Podcasti tamakkiisoq ataani tusarnaarsinnaavat.
Seqinnarisseruttoraa Nuup Kangerluani sikualuit
iluliusallu sarfaatserujoorput, Nuuk alianaannerusinnaanngilaq.
Podcasti tamakkiisoq ataani tusarnaarsinnaavat.
Seqinnarisseruttoraa Nuup Kangerluani sikualuit
iluliusallu sarfaatserujoorput, Nuuk alianaannerusinnaanngilaq.
Illoqarfiup
mittarfittaavata, aamma nunanit tamalaanit miffigineqarsinnaasup
eqqaaniippugut. Mittarfissuaq nunatta oqaluttuarisaanerani sanaartukkat
annersaannut ilaasoq sinerlugu Air Greenlandip pisortaanera Jacob Nitter Sørensen pisuttuaqatigaarput. Mittarfik ukiup affaa atuutereersoq
aallartilluarpallaanngilaq. Kinguaattoornerit, uiverneq isornartorsiutillu
qaammatit kingulliit takussaajuarsimapput.
- Ilungersunarpoq. Nalunngilarami
ilaasorisartakkatsinnut sulisunullu qanoq kinguneqartarnersoq, timmisartuutileqatigiit
pisortaat taama oqarpoq.
Tuukkaq taamaatiinnaraangat 2,5 mio.
koruunit tungaanut akeqartarpoq
Jacob Nitter Sørensen ulloq taanna
pisuttuaqatigigatsigu silageqimmat Tuukkaq ajornaquteqanngitsumik mippoq. Siulianili
taamaattuaannanngilaq. Imarpik qulaallugu timmisartuussinerit katillugit 32-t ukioq
manna taamaatiinnarneqanngikkunik utiinnartariaqartarput. Taama pisoqartillugu
timmisartuutileqatigiinnut miliuuninik arlalinnik naleqarsinnaasarpoq.
- Tuukkap angalanissaa
taamaatiinnarneqartillugu utiinnartariaqalersilluguluunniit 1 miliuunit koruuniniit
2,5 miliuunit koruunit tungaanut akeqartarpoq, Jacob Nitter Sørensen oqarpoq.
Taassuma erseqqissaatigaa, Nuummiinnaanngitsoq,
nunarput tamakkerlugu siornatigorniit ukioq manna silarlunnerungaatsiarsimasoq.
- Ulluni Tuukkaq missinnaanngitsillugu Dash 8-t
missinnaaneq ajorput. Nuummiinnaanngitsoq, aamma assersuutigalugu Ilulissani
Sisimiunilu. Taamaammat Tuukkaq kisiat pisuutissallugu ajornanngippallaaqaaq,
pisortaq oqarpoq.
Jacob Nitter Sørensenip Nuup mittarfiata eqqaani pisuttuaqatiginerani Tuukkaq mippoq.
Assiliisoq: Oscar Scott Carl
“Kikkut tamarmik kingulliunneqarsorisarput”
Atlantiku qulaallugu timmisartuussinerit
taamaatitsiinnarnernit kisimik eqqugaasaqattaanngillat. Avannaani qulimiguullit
teknikkikkut ajoquteqarnerat peqqutigalugu ilaasussat qaammat ataaseq tikillugu
ilaanni kinguaattoortarput. Kinguaattoortoqartillugulu arajutsisassaasanngilaq.
- Saaffiginninnerit imaaginnalivittarput.
Ilaasalu avannaani, kangiani kujataanilu immikkut ittumik timmisartuussisoqarnissaa
kissaatigisarpaat. Sapinngisarput tamaat sullinniartarpagut, kikkulli tamarmik
kingulliunneqarsorisarput, Jacob Nitter Sørensen oqarpoq.
Naammagittaalliornerit
inoqatinut attaveqatigiittarfinni, soorlu Facebookimi takussaasorujussuusarput.
Taakkuli timmisartuutileqatigiit pisortaata sakkortuumik tigusanngilai.
– Inoqatinut
attaveqaatit ullutsinni taamaapput. Siullertut taanna eqqarsaatigisarpara. Pissanganartoqartarpoq,
ingattarsertoqarluni assigisaanillu pisoqartarluni. Inuit qanorluunniit tamakkuninnga
allaaserisaqartarput. Eqqaamassavarpullu siornatigut Kangerlussuarmi
timersortarfimmi unnuisoqartarallarmat, imaluunniit unnuiffissaaruttoqartarallarmat
tamakkua aamma takussaasarmata, Jacob Nitter Sørensen oqarpoq.
Naammagittaalliuutit ilaat
ilinniutigisarpaat
Naammagittaalliuutilli
ilaat qaangiinnagassaaneq ajorput. Avannaani siorna 2024-mi pisimasoq
pisortaanerup puiguikkiussaanut ilaavoq.
– Eqqaamanerpaasama
ilaat avannaani siorna pisimasuuvoq. Taamani aamma silarloqattaarpoq. Nuissat
atsipput pujorlunilu. Ullorpassuit angallassinngilagut. Aalajangerpugullu imaatigut
angallassisussanik attartussalluta.
Aaqqiissutissatulli
takorluugaat ilimaginngisamik pisoqarfiuvoq.
– Assut
iluatsitsinerliorsimapput. Silarlullunilu angallat arlaatigut ajoquteqalersimammat
ilaasut toqqissisimasimanngillat. Qujanartumilli apuuffissaminnut apississimapput.
Sullitattali ilaat kingorna sianerpoq pisorlu oqaluttuaralugu.
Sila peqqutigalugu
silaannakkut angallanneq periarfissaajunnaartillugu, imaatigut angallassinissamik
aalajangiussisoqannginneran periutsit pisup kingorna sukaterneqarsimasut Air
Greenlandip pisortaanerata oqaluttuaraa.
– Ilaanni immaqa suna
tamaat angullugu aaqqiiniarsarivallaartarpugut. Taamaammat angallatinik attartortarnermut
periutsigut sukaterpagut.
Podcasti tamakkiisoq
ataani tusarnaaruk. Tassani Jacob Nitter Sørensenip timmisartortartumiit
pisortaanermut ikaarsaarnini, billetit akitsortussannngorneri siunissarlu
pillugu takorluukkani ilaatigut eqqartorpai. Podcastimi qallunaatuujuvoq.
