Eqqartuussivimmik isornartorsiuingaatsiartut

Inatsisinik atortitsinermut ministereqarfiup tunniussinissaq pillugu aalajangiinissaata tungaanut Paul Watsonip tigummigallarneqarnissaa unnerluussisussaatitaasut aalajangiusimavaat, siornatigummi tunniussinissamik qinnuteqaat suliarineqartillugu Watson Tysklandimit qimaasimavoq.

Watsonilli taama sivisutigisumik tigummigallarneqarnera pinerlussimaneranut naleqquttuunersoq illersuisut suli apeqquserpaat. Illersuisoq naapertorlugu arfanniaq ulussamigut taamaallaat pullaqisimavoq.

„Suliaq soqutaanngitsoq“ ukiut 14-it sinnerlugit matuma siorna pisimasoq pissutigalugu tigummigallarneqartuaanissamik Nunatsinni Eqqartuussivik akuerisinnissimasoq, ataatsimut isigalugu illersuisut apeqquserpaat.

Eqqartuussivimmi illersuisup sakkortuumik oqaaseqarnermini ilaatigut aaqqissuussaaneq sunniutikitsuunerarpaa.

Eqqartuussinermi aamma Paul Watson oqaaseqarpoq:

- Uanga kannguttaatsuliortuunangalu pinerluttuunngilanga — Japanimi inuiaqatigiit nunat tamalaat isumaqatigiissutaannik IWC-mik il.il. unioqqutitsiuartut pinerluttuupput, Watson oqarpoq, taassumalu aamma Japan Danmarkilu „ataatsimoornerarlugit“ unnerluutigai.

Eqqartuussisoq itigartitsivoq tigummigallarneqarnissaanillu sivitsuilluni

Illersuisulli tunngavilersuutaat eqqartuussisup itigartippai Watsonimullu unnerluussutit ukiumi ataatsimi pineqaatissinneqarnermik kinguneqarsinnaasut isumaqataanerarluni.

Taamaattumik tigummigallarneqarnera oktobarip 23-ata tungaanut sivitsorneqartoq, eqqartuussisoq pingasunngornermi ullaap tungaani nalunaaqutaq qulinngulersoq nalunaarpoq.

Illersuisut aalajangiineq Nunatta Eqqartuussisuuneqarfianut suliareqqitassanngortinniarpaat.

samfund paul watson udlevering til japan nuuk miljøaktivisme inuiaqatigiit international arrestordre retten i grønland

ATORFIIT Se alle jobs

Powered by Labrador CMS