Nuummi akunnittarfiliulersaartut tallimaasut

Taamaatitsisoqarnersoq taamaatitsisoqannginnersorluunniit apeqqutaanngilaq. Nuummiimmi nunamut allamut, ilaatigut Danmarkimut, timmisartorlutik ukioq manna qaammatit siulliit arfineq-marluk ingerlaneranni angalasut 53.094-iusut, kisitsisit Naatsorsueqqissaartarfimmit saqqummiussat kingulliit takutippaat. Tassa piffissap taassuma iluani angalasut Nuummiit nunamut allamut 2024-mi januaarip juulillu akornanni timmisartorlutik angalasunut 3.385-iusunut naleqqiullugit amerlanerujussuupput. Tamanna Nuummi mittarfissuup 2024-mi sisamanngornermi novembarip 28-ani ammarneranik soorunami pissuteqarpoq.

Tamannalu Nuummi akunnittarfiit angalasorpassuarnut inissaasuatitsinerannik kinguneqarpoq.

Nunatsinni illoqarfiit pingaarnersaanni akunnittarfiit takornariaqarnerulernerup mittarfissuaqalernerullu ilutigisaanik unnuiffissanik nutaanik katillugit 500-nik ukiut kingulliit ingerlaneranni pilersitsisut ukuupput: HHE Express, Nordbo, Aurora aamma Inuk Hostels. Unnuiffissallu tassa amerlineqangaatsiaqqittussanngorput.

Mittarfissuup mittarfeqarfiullu akiani aqquserngup Illerngit 2001-ip sinaani inuussutissarsiorfeqarfiulersussami sanaartorfissat arfineq-pingasut, Kommuneqarfik Sermersuup inuussutissarsiortunut februaarimi makitsissutigai. Makitaasut nunaminertamik qaammatini arfinilinni atuuttussamik inniminniisinnaatitaalerput. Nunaminertamik inniminniisinnaatitaalernerminniit ukiup affaa qaangiutsinnagu, nunaminertamik ukiuni marlunni atuuttussamik atugassinneqarnissamik aamma qinnuteqarsinnaatitaalerput. Piffissallu nunaminertamik atugassinneqarfigisap qaangiutsinnagu sanaartulereersimasussaapput.

Mittarfeqarfiup akiani sanaartorfissaq A-mi nunaminertaq akunnittarfiliorfissatut aalajangiussaavoq, akunnittarfillu immikkoortortalik HHE tamatumani nunaminertamik tassa atugassinneqartuuvoq.

Nunaminertat sanaartorfissat B-miit J-miittut mittarfissuarmut attuumassutilinnik soorlu quersuamik, kiffartuussinermik, allaffissornermik, neriniartarfimmik akunnittarfimmillu ingerlatsinermut tunngasuni inuussutissarsiutilinnut atugassiassatut aalajangiussaapput.

– Sanaartorfissaq A suliffeqarfissuarmut immikkoortortalimmut HHE-mut makitsissutigineqarnerata saniatigut sanaartorfissat B-miit J-mut aamma makitsissutigineqarput, qinnuteqartulli nunaminertanit atugassiissutigineqartussanngortitanit ikinnerummata tamarmik makitsissutigineqanngillat.

Nunaminertamik atugassinneqarnissamik qinnuteqarnissamut piffissaliussaq qaammatinik arfinilinnik sivisussuseqartoq aggustimi qaangiuppoq, nunaminertamillu inniminniinerit nunaminertamik atugassinneqarnissamut piffissaliussap taassuma ingerlanerani qinnuteqaatinngortinneqartarput, pilersaarusiornermut oqartussaaffeqarfimmilu pisortaq Kommuneqarfik Sermersuumeersoq Runa Sværd Sermitsiamut oqarpoq.

Akunnittarfiliulersaartut arlaqartut

Mittarfissuup akiani sanaartorfissaq A-mi akunnittarfiliornissamut qulakkiigassat tamarmik suli tamakkerneqanngitsut 120-nilli unnuiffissartalimmik akunnittarfiliornissartik ilimanartoq, suliffeqarfissuarmi immikkoortortalimmi HHE-mi siulersuisut siulittaasuat Helge Tang Sermitsiamut oqarpoq.

Nunaminertat allat sisamat sanaartorfissatut nunatsinni suliffeqarfinnut ukununnga februaarimi atugassiissutigineqarput: Air Greenland A/S, illussanik titartaasarfik TNT Nuuk A/S, Capital Estate Development ApS aamma Ejendomsselskabet af 01.01.2017 Nuuk Aps (Hotel Auroramik aamma piginnittoq). Nunaminertat taakkua sanaartorfissatut makitsissutigineqarneranni makitaasunit arlallit mittarfissuarmut attuumassutilimmik pilersitsinissamut piumasaqaatinut naapertuuttumik akunnittarfiliulersaarput.

– Allanngortoqanngippat, mittarfiup eqqaani sisamanik akunnittarfeqalerataannaavoq. Suliffeqarfissuaq immikkoortortalik HHE sanaartorfissaq A-mut qinnuteqarsimasutut nunaminertamik atugassinnikuusatsinni kisiartaavoq, sanaartorfissanulli allanut sisamaasunut qinnuteqaatit suliarineqaleruttorput, Runa Sværd ilisimatitsivoq.

Suliffeqarfiit nunaminertamik atugassinneqarnerminniit ukiut marluk qaangiutsinnagit sanaartulereersimasussaapput. Akuersissutinik allanik, sanaartornermut aamma akuersissummik, piffissap taassuma iluani aamma pissarsisussaapput. Nunaminertat atugassiissutiginiakkat tunniunneqarsimanngitsortaqarpata, taakkua allanit qinnuteqarfigineqarsinnaassapput. Inuussutissarsiorfeqarfiulersussami nunaminertat pineqartut 2.000 kvadratmeterit 3.800 kvadratmeterillu akornanni annertussuseqarput.

Illoqarfimmi aamma akunnittarfiliulersaartoqartoq

Nunatsinni illoqarfiit pingaarnersaata qiterpasissuani akunnittarfiliornissaq aamma puigorneqanngilaq.

Kommuneqarfik Sermersooq Nuummi Tuapannguit isuanni sanaartorfissami 11.000 kvadratmeteritut annertugisumi akunnittarfiliornissamut aamma qinnuteqartitsivoq.

Soqutiginnittut arlaqarput, Malaysiamiulli suliffeqarfiutaat Berjaya Greenland Invest A/S qinnuteqartutuaavoq. Suliffeqarfik taanna nunaminertamik inniminniivoq, sanaartulertiganili akuersissutinik arlalinnik, tamatumani nunaminertamik atugassinneqarnissamik akuersissummik aamma, pissarseqqaartussaassalluni.

Kommunip nunaminertaq taanna ukiap ingerlanerani atugassiissutigineqassangatippaa. Sanarfinermut Avatangiisinullu Ingerlatsiviup akunnittarfimmik unnuisarfimmilluunniit vandrehjemmetut ittumik Nuummi pilersitsinissamik soqutiginnittut allat pingasut attavigai, Runa Sværdili tamatumani suliniutaalereersut pillugit itinerusumik oqaaseqarumanngilaq.

– Illumik pioreersumik akunnittarfinngortitsinissaq vandrehjemminngortitsinissarluunniit pineqarpat, illup taassuma illoqarfiup qiterpasissuaniinnissaa aamma soorlu ikuallajaallisaanermut piumasaqaatinut naapertuunnissaa qularnaaqqaartariaqarparput. Sumiiffinni allani suliniuteqarnissamut aamma qinnuteqartoqarnikuuvoq, sumiiffiilli taakkua allamik pilersitsiffiusussatut aalajangiussaareermata qinnuteqaatit politikkikkut aalajangiiffigineqartigatik suliarineqaqqaartariaqarput.

– Suliani taamaattuni soqutiginnittut sumiiffinnut taakkununnga tunngasuni qanoq iliornissamik oqaloqatigikulaarpavut. Soorlu illoqarfiup ilaanut nutaamik pilersaarusiortoqartariaqarnersoq? Aamma kommuni sumiiffimmut pineqartumut tunngatillugu takorluugai suunersut? Illoqarfimmi inissiaqarfigissaarnissatta inuussutissarsiorfeqarfigissaarnissattalu qulakkeernissaa pingaaruteqarpoq, Runa Sværd oqarpoq.