SAS-ip Nuummut timmisartuussisarnini nangeqqissagaa
Aasaanerani putsertarnera mittarfimmilu ajornartorsiutit allat SAS-imit qunullerfigineqanngillat. Timmisartuutileqatigiiffiup Nuup Københavnillu akornanni aasakkut angallassisarnini 2026-mi nangeqqissavaa.
SAS-ip pisortaanera Anko van der Werff timmisartuutileqatigiiffiup Nuummut perngaamik timmisartuussinerani juunip 27-ani 2025-mi ilaavoq.
Assi: Morten Okkels
SAS-ip timmisartua Nuummut aappaagu meqqissaaq. SAS-ip timmisartuussinissaanut nittartakkatigut inniminniisarfiani 2026-mi aasaanerani timmisartuussinernut pilersaarutaani tamanna takuneqarsinnaavoq.
Billetsit inniminnerneqarsinnaasut siulliit maajip 28-aniit aallartiput, sapaatillu akunnerisa tulliini sapaatip-akunneranut marloriarluni timmisartuussisoqartassalluni.
Juunip naaneraniit aggustip naanissaata tungaanut sapaatip-akunneranut pingasoriarluni timmisartuussisoqartalissaaq. 2025-mi timmisartuussisaarnerit assigalugit ataasinngornermi, pingasunngornermi tallimanngornermilu timmisartuussisoqartassaaq. Billitsit akisunerit aappaagu aamma periarfissaalernissaat takuneqarsinnaavoq.
SAS-imut tamanna uppernarsartinniarlugu oqaaseqartitsiumallutalu saaffiginnipput, tusagassiisarfianiilli suli akineqanngilagut.
Nuummi mittarfimmi aasaq manna unammilligassarpassuaqarpoq, pingaartumik isumannaallisaanermi nakkutilliinikkut. Taamaakkaluartoq aasaanerani timmisartuussisaarnerit iluatsilluarput.
United Airlinesimiit New Yorkimiit 2026-mi aasakkut timmisartuussisarnissani neriorsuutigineqareerpoq. Angalatitsiviup Ruby Rejserip aamma Nuummiit Aalborgimut timmisartuussisarnini ingerlatiinnassavaa, angalatitsiviup pisortaa Sermitsiamut qaammammi matumani siusinnerusukkut oqarpoq.
