– Namminersorlutik Oqartussat suliffeqarnermik equsoortitsipput

Nunatta timmisartortitseqatigiiffia Air Greenland, Namminersorlutik Oqartussanit pigineqartoq, ukiuni tallimani kingullerni Sulisitsisut peqatigiiffiannut namminersortumut ilaasortaanerminut 3,5 millionit koruuninik akiliuteqartarpoq.Sermitsiaq pisortaanermut Jacob Nitter Sørensenimut aperivoq:

– Aningaasat pissarsiaqarfigisarlugit misigaat – ima paasillugu Air Greenlandip ilaasortaanermini ajunngitsorsiai akiliummit nalimmassarneqartarpat? 

– Air Greenlandip Sulisitsisunut ilaasortaaneq naleqqutsikkamiuk ilaasortaavoq, suliffeqarfillu ilaatigut niuernikkut peqatigiiffimmit ikiorserneqartarpoq. Peqatigisaanik Air Greenland ilaasortanik namminersortunik amerlasuunik toqqaannartumik oqaloqateqartarpoq, taakkulu tamarmik arlaatigut Air Greenlandimik pinngitsuuisinnaanngillat. 

Suliffeqarfiit sulisitsisut kattuffiinut ilaasortaasarnerat nalinginnaasutut isigaarput, allakkatigut taama akissuteqartoqarpoq. 

Ilaasortaanermut akiliut 3,5 millionit koruuninik nalilik Air Greenlandimut suliffeqarfinnullu pigisaanut Grønlands Rejsebureauimut Hotel Arcticimullu tunngavoq, taakkulu silaannakkut angallassinermik, billeteerniarnermik hotemilillu ingerlatsisunut siaruarsimapput. Sermitsiap ilanngullugu Jacob Nitter Sørensen Air Greenlandip peqatigiiffimmi namminersortumi, ilaasortat amerlanerpaartaasa namminersorlutik suliffeqarfiusuni Sulisitsisuni ilaasortaanera soqutigisanik aporaatsitsinnginneranik aperaa. Ingerlatseqatigiiffik Sulisitsisunut ilaasortaanerminut tunngatillugu allanik oqaatigisassaqanngitsoq Air Greenland Sermitsiamut allappoq. 

Sunniut imminut sakkortusartoq

Sulisitsisulli peqatigiiffianni Nusukami siulittaasoq Gert B. Lynge oqaatigisassaqarpoq.

– Ingerlatseqatigiiffiit pisortanit pigineqartut nunatsinni sulisitsisut peqatigiiffiinit marluusunit ataasiinnaq ilaasortaaffigissallugu toqqartaraat soorunami maluginiarparput, Gert B. Lynge Sermitsiamut oqarpoq. 

Sulisitsisut 320-nik ilaasortaqarput; Nusuka suliffeqarfinnik mikisunik akunnattumillu angissusilinnik 15-inik ilaasortaqarpoq. 

Namminersorlutik Oqartussat ingerlatseqatigiiffii amerlanerit Sulisitsisuni ilaasortaapput, arlaannalluunniillu Nusukami ilaasortaanngilaq.

Nukissiamik pilersuisup Nukissiorfiit Sulisitsisuni »attaveqaatininnissaq kiisalu Kalaallit Nunaanni namminersorlutik inuussutissarsiortunut akuunissaq siunertaralugu« ilaasortaallutik oqaluttuarput. Ilaasortaanermut akiliutip ingerlatseqatigiiffimmik nalilinnik pilersitsinermut ingerlaavartumik naleqqersuuttaraa Nukissiorfiit paasissutissiipput. Nukissiorfiit 2024-mi ilaasortaanermut tunngaviusumik akiliummik 10.000 koruuninik akiliuteqarput.

Naleqqap siulittaasuata Pele Brobergip Namminersorlutik Oqartussat suliffeqarfiutaasa qulingiluat taakkulu ingerlatseqatigiiffiit pigisaasa 2024-mi ukiunilu tallimani kingullerni Sulisitsisunut ilaasortaanermut akiliuteqartarnerat pillugu Naalakkersuisut apeqquteqarfigai: Nukissiorfiit, Asiaq, Air Greenland, Sikuki Nuuk Harbour, Greenland Airports, Great Greenland, Nalik Ventures, Visit Greenland, NunaGreen aamma Tusass.

NunaGreen ukioq manna Sulisitsisunut ilaasortanngorpoq.

Ingerlatseqatigiiffiit Namminersorlutik oqartussanit pigineqartut 2024-mi 1.767.173 koruuninik, piffissamilu 2019-24 7.139.551 koruuninik ilaasortaanermut akiliuteqartut akissummi uppernarsarneqarpoq (takussutissiivik takuuk). 

– Millionikkaanik akiliutit Sulisitsisunut iluaqutsiipput, tamannalu kattuffiup ataatsip allamut sanilliulluni nukittoriartuinnavinneranik imminut sakkortusartumik sunniuteqarpoq. Kalaallit Nunaanni suliffeqarnermi sulisitsisut peqatigiiffii marluk pisariaqartinneqartut isumaqarpugut, ilaasortaanerlu – taamaalillunilu aamma ilaasortaanermut akiliutit – oqimaaqatigiinnerusumik agguarneqarnissaat kissaatigaarput, Gert B. Lynge oqarpoq. 

Ilaasortaanermut akiliut sulisitsisut peqatigiiffiisa marluk assigiinngissutiginngilaat. Ilaasortaanermut akiliut aningaasarsiat katillugit ½ procentiinik toqqammaveqartoq assigiikannersumik atorneqarpoq, sulisitsisullu peqatigiiffiisa assigiinngissutaat annerpaaq atianniippasippoq. Nusuka Nunaqavissut Suliffiutillit Kattuffiata naalisarneraa. 

Nusuka 2022-mi ataatsimeersuarpoq. Siulersuisut tassaasut Gert B. Lynge, Noah Mikkelsen aamma Peter Magnussen, ukiaru tullianik ataatsimeersuarnissamut aggersaassapput. 

Akersuuffik

Ingerlatseqatigiiffiit pisortanit pigineqartut sulisitsisut peqatigiiffianni aalajangersimasumi ilaasortaanerat ukiorpassuarni politikikkut aporaaffiusarpoq; piffissarlu tamakkerlugu ingerlatseqatigiiffiit Naalakkersuisut siulitaasuata naalakkersuisoqarfiata ataaniipput. Piffissani arlalinni sulisitsisut peqatigiiffiannut aalajangersimasumut ilanngunissaq politikikkut kimigiisissutaasarpoq; piffissanilu allani suliffeqarfiit namminneerlutik sumut attuumassuteqarnissartik toqqartarpaat.

Pele Brobergimit toqqaannartumik aperineqarluni Naalakkersuisut siulittaasuat Jens-Frederik Nielsen ima akivoq:

– Sulisitsisut inuussutissarsiortunut sulisitsisunullu peqatigiiffittut nunatsinni namminersorlutik inuussutissarsiortut pitsaanerpaamik sinaakkuteqarnissaannik pilersitsinissamik siunnerfeqarlutik suliaqartut, Naalakkersuisut paasivaat, tassani pisortat ingerlatseqatigiiffiini namminersortut ilaasortat ilanngullugit.

Sulisitsisut ilisaritinnerminni peqatigiiffiup politikikkut angusaqartarnera oqaatigaa, taamaaliornerminnullu ilanngullugu politikikkut partiiunnginnertik erseqqissarlugu. Politikikkulli suliaqarnermut isorinnittumik oqaatiginninnissaq mianernarsinnaavoq, taakkumi peqatigisaanik namminneq ingerlatseqatigiiffiutitik aqqutigalugit Sulisitsisunut ilaasortaapput. Aalisagartalli angissusaat pillugu assortuunneq, manna tikillugu ilaasortat annersaata, taamaalillunilu ilaasortaanermut akiliuteqarnerpaasartup Royal Greenlandip 2021-mi Sulisitsisunut ilaasortaajunnaarneranik kinguneqarpoq.

– Isumaga malillugu Sulisitsisut aalisakkanik raajanillu pisassanik politikikkut aalajangersarneqartartunut isummersortariaqanngikkaluarpoq, apeqqummummi tassunga ilaasortat akornanni isummat assigiinngimmata. Taarsiullugu peqatigiiffik suliani ataatsimoorfiusuni suliaqartariaqaraluarpoq, Royal Greenlandip pisortaanera, Mikael Thinghuus oqarpoq.

Taamattaaq Namminersorlutik Oqartussat suliffeqarfiutai annerpaat, Royal Arctic Line aamma KNI Pilersuisoq, Sulisitsisunut ilaasortaanngillat.