Ittoqqortoormiini Mette qinerneqarpoq

Ittoqqortoormiini kommunimut qinersinermi Mette Mettelu qinigassaapput.

Illoqarfimmi najugaqartut marluinnaat qinigassanngortipput: Mette P. Barselajsen, Inuit Ataqatigiit, aamma Mette Arqe-Hammeken, Naleraq, taakkulu atuarfiup aulaani ataatsimoorlutik qineqqusaarput, tassanilu Kommuneqarfik Sermersuumi avinngarusimasumut takorluukkatik saqqummiuppaat. 

Mette-t marluk Ittoqqortoormiini qinersinermi taasinerit 158-t avipajaarpaat. Mette P. Barselajsen IA-mut taasisunit 102-raarpoq; Mette Arqe-Hammeken Naleqqamut qinersisut 22-t tamakkerpai. Taasinerit 34-t sinneruttut Tasiilamit Nuummillu Siumut sinnerlugu qinigassanngortittut agguarpaat. 2009-mi kommunit kattussuutsinneqarneranni kommunitoqqat kommunalbestyrelsini nutaani inissamik qulakkeerinniffigineqarput; Sumiiffimmi qinigaatitatut inissaq taaneqartoq, piffimmi partiini annersami ajugaasumut tunniunneqartartoq. 

Mette P. Barselajsenip piumasaqaatit pingasut tamaasa naammassivai: Ittoqqortoormiini najugaqarpoq, tassanilu tikeraanut unnuisarfimmik ingerlatsivoq, partiimilu annersami qinerneqarnerpaajuvoq. 

Taamaammallu Kommuneqarfik Sermersuumi Ittoqqortoormiini sumiiffimmit qinigaatitaavoq. Innuttaasut ikiliartorput. Kalaallit Nunaannut Naatsorsueqqissaartarfiup kisitsisaatai kingulliit januaarip aallaqqaataaneersoq malillugu nunatsinni illoqarfiit minnersaat 324-nik innuttaqarpoq. 

– Ittoqqortoormiini inuuniarnikkut atukkat pitsanngorsarnissaannik neriorsuuteqarninnut kommunalbestyrelsimi inissisimaffiga atussavara, tamannalu innuttaasunik najugaqaannartitsissaaq, Mette P. Barselajsen Sermitsiamut oqarpoq. 

Qinersinerit tamaasa 

2009-mi kommuninik aaqqissuusseqqinnermi kommunit 18-iusut sisamanngortillugit kattussuunneqarput. (kingusinnerusukkut Ivittuut inueruppoq, Qaasuitsullu Kommunia avinneqarpoq). Isornartorsiuisut saammaamisinniarlugit Inatsisartut 2006-mi ukiakkut ataatsimiinnerminni, kommunitoqqat 18-t tamarmik kommunalbestyrelsini nutaani ikinnerpaamik inissamik ataatsimik pissarsinissaat akuerineqarpoq. Inissaq taanna sumiiffimmi qinigaatitatut taaneqarpoq. 

Sumiiffimmi qinigaatitap arlaatigut kommunalbestyrelsimi nutaami kommunerujussuarmi tamarmi qanimut ilisimaarinnittoqarnissaa qulakkiissagaa aaqqissuussinermi anguniarneqarpoq. Peqatigisaanik sumiiffinni qinigaatitat piffinni ataasiakkaani pisortatigoortumik pisoqarnerani, soorlu kunngikkormiunik tikeraartoqarnermi, kommunalbestyrelsinut sinniisuusartussaapput.

Kommunit killeqarfitoqaannik atuutsitsiinnarneq innuttaasut kommuninik nutaanik ataatsimoornermik misiginissaannik sanngiillisitsisuunera, kommunalbestyrelsillu nutaat kommuni tamakkerlugu innuttaasut soqutigisaannik isumaginnittussaanermik pisinnaatitaaneranik misiginermik sanngiinnerulersitsinissaa, aaqqissuussinermut akerliusut oqaatigaat. 

Sumiiffinni qinigaatitanut tunngavilersuut alla tassaavoq, politikerit ikittunik taaguunneqartut politikerinut allanut parteeqatiminnut ajugaasinnaanerat. Tamanna arlaleriarluni pivoq, marlunngormallu qinersinermi sumiiffinnit qinigaatitat tamarmik inuttut taaguulluarneqarnermikkut periarfissaqanngikkaluarpalluunniit qinigaasimassagaluarput. 

Kommunit aaqqissuunneqarnerat nutaaq 

Sumiiffinnit qinigaatitat 2009-mi ataasiaannarlutik atuunnissaat pisussaagaluarpoq, Inatsisartunili amerlanerussuteqartut, Siumut Inuit Ataqatigiillu 2012-imi aaqqissuussinerup killiligaanngitsumik nanginnissaa aalajangerpaat. 

Kommunili tallimani nipituuliortoqarpoq. 

Bentiaraq Ottosen Atassummeersoq ataasinngorpat Nunamut Namminermut Naalakkersuisutut ivertinneqassaaq, tassanilu naalakkersuisooqatigiit kommuninut pilersaarutaat piviusunngortissavai. 

Amerlasuut kommunit aaqqissuusseqqinnissaannik kissaateqarnerat naalakkersuisooqatigiit akueraat, kommunillu agguarneqarsinnaanerannik sulineq qinigaaffimmi aggersumi pingaarnerutinneqassaaq. Naalakkersuisooqatigiinnissamik isumaqatigiissut Nuummi Katuami sapaatit akunnerata matuma siorna atsiorneqartoq ima anguniagaqarpoq: »kommunit aaqqissuunneqarnerat nutarterneqassaaq, innuttaasut piffimminni qanimut oqartussaaneq misigissavaat, soorluttaaq pisortat allaffissornerannut tatiginninneq annertusarniarlugu nutaamik eqqarsartoqassasoq«.

Nunatta Avannaani agguluinerup saniatigut agguluineq alla – imaluunniit kommunit qanga aaqqissuunneqarnerannut uteqqinneq sumiiffinni qinigaatitanik 17-nik assortuussutaasunik pisariaarutsitsissaaq. 

Marlunngormat qinersinermi immikkut inissat 17-t ima agguarneqarput: Siumut 9, Inuit Ataqatigiit 3, Demokraatit 3, Naleraq 2. (faktabox takuuk).