Sermersooq: Qassutinut annaasanut taarsiissuteqartoqartassanngilaq
Nuup Kangerluani qipoqqaat illersorniarlugit politikerit 2021-mi aalajangermata, ingerlatsiviup qassutinik aalisartut qassutaasa aserorneqarneranni taarsiiffigineqarnissamut periarfissamik misissuinissaat aalajangiunneqarpoq. Taamatulli periarfissaqartoqanngilaq, Sanarfinermut Avatangiisinullu Ingerlatsivik inerniniliivoq.
Aalisartut arfinillit Nuup Kangerluani bundgarnilerfissanut 27-nut qinnuteqarput, taakkulu 27-t tamarmik ataatsikkut atorneqarpata piniutit, tamarmik atorneqarnerat naatsorsuutigigaanni, naleqarput 810.000 – 1.890.000 koruunit akornanni, Sanarfinermut Avatangiisinullu Ingerlatsivimmi pisortaq, Søren Pedersen, Kommuneqarfik Sermersooq taama ilisimatitsivoq.
Arferillu amerlissappata qassutit aserorneqartut amerleriarpata aningaasarpassuit pineqarput.
Kommunit piginnaatitaaffiat
Nunamut Namminermut Naalakkersuisoqarfiup nalilerpaa, kommune, kommunit piginnaatitaaffiata iluani bundgarninut annaasaqaatinut taarsiissuteqarsinnaanngitsoq.
- Ingerlatsiviup nalilerpaa, suliaq maannakkutut isikkoqartillugu Kommunalbestyrelse ingerlatitseqqissinnaanngitsoq, taarsiissuteqarnissamik aaqqissuussineq kommunit piginnaatitaaffiinut taakkulu inatsisitigut tunngaviinut ataqatigiissinneqarsinnaanngimmata, pingasunngornermi 10. april ataatsimiititaliap ataatsimiinnissamut suliap saqqummiunneqarnerani atuarneqarsinnaavoq.
Sillimmasiisarfiit isumasioreerlugit erseqqissivoq, qassutinik annaasanik taarsiissuteqarneq ajortut, qassutit immami atorneqalereersillugit.
Qassutinik annaasanik taarsiissuteqartarneq pilersinneqassappat, taamaattumik tamanna Naalakkersuisut suliassarissavaat.
Ikiorsiissutissat
- Maannakkuugallartoq taarsiiffigitinnissamut periarfissamik peqanngikkaluartoq, Ingerlatsiviup Aalisarnermut Piniarnermullu Naalakkersuisoqarfik isumasioreerlugu erseqqissaaffigineqarpoq, "aallarteqqinnissamut tapiissutinik" taaneqartartunik qinnuteqaateqartoqarsinnaasoq, tamanna ilisimatitsissutigineqarpoq.
Aallarteqqinnissamut tapiissutit ikinnerpaanik 2.000 kr-itut amerlanerpaatullu 25.000 kr.-itut ataasiaannarluni tunniunneqartarput, pissutsini immikkut ittuni taaneqartunit aningaasanik amerlanerusunik tunniussisoqarsinnaavoq.
