KL

DK

Taxanut malittarisassat nutaat siunnersuutigineqartut assigiinngitsunik isummerfigineqarput

Taxartartut malittarisassaaleqinermut tunngatillugu iliuuseqartoqarnera nuannaarutigaat, aammali malittarisassat akuliuppallaarnersut ernummatigaat.

Nuuk Taximi pisortap Janus Eigaardip suliami iliuuseqartoqarnera nuannaarutigaa, malittarisassalli nutaat unammilleqatigiinnermut akuliuppallaarsorai.
Thomas Munk Veirum
Tusagassiortoq
Saqqummersinneqarpoq

Upernaaq taxartartut malittarisassaqannginnerat pissutigalugu nunami sumiiffinni arlalinni akerliussutsimik takutitsisoqarpoq, tassami taxartartut kikkulluunniit akiliisitsillutik inunnik angallassisinnaanerat naammagineqanngimmat.

Malittarisassaaleqineq pissutigalugu allagartaqanngitsut aningaasarsiortarnerat isornartorsiorneqarpoq.

Maanna malittarisassat nutaat tusarniaassutigineqarput, akuerineqarpatalu akiliilluni inunnik angallassisoqarsinnaalissaaq – tassa taxartitsisoqarsinnaalissaaq – aatsaat kommunalbestyrelsimit akuerineqaqqaarluni.

Tamanna Nuuk Taximi pisortap ajunnginnerarpaa. Naalakkersuisut siusinnerusukkut neriorsuisimanerattut iliuuseqartoqarnera nuannaarutigaa, Janus Eigaardimmi ’unioqqutitsilluni akiliisitsilluni angallassinertut’ taasaanit inuussutissarsiummi tatineqarneq annertusimavoq.

Suliffeqarfiit allat assigalugit pineqarusupput

Aammali siunnersuutip ilai ernummatigai, kommunimmi taxanik angallassinermut sunniuteqarpallaassasut taanna isumaqarpoq. Siunnersuut naapertorlugu taxat qassiunissaat kiisalu angallassinermi akigititap annertunerpaaffissaa kommunit aalajangertassagaat innersuussutigaa.

Namminersortutulli allatulli taxartartut pineqarusuttut Janus Eigaard oqarpoq:

- Assersuutigalugu Brugsenip pisiniarfiisa qassiunissaat aalajangerneqarneq ajorpoq, niuerfiup aalajangertarpaa.

- Brugsenimi pisiniaraanni aamma pisortat immuup liiterimut qanoq akisutiginissaa aalajangerneq ajorpaat, assersuutigalugulu bussit taxallu allat unammillerusuppavut, Janus Eigaard oqarpoq.

Taamaattumik akigitinneqartussat taxallu qassiunissaat unammillertunit aalajangerneqartarnissaat pisortap kissaatiginerpaavaa.

Sinerissami siunnersuut pillugu allatut isumaqartoqarpat paasisinnaallugu naqissusiivoq, tassami taxartarnerit Nuummit soorunami allaanerulluinnarmata.

Siulersuisunut ilaasortaq naammagisimaarinnilluartoq

Ilulissani taxartartut peqatigiiffianni siulersuisunut ilaasortaq ukiorpassuarnilu taxartartuusimasoq Knud Fleischer malittarisassat nutaat pillugit isumalluarneruvoq:

- Ukiorpassuarni malittarisassaqannginnerup kingorna maannakkut iliuuseqartoqarnera nuannaarutigeqaara, Knud Fleischer Sermitsiamut oqarpoq.

- Sivisuumik kissaatigisatta piviusunngortinniarneqarnera qamuuna kissaammissutigingaarparput, nangilluni oqarpoq.

Knud Fleischerip maleruagassat nutaat ajornerpaartaattut ulloq atuutilerfissaq taavaa.

Siunnersuut naapertorlugu malittarisassat aatsaat 2025-mi juulip aallaqqaataani atuutilissapput:

- Piffissarujussuarmi tamatumani unioqqutitsinerit suli ingerlanneqartuassapput, Knud Flescher oqarpoq, ataatsimulli isigalugu siunnersuummik naammagisimaarinnilluarpoq.

kommunalbestyrelsen erhverv regulering sort marked demonstrationer inuussutissarsiutit taxa-branchen

ATORFIIT Se alle jobs

Powered by Labrador CMS