Maanna taxat pillugit isumaqatigiinngissut nutaamik malittarisassaqalernikkut aaqqinneqassaaq
Taxartarnermut malittarisassat naleqqussartuarneqanngereersut nutaat tusarniaassutigineqarput, taakkulu 2025-mi aasakkut atuutilissapput.
Unioqqutitsilluni biilinik angallassinernik arlalinnik taxaatillit nalunaarutiginnissimapput, inatsisilli qanganisaavallaarmata oqartussaasut akuliussinnaasimanngillat.
Assi: Leiff Josefsen
"Kalaallit Nunaanni taxanik angallassineq maannakkuugallartoq malittarisassiuunneqanngilaq. Nalunaarummi tamatumani inatsisitigut malittarisassat aalajangersarneqarput." Nalunaarut Danmarkimi angallannermut ministereqarfimmit tusarniaassutigineqaqqammersoq taama naatsumik paasiuminartumillu nassuiaateqarpoq.
Inatsisit qanganisaavallaarnerat pissutigalugu taamaattumillu inuussutissarsiummi inatsiseqannginnera pissutigalugu taxartartut akornanni naammagittaalliuutiginningaartoqarnerata malitsigisaanik nalunaarut nutaaq pilersinneqarpoq.
Inatsisit qanganisaavallaarnerat pissutigalugu inuit ataasiakkaat angallassinermik nioqquteqarsinnaapput, soorlu Facebook aqqutigalugu akilersilluni angallassinermik neqerooruteqarsinnaallutik.
Inuussutissarsiummi pissutsit pillugit upernaaq illoqarfinni arlalinni taxartartut akerliussutsimik takutitsipput.
Inuussutissarsiutip malittarisassalerneqarnissaa politikkikkut aalajangiiffigineqassaaq, Naalakkersuisullu tamanna tapersersorpaat. Attaveqaasersuutinut naalakkersuisup Hans Peter Poulsenip (S) siusinnerusukkut nalunaarutigaa suliassaqarfiup tamatuma malittarisassiuunneqaqqinnissaa pisariaqartoq.
Kommunalbestyrelsit aalajangiisussaapput
Maannalu nalunaarut nutaaq malittarisassanik nutaanik atuutilersitsisussaq saqqummiunneqassaaq, taamaalilluni taxartartunut angallassinissamut akuersissummik tunniussineq kommunalbestyrelsimit suliarineqaqqissaaq, akuersissummillu peqanngitsoq akiligassinneqarsinnaalissalluni.
Inatsisit nutaat naapertorlugit kommunalbestyrelsi taxanik angallassisinnaaneq pillugu akuersissummik taaneqartartumik tunniussisinnaatitaalissaaq. Akuersissut inummut ataasiinnarmut tunniunneqartassaaq, tuniniarneqarsinnaananilu tunniunneqarsinnaanani. Inulli ataaseq arlalinnik taxateqarpat, arlalinnik akuersissuteqarsinnaavoq.
Aamma kommunalbestyrelsi akinik aalajangersaasinnaatitaalerpoq, aamma aalajangerneqarpoq taxat „Taxa“-mik imaluunniit „Taxi“-mik allassimasumik allagartaqartassasut.
Malittarisassat 2025-mi juulip aallaqqaataani atuutilissasut siunnersuutigineqarpoq, danskillu angallannermut ministeriannit Thomas Danielsenimit atsiorneqarput. Tamanna pissuteqarpoq aqqusinermi angallannermi inatsisit angerlaanneqarnikuunatik Danmarkimi inatsisiliorfigineqartarmata.
