Watson pillugu suliaq Højesteretimi misilinneqassaaq
Paul Watsonip tigummigallarneqarnera pingasunngornermut oktobarip 23-at ilanngullugu sivitsorneqaqqammertoq, taanna illersuisuilu suliap Højesteretimut ingerlateqqinneqarsinnaanngornerani tusarlerneqarput.
Paul Watsonip illersuisui, Jonas Christoffersen, Finn Meinel aamma Julie Stage Kalaallit Nunaanni eqqartuussiveqarnermut sakkortuumik isornartorsiuipput, taakkulu suliaq pillugu naalagaaffimmi eqqartuussiviit qullersaanni saqqummiussinissaminnut akuerineqarput. - Suliaq aallartimmalli tigummigallagaanissaanut tunngavilersuutigineqartut apeqqusersuinnaavinnikuuagut. Isumaqarpugut suliaq pisoqalinikuusoq, taamaattumik Kalaallit Nunaanni eqqartuussivimmi suliassanngortinneqartariaqanngikkaluartorluunniit, eqqartuussissuserisoq Finn Meinel eqqartuussivimmi aalajangernerup kingorna oqarpoq.
Assiliisoq: Leiff Josefsen
Maanna qaammatit pingajussaat aallartissimalereerpoq, Paul Watson Juulip 21-anni, 2024-mi tigusarineqarmalli. Tigusarineqaqqammiinnarlunili tigummigallarneqalernikuuvoq, ullumilu Kalaallit Nunaanni Eqqartuussivik aalajangerpoq unnerluussisussaatitaasut kissaataat malillugu tigummigallarnerup sivitsorneqarnissaa akueralugu.
Paul Watson-ip illersuisui sivitsuinermut isumaqataanngillat, taakkulu isumaqarput eqqunngitsumik naapertuilluanngitsumillu pisoqartoq, piffissap tigummigallagaaneranut unnerluussissutaasumut sanilliullugu.
Eqqartuussissuserisoq Finn Meinel, Paul Watson-ip illersuisuini ilaasoq, eqqartuussivimmi aalajangertoqaqqammiinnartoq Sermitsiamut oqarpoq:
- Tassa imaappoq, suliaq nutaarluinnaagaluarpat unnerluussissutigineqartorlu saqqummiunneqaraluarpat, pineqaatissinneqarsinnaaneranut sanilliullugu tigummigallagaanera sivisuallaarujussuarpoq, taamaammat pisoq naapertuilluarnerunngilaq. Tamatuma saniatigut, pisoq pisoqalinikuuvoq, taamaammallu unnerluutigineqartussaanngikkaluarpoq.
Suliaq Højesteretimut anngunneqassaaq
Paul Watsonip illersuisui taamak tunngavilersuuteqarlutik noqqaassuteqarput suliap eqqartuussivimmi qullasinnerusumi misilinneqarnissaa akuerineqaqqullugu, taamaalillutillu Naalagaaffimmi eqqartuussiviit qullersaannut Højesteretimut ingerlanneqaqqullugu:
- Ullumikkut nalunaarfigineqarpugut eqqartuussiviit qullersaannut suliassamik saqqummiussisinnaanermut akuersissummik pissarsisimalluta, taamaalilluni eqqartuussiviit qullersaanni suliarineqartussanngorpoq.
- Qaqugu pissanersoq suli ulluliisoqanngilaq, kisianni periarfissaq atorlugu soorunami uppernarsaatinik saqqummiussisinaatitaasussaagaluarnerput naqissuserneqaqquarput aammalu suliaq pillugu uagut tungitsinniit qanoq nalilerneripput saqqummiussinnaatitaasussaagaluaripput, taamaalillunimi ersersinneqartussaagaluarmat, aamma Kalaallit Nunaanni Eqqartuussivinnut, aniguisinneqarnissaa qangali pisussaagaluartoq, Finn Meinel oqarpoq.
