Nuummi One Stop Securityqalernissaq ulluligaanngitsumik kinguartinneqartoq
Nuummiit aappaagu angalasussat timmisartumut allamut ilaallutik Europamut ingerlaqqittussat isumannaallisaavitigooqqeqqaartassapput. Greenland Airportsimiit EU-mit allamik akuersissuteqalernissamut suliniut unitsikkallarneqarpoq. Angallannermullu Aqutsisoqarfimmiit One Stop Securityp qaqugu atuutilernissaa pillugu mianersortunnguamik ilimasaarutigineqarpoq.
One Stop Security atuutilersinnagu Nuummi mittarfiup ingerlanneqarnera aaqqiivigineqaqqaassaaq.
Assi: Oscar Scott Carl
Nuup mittarfissuartaavata nutaap 2024-mi atulerneraniilli atuutilernissaa pilersaarutaasimagaluarpoq. Tamatuma kingorna 2025-mi aasakkut atuutilissasoq naatsorsuutigineqalerpoq. Naatsorsuutigineqartorli iluatsinngilaq. Taamaammat Nuummi mittarfimmi one-stop-securityqalernissamut EU-mit akuersissut suli tunniunneqanngilaq.
Tamatuma kingunerisaanik Nuummiit Københavnikkoorumi timmisartumut allamut ilaalluni Europamut ingerlaqqinniaraanni isumannaallisaavikkooqqaartoqartassaaq. Angalasut bussimik aaneqariarlutik nassatat tigunissaannut mittarfiup illutaata tunuatigut isertarfimmukaanneqartassapput.
Nuummi mittarfik Europami isumannaallisaanermut najoqqutassianik malinnittoq, EU-mi nakkutilliisut paasippassuk tamanna allanngussaaq, OSS-ilu atuutilissalluni. Angalasut Københavnimut tikinnerminni isumannaallisaavikkooqqinngikkaluarlutik ajornaquteqanngitsumik timmisartumut ilaaffissaminnut ikiartuinnarsinnaalissapput.
Oqaatigissallugu siusippallaartoq
2025-mi tamanna atuutilerunnanngitsoq paasissutissiissutigineqareerpoq. Greenland Airportsimiillu OSS-ip qaqugu atulernissaanik illuliisoqarusunngilaq, attaveqaqatigiinnermut pisortaq Mikkel Bjarnø Lund ilisimatitsivoq.
– Nalunngeriikkatsitut isumannaallisaanermut tunngatillugu unammilligassaqarsimavugut. Maannallu allamut alloriartigata ingerlatsinerup patajaallisarnissaa pingaarnerpaatipparput. Isumannaallisaanermut pisortamik nutaamik aamma atorfinitsitsinikuuvugut.
– Piffissaliussat suliallu nangeqqinnissaa pillugu maanna oqaaseqarsinnaanngilagut. Pilersaarutit malillugit ukiaru kingusinnerusukkut annertunerusumik nalunaaruteqarumaarluta naatsorsuutigaarput. Maannakkorpiaq siusippallaarpoq, Mikkel Bjarnø Lund oqarpoq.
Taamaasilluni isumalluaraluarneq iluatsinngilaq. 2025-mi OSS-imut akuersissummik pissarsisoqarsinnaasoq Greenland Airportsimit siusinnerusukkut nalunaarutigineqartaraluarpoq. Anguniagarli piviusorsiortuunngitsoq Angallannermulli Aqutsisoqarfimmiit Greenland Airportsimut nalunaarutigineqartarnikuuvoq.
Anguniagaq isumalluarfigineqartoq
OSS-ip utaqqineranut pissutaasut arlaliupput. Siullertut Greenland Airportsimit isumannaallisaanermi unammilligassat, soorunami aaqqinneqarsinnaasut. Aappaattut EU-mit nakkutilliiartortoqarnissaa utaqqineqassaaq, tamannalu ukiup ataatsip tungaanut pisinnaasoq siusinnerusukkut nalunaarutigineqarnikuuvoq.
OSS-ili qaqugu iluatsissagami? Angallannermut Aqutsisoqarfimiit tamanna pillugu siunnersuuteqartoqarsinnaavoq - naak mianersortunnguamik pigaluartumik.
Angallannermut Aqutsisoqarfiup 2027-mi aasaanerani angallannermi iluatsissinnaanissaa periarfissatut isigaa. Atorfilittat Ineqarnermut, Attaveqaqatigiinnermut Isorliunerusunullu Naalakkersuisoqarfimmeersunut septembarimi nalunaarput. Kisianni tamanna “anguniagaq isumalluarnermik” tunngaveqartoq, aqutsitsoqarfimmi atorfilittap aamma erseqqissarpaa.
