KNAPK peqquserluttuliornermi suliami: Aningaasat millionillit Hongkongimut pipput
Aalisartut piniartullu kattuffiat KNAPK aningaasatigut ajornartorsiorpoq, tamannalu ilaatigut peqquserluttoqarneranik pissuteqarpoq, tassani aningaasat inatsisinik unioqqutitsilluni nunatsinni aningaaserivimmi kontomit Hong Kongimut nuunneqarsimammata.
KNAPK-p ukiumut 400.000 koruuninik annaasaqartarsimaneranik peqquserlunneq kinguneqarsimasoq, KNAPK-p siulittaasua Nikkulaat Jeremiassen nassuiaavoq.
Leiff Josefsen
Suliniaqatigiiffiit marluk, Amerikami avannarlermi Atlantic Salmon Federation (ASF) Islandimilu North Atlantic Salmon Fund (NASF), 2019-imi aningaasanik millionilinnik aningaaserivimmi kontumut aalisartut piniartullu kattuffiata KNAPK-p aamma iserfigisinnaasaanut ikisisimapput. KNAPK-p siulittaasua naapertorlugu aningaasat 1.050.000 koruunit pineqarput.
Aningaasat taakku kapisilinnik illersuinermut ukiuni aqqaneq-marlunni atuuttussamik isumaqatigiissummut ASF-ip, NASF-ip KNAPK-llu 2018-imi atsioqatigiissutaannut ilaapput. 1993-milli pingajussaa isumaqatigiissuteqartoqarpoq.
- Isumaqatigiissummi Kalaallit Nunaata aalisarsinnaatitaanera nunarsuarmilu kapisilinnik illersuinissaq akuerineqarput. 2020-miilli akiliisimanngilagut isumaqatigiinniartut (ASF, NASF aamma KNAPK) piumasaqaatinik isumaqatigiissuteqarsinnaasimanngimmata. Piumasaqaatit isumaqatigiissutigineqareerpata malinneqarlutillu aatsaat akiliisoqarsinnaavoq, Bill Taylor, ASF-imi immikkut siunnersorti, aamma Fridleifur Gudmundsson, NASF-imi siulittaasoq, ataatsimut nalunaarummi Sermitsiamut nassiunneqartumi nassuiaapput.
Sermitsiami allaaserisami KNAPK-p siulittaasuata Nikkulaat Jeremiassenip KNAPK-p aningaasaqarnikkut ajornartorsiorneranut pissutaasoq pillugu immikkoortortaqarfinnut nassuiaatigisaa, aamma kapisilinnik isumaqatigiissutip unittooqqasup eqqaaneqarnera, suliniaqatigiiffiit taakku marluk oqaaseqarfigerusuppaat.
Bill Taylor aamma Fridleifur Gudmundsson ima allapput:
- Kapisilinnik aningaasaateqarfimmit aningaasat tammarsimasut allaaserisami eqqaaneqarpoq. Isumaqatigiissut atsiorneqareermat ASF-ip NASF-illu aningaasat ASF-ip, NASK-p KNAPK-llu ataatsimut Kalaallit Nunaanni kontoannut nuussimavaat. Aningaasat taakku isumaqatigiissummut pisussaaffeqarnitsinnut uppernarsaataapput. Aningaasat isumaqatigiissutip atuunnerani KNAPK-mut piffissap ilaani tunniunneqartarput.
Politiinut nalunaarutiginnittoqarpoq
Nangillutik allapput:
- 2019-imi aningaasat Kalaallit Nunaanni aningaaserivimmi kontomiittut tammarput, tamanna unioqqutitsilluni allap qarasaasiaanut pulanikkut peqquserlunnikkulluunniit pisimassagunarpoq. Paasigatsigu ASF-ip NASF-illu tamanna Kalaallit Nunaanni Hongkongimilu politiinut nalunaarutigaat, aningaasallu nassiunneqarsimasut tassani allattugaatit takutippaat. Kingorna aningaasat nassaarineqarsimanngillat.
KNAPK-mi aningaasatigut peqquserluttoqarnersoq januaarimiilli KNAPK-mi siulersuisut eqqartuussissuserisut suliffeqarfiannik misissuititsipput, tamanna Sermitsiami juulip 26-ani allaaserineqarpoq.
- Misissuinerusoqaqqinnissaa qilanaaraarput, Bill Taylor aamma Fridleifur Gudmundsson oqarput, erseqqissarlugulu:
Kapisilinnik illersuineq
- Aamma Kalaallit Nunaanni kapisilinnik uumasunillu illersuinissarput, ilaatigut ukiorpassuarni suleqatigisatsinnik KNAPK-mik suleqateqarneq pisussaaffigaarput.
Kapisilinniarneq pillugu isumaqatigiissut naapertorlugu KNAPK ukiumut 400.000 koruuninik isertitaqartassasoq, KNAPK-p siulittaasua immikkoortortaqarfinnut nalunaarummi allappoq.
