Umiatsiaararsorlutik aalisartut - aamma arnat aalisartut amerlisimasut
Aalisarnermut, piniarnermut, nunalerinermut imminullu pilersornermut naalakkersuisoqarfik 2016-2024-mi sinerissap qanittuani umiatsiaararsorluni aalisarnerup ineriartornera pillugu nalunaarusiorsimavoq, tassani ilaatigut ukiut, suiaassuseq, pisat aamma ataatsimut nunallu immikkoortuinut agguataarlugit tunisat nalingi takutinneqarlutik.
Sinerissap qanittuani umiatsiaararsorluni aalisarneq piffissami 2016 – 2024-mi ineriartornera annertusimavoq. Umiatsiaararsorlutik aalisartut amerlassusiat 2016-imi 1.836-usimariarlutik 2024-mi 1.983-inut amerlisimapput. 2019-imi amerlanerpaagamik 2.047-t umiatsiaararsorlutik aalisartuupput.
Asseq: Naalakkersuisut
Naalakkersuisut nalunaarusiamik sukumiisumik suliaqartitsiseqqammerput sinerissamut qanittumi aalisarneq pillugu 2016-2024-mut tunngatillugu, aalisarnermut, piniarnermut, nunalerinermut imminullu pilersornermut naalakkersuisoqarfimmit tusagassiorfinnut tamanna nalunaarutigineqarpoq.
Arnat umiatsiaararsorlutik aalisartut amerlisut
Nalunaarusiap ersersippaa piffissap 2016-2024-p ingerlanerani umiatsiaararsorluni aalisarnermi arnat amerlanerulersimapput.
Taamaalillutik umiatsiaararsorlutik aalisartunit arnat 0,3 %-imiit 1,3 %-imut amerleriarsimapput.
Arnat umiatsiaararsorlutik aalisartut amerlanerpaartaat Upernaviup eqqaaniipput, 2024-mi arnat umiatsiaararsorlutik aalisartut 12-iullutik, nunap immikkoortortaani umiatsiaararsorlutik aalisartut tamarmiusut 3 %-eralugit.
Umiatsiaararsorlutik aalisartut inuusunnerusut amerleriartut ukioqqortunerusullu ikileriarlutik
Piffissap ingerlanerani aamma aalisartut inuusunnerit ilanngunnikuupput. Aalisartut 40-t inorlugit ukiullit 2016-imi 37%-imiit 2024-mi 41%-mut amerleriarsimapput. Taassuma paarlattuanik aalisartut 40-t sinnerlugit amerlassusiat 63%-ioriarlutik 59%-inngorlutik ikileriarsimallutik.
Taamaattoq aqutsiveqarfinni ataasiakkaani ineriartorneq assigiissimanngilaq, matumani piffissap ingerlanerani Qaanaami ikileriarnerpaasimallutik (-22), taamaannerani 2016 - 2024-mi umiatsiaararsorluni aalisartut amerlassusiat Nuummi amerleriarnerpaasillutik +54.
Nalunaarusiami pineqarput umiatsiaaqqat (umiatsiaaqqat 6 meterit inorlugit takissusillit) ataatsimut isigalugit Kalaallit Nunaat tamakkerlugu, aammali sinerissap qanittuani qaleralinniarnermut aqutsiveqarfiit;
- Kangia
- Kujataa
- Nuuk
- Sisimiut-Maniitsoq
- Qeqertarsuup tunua
- Uummannaq
- Upernavik
- Qaanaaq
Nalunaarusiaq umiatsiaararsorluni aalisarnerup Kalaallit Nunaat tamakkerlugu nunallu immikkoortuinut agguataarlugu ineriartorneranik sukumiisumik takutitsivoq.
- Taamaalilluni sumiiffinni assigiinngitsuni sinerissap qanittuani aalisarnerup qanoq ineriartorsimaneranik, tassunga ilanngullugu aalisagaqatigiiaat sorliit sumiiffinnut pingaaruteqarnerpaanerannik, qaammatit sorliit aalisarfiunerpaasarnerannik, tunisat nalingisa ineriartornerannik taamaalillunilu aalisartumut ataatsimut isertitanik kiisalu ukiuisa agguataarsimanerisa aalisartullu amerlassusaasa ineriartornerannik erseqqissumik takutitsivoq, naalakkersuisoqarfik nalunaarpoq.
Nalunaarusiaq paasissutissanik nutaanik pissanganartunillu imaqarluartoq atuarneqarsinnaavoq naalakkersuisoqarfiup naqitanik saqqummiiviani aallugu.
