Grønlandsbankenimi siuariarneq 

Grønlandsbankenip kvartalit pingajuanni ukiup siulianut sanilliullugu, nalunaarusiaa siuariarnermik inerneqartoq saqqummiunneqarpoq.

Akileraarutit sioqqullugit angusat 143,9 million koruuniupput siorna piffissami tamatumani, 132,5 million koruuniullutik. Aningaaserivik tusagassiutitigut nalunaarummi ilisimatitsivoq.

Atuisartut atuinerulernerannik aningaaseriviullu isertitaasa aningaasartuutaalu ilimagisamit pitsaanerusumik ineriartornerannik, aningaaserivik naapertorlugu, siuariarneq ilaatigut pissuteqarpoq.

–Inernerusut tulluusimaarutigisorujussuuagut. Tamatuma takutippaa sullitatta inuinnaat aamma inuussutissarsiornermi sullitatta akornanni ingerlatsineq annertunerusoq kiisalu takutillugu, ineqarnermut, suliffeqarfinnut aamma periarfissanut nutaanut suli aningaasaleerusuttoqarnera, aningaaseriviup pisortaa Martin Kviesgaard oqarpoq.

Naliliineq: Atuineq annertusiartorpoq

Aningaaseriviup paasissutissiissutigaa taarsigassarsiat qularnaveeqqutillu ukiup nikinneraniilli, 204 million koruuninik amerleriartut, kvartalillu pingajuanni 6,4 milliard koruuniusut.

Aningaaseriviup naatsorsuutigaa aningaasanik taarsigassarsisitsisarnerit amerliartuinnassasut:

- Sullitat ineqarnermut, suliffeqarfimmut imaluunniit suliniutinut allanut aningaasaliigaangata, tamanna pitsaasumik ineriartornermut takussutissaasarpoq Martin Kviesgaard oqarpoq nangillunilu:

– Kalaalit Nunaanni pissanganartorujussuarmik ukioq manna ineriartortoqarpoq, pingaartumik Kujataani aamma Ilulissani, Kalaallit Nunaannut ineriartortitseqataasinnaasumik, annertuumik ineriartortoqarnera takuneqarsinnaavoq. Taamaattumik aamma nuannaarutigaarput, ineriartornerup aningaasalersorneqarnissaanut aningaaserivittut nukittuumik unammillersinnaalluta inissisimagatta, Martin Kviesgaard oqarpoq.

Grønlandsbankenip juulip 20-ani 2026-mi ukiumut akileraarutit suli ilanngaatiginagit angusat naatsorsuutigisani 195 aamma 220 mio. koruunit akornanniilersippai.