Aningaasaliisarfik kujataani aatsitassarsiornissamut suliniummut taarsigassarsititsisoq
Danmarkimi Eksport- og Investeringsfond GreenRocimut 5,2 millionit euronik taarsigassarsititsivoq. Aningaasat malmimik misissuinernut annertuunut, qillerinernut allanullu aatsitassarsiorfimmik ineriartortitsinermut attuumassuteqartunut ilaatigut atorneqassapput.
EIFO-mi GreenRoc-imilu sinniisut piiaaffiup Amitsup isaariaata silataani. Taanna piiaaffimmut isertarfiuvoq, tassani qimuttuitsut qanga aqqutaat suli takuneqarsinnaapput, Eksport- og Investeringsfonden allappoq. Saamerlermiit: EIFO-meersut Anders Knak Sørensen, Christopher Østergaard Mortensen Jens Hestbechilu aamma GreenRocimi pisortaq ESG-p ataatsimiititaliaani siulittaasoq Lars Brünner kiisalu GreenRocimi pisortaaneq Stefan Bernstein.
Assi: EIFO
GreenRoc Strategic Materials 5,2 millionit euronik, tassa 39 millionit koruunit missaannik, aningaasaliiffigineqarpoq. Aningaasat taakku suliffeqarfiup Amitsumi grafitimik piiaanissamik anguniagaqarneranut iluaqutaassapput.
Aningaasaliisarfik Danmarks Eksport- og Investeringsfond (EIFO) tusagassiuutitigut taama nalunaaruteqarpoq.
EIFO-p GreenRocip sulineranut tapersersuinissaa naleqquttoq taarsigassiinermut tunngavilersuutigineqarpoq, tassami tamanna Europami mingutsitsinngitsumik ingerlatsilernissamut aamma Europami illersornissaq pillugu suliffissuaqarnermut atortussanik pisariaqartinneqartunik pilersuinermik pitsanngorsaataasinnaammat.
Europami pilersuinerup isumannaatsuunissaanik qulakkeerinissaq
EIFO-mi niuernermut pisortaq Peter Boeskov oqarpoq:
- Suliniut EIFO-p Kalaallit Nunaanni inuussutissarsiornikkut suliniutinut piujuartitsisunut pingaaruteqartunut aningaasaliinissamik, tamatumalu saniatigut Europami aatsitassanik qaqutigoortunik pilersuinerup isumannaatsuuneranik pitsanngorsaanissamut, anguniagaanut naapertuulluinnarpoq.
- Aamma mingutsitsinngitsumik ineriartortitsinissaq siuarsarniarlugu suliniuteqarpugut, tamannalu aatsitassanik qaqutigoortunik soorlu grafitimik pilersuinerup patajaatsup isumannaatsumillu pisariaqartitsiffiuvoq, Peter Boeskov oqarpoq.
Anguniakkamut iluaqutaasoq
Aatsitassarsiornissaq suli aallartisarfimmiippoq. Grafiti Amitsuumeersut puussiat 30-35-t nunanut allanut laboratoriamut misissugassanngorlugu nassiunneqartoq Sermitsiami sapaatip-akunnerani kingullermi allaaserineqarpoq.
Aningaasat aatsitassarsiorfiup ineriartortinneqarnerani alloriarnernut tulliuttunut, ilaatigut malmimik annertunerusumik misissugassamik piaanissamut, qillerinermut piiaaffimmillu ineriartortitsinermut attuumassuteqartunik allanik suliaqarnermut, atorneqassasuq, EIFO-mit paasissutissiissutigineqarpoq.
Anigaasat Amitsumi grafitimik akuiaaffimmik misiliummik pilersitsinissamut aamma atorneqarsinnaapput.
Siulersuisuni siulittaasoq: Uppernarsaataavoq
GreenRocimi siulersuisuni siulittaasup EIFO-mik taarsigassarsinissamut isumaqatigiissut nuannaarutigaa:
- Grafitimik, teknikkikkut pitsaasunik atortulersuutinik pilersitsinissamut, piumaneqarluartunik Europami tunisassiulernissamik pilersaarutitta piviusunngortinnissaanut, siunissaq ungasinnerusoq eqqarsaatigalugu aningaasaliiffigineqarnissamik periarfissanik pilersitsivoq.
- Tamanna aamma Amitsumi suliniuterput pitsaalluinnarneranik uppernarsaataavoq, aamma Europami grafitimik anodenik akulinnik tunisassiorfimmik pilersitsinissamik anguniagatsinnut uppernarsaataavoq. EIFO-mik suleqatigiilluarnissaq angusaqarluarnissarlu qilanaaraarput, Greenrocimi siulersuisuini siulittaasoq George Frangeskides oqarpoq.
