Akerliussutsimik takutitsisoqareersorlu: Tasiilami innuttaasut kommunip tapersersorpai
Kommuneqarfik Sermersuumi borgmesterip, Avaaraq Olsenip, Tasiilami innuttaasut attaveqaasersuutinut, angallannermut politikkikkullu pingaarnersiuinermut tunngasuni unammillernartut pillugit misigisaminnik oqariartuutigisaat tapersersornerarpai.
Assi: Leiff Josefsen
Kommuneqarfik Sermersuup tusagassiuutitigut nalunaarummini ilaatigut allappoq timmisartuussinernut pilersuinernullu aqqutit allanngortinneqarnerat Tasiilamut nunaqarfinnullu eqqaaniittunut annertuumik ajornakusoortitsiffiulersut.
Timmisartukkut nassiussisarnerit tamarmik, siornatigut toqqaannartumik Islandikkoortinneqartartunut taarsiullugu maanna Nuuk aqqutigalugu assartorneqartarnissaannik allannguisoqarpoq.
Tamassumalu kinguneqaraa nassiussat sivisunerusumik ingerlaartalernerannik aammalu nioqqutissanik pingaarutilinnik patajaatsumik pilersuiniarnerup ajornakusoornerulerneranik. Tamanna inuussutissarsiortunut innuttaasullu ulluinnarni atugaannut pitsaanngitsumik borgmesterip sunniuteqarnerarpaa:
- Kommuneqarfik Sermersooq unammilligassanut taakkununnga iliuuseqarniarluni siornatigut suliniuteqartareertarpoq, ilaatigut inuussutissarsiornermik aamma attaveqaasersuutit pillugit isumasioqatigiissitsisarluni, taakkunani Namminersorlutik Oqartussat suliffeqarfiillu attuumassutillit peqataatinneqartarput.
- Ataatsimoorluni kivitseqatigiinnissamut pisariaqartitsineq peqataasunit isumaqatigiissutigineqarsimavoq, taamaattorli isumaqatigiinnerup tamatuma timitalersorneqarnissaa pingaaruteqarluinnartuuvoq.
Borgmesteri innuttaasunut, matumani Tunumi ineriartortitsinissamut ataatsimut suliniuteqarnissap pisariaqassusianik kissaateqarlutik isummaminnik ersersitsisunut, paasinninnerarpoq.
Taassuma ataasiakkaanik suliniuteqartoqarnissaa naammannginnerarpaa. Ataatsimut periusissiaqarnissaq, Tunumi piujuartitsisumik ineriartornissaq qulakkeerniarlugu kommune, Namminersorlutik Oqartussat suliffeqarfiillu suleqatigiinnissaat pisariaqartinneqarpoq.
- Attuumassuteqartunut tamanut kaammattuutigissavarput oqaloqatigiinnermik aallartitseqqiisoqassasoq, tamatumuunalu Tasiilami innuttaasut unammilligassaannut tunngatillugu tigussaasunik iliuuseqartoqarnissaanut pisussaaffiliisumik aaqqiissutissarsiortoqassasoq. Nunatta tamarmiusup ineriartorneranut Tunup kinguussaatinneqannginnissaa qulakkeerniarlugu maanna iliuuseqarnissarput pingaaruteqarluinnarpoq, borgmesteri naggasiivoq.
