Grønlandsbanken ukioq manna 193,4 millionit koruuninik isertitaqarpoq
Ukioq manna qaammatini qulingiluani siullerni Grønlandsbanken akileraarutit suli ilanngaatiginagit 193,6 millionit koruuninik sinneqartooruteqarpoq, tamannalu 2023-mi piffissami tamatumani 170,8 millionit koruuninit qaffariarneruvoq.
Assiliisoq: Grønlandsbanken
Aningaaseriviup pisortaata Martin Kviesgaardip angusat nuannaarutigai, nassuiarpaalu angusat aningaasat nalingata pitsaasumik nalimmassarneqarneranik aningaaseriviullu taarsigassarsisitsisarneranik annertuumik attassiuarneranik ersersitsisut:
- Unammillersinnaassutsikkut taama inissisimalluartiginerput pitsaalluinnarpoq, aamma suleqaterpassuavut ulapaavissornikuupput, tusagassiuutinut nalunaarummi Martin Kviesgaard taama oqaaseqarpoq.
Ilanngullugu oqaatigaa erniat qaffasinnerusut ukioq manna taarsigassarsiniartarnermut unikaallatsitsisimasut, sullitarpassuillu ukiumi immikkoortumi siullermi nutaanik aningaasaliinissamut atatillugu utaqqigallarsimapput.
Aningaaserivik ukiup kingulliup ingerlanerani taarsigassarsiarisani 7 %-imik aamma aningaaserivimmiittuutini 10 %-imik siuariarnermik misigisaqarsimasoq, aningaaserivik ilisimatitsivoq.
Aningaaseriviup aningaasartuutai tamarmiusut nalikilliliinerit ilanngullugit kvartalit pingajuanit 173,7 millionit koruuniupput, ukiumut kingullermut sanilliullugu 160,2 millionit koruuniusunit qaffariarsimallutik:
- Ilinniarnermut aamma sulisunut amerlanerusunut annertuumik aningaasaliinikuuvugut. Peqatigitillugu IT-mut aningaasartuutit qaffakkiartorput, tamanna digitalikkut siuariartuinnarnissaq qulakkeerniarlugu pingaaruteqarpoq, Martin Kviesgaard nassuiaavoq.
Ukiumut tamarmut GrønlandsBANKEN-ip 225-250 millionit koruunit missaanni suli akileraruteqarnani inernerusumik angusaqarnissaminik naatsorsuuteqarnini attatiinnarpaa.
