Royal Greenland KNAPK-lu nutaamik isumaqatigiissuteqarlutik isumaqatigiinngissutertik qaangerpaat
Aalisarnermut isumaqatigiissut nutaaq illuatungeriit siunissami pitsaanerusumik qanimullu suleqatigiinnerunissamik kissaateqarnerannut ersiutaavoq. Tamanna Royal Greenlandimit KNAPK-millu uppernarsarneqarpoq.
Piffissaq sivisooq atorneqaraluarpoq, naggataatigulli Royal Greenlandimeersoq Lars Nielsen KNAPK-meersorlu Nikkulaat Jeremiassen aalisarneq pillugu suleqatigiinnissamut atsioqatigiipput.
Assiliisoqarfik
Royal Greenlandip KNAPK-llu akornanni piffissami sivisuumi isumaqatigiinngittoqartarsimanera isertuussaanngilaq. 2024-mi apriilimi taakku marluk Nuummi allaffiannut aalisartut akerliussutsimik takutitsinerat pissanganarnerit ilagaat. Royal Greenlandip KNAPK oqaloqatigiinnermut akornusersuisutut piviusorsiunngitsutullu unnerluutigaa.
Sapaatip-akunneranili matumani angusaqartoqarpoq, tassami illuatungeriit isumaqatigiissummik 2023-mili utaqqineqarsimasumik suleqatigiinnissamik isumaqatigiissuteqarput.
Isumaqatigiissut nutaaq aqqutigalugu assigiinngitsutigut suleqatigiinnissaq isumaqatigiissutigineqarpoq, soorlu sinerissap qanittuani aalisarnerup malittarisassalerneqarnissaa, aalisariutit annaaneqartut saliiffigineqarnissaat, aalisakkanik maannamut atorluarneqanngitsunik misileraalluni aalisartoqarnissaanik siuarsaanissaq siunissamilu kalaallit tunisassiaasa tuniniaavissaannik pilersitsineq.
Ajornartorsiutit aaqqinniarlugit suleqatigiit
Illuatungeriit taakku marluk ataqqeqatigiillutik ataatsimoorsinnaasut anguniagaqatigiissinnaasullu isumaqatigiissutip aamma takutippaa. Tamanna KNAPK-p siulittaasuata uppernarsarpaa:
- Isumaqatigiissut naammagisimaartorujussuuarput, pingaarutilittullu isigaarput. Politikkerit oqallisiginnikkusunngitsillugit uagut allat immitsinnut qaninnerulertariaqartarpugut ajornartorsiutinillu aaqqiiniarluta, Nikkulaat Jeremiassen oqarpoq.
Illuatungeriilli maanna sunik tamanik isumaqatigiissutiginninnerannik tamanna isumaqanngilaq. Assersuutigalugu KNAPK-p akit isumaqatiginninniutigineqarnissaat kissaatigaa, tamannali isumaqatigiissummi maanna atuuttumi ilaanngilaq. Taamaakkaluartorli suleqatigiinneq siunissarlu pillugit Nikkulaat Jerimiassen isumalluarpoq.
- Aalisartut avammut tunisaqarsinnaalernerat isumaqatigiissutillu nutaap kingunerisaanik aalisariutit pisoqqat immap naqqaniittut piiarneqarsinnaalernerat nuannaarutigeqaarput, taanna oqarpoq.
Ileqqutoqqanut uterneq
Jeremiassenip isumaqatiginninniarnermi illuatungia, Royal Greenlandimi tunisassiornermi pisortaq Lars Nielsen, soraarfinngunnginnerani attaveqarfigineqarsinnaasimanngilaq. Aalisarnermilli ingerlatsisut aamma isumalluartut attaveqaqatigiinnermut pisortaata uppernarsarpaa.
- Isumaqatigiissut nuannaarutigeqaarput, sivisuumimmi suliarineqarsimavoq. Siornatigut aamma suleqatigiinnissamut isumaqatigiissuteqarnikuuvugut ukiorpassuarnilu suleqatigiilluarsimalluta. Naak ukiuni kingullerni isumaqatigiinngissuteqartarnikuugaluarluta, avissaartuutsitsisunit ataasiussuseqalersitsisut amerlanerupput. Maanna suleqatigiilluaqqilerpugut, Merete Lindstrøm oqarpoq.
Taanna naapertorlugu KNAPK-mik ataatsimeeqateqarnerit iluaqutaapput, tassani Royal Greenlandip ilaatigut niuernermi atugassarititaasut oqaluttuarimmagit, soorluttaaq KNAPK-p immikkoortortaqarfii aamma naapittarai.
- Oqaloqatigiinneq siunissami paasinninnissamut qulakkeerutaassaaq, Merete Lindstrøm naqissusiivoq.
