Jens-Frederik Nielsen Danmarkimut angalalersoq - Kunngi nunatsinnut uteqatigissavaa
Naalakkersuisut Siulittaasuat Jens-Frederik Nielsen Danmarkimut apriilip 26-aniit ataasinngorneq apriilip 28-ata tungaanut angalalerpoq, taama Naalakkersuisup suliuttaasoqarfia nalunaarpoq, uppernarsarlugulu kunngi utimut nunatsinnukaqataassasoq.
Assi: Leiff Josefsen
Naalakkersuisut Siulittaasuata Danmarkimiinnermini ilaatigut ministeriuneq Mette Frederiksen, Folketingip siulittaasua Søren Gade naapissavai, kiisalu Dansk Industri ilinniartullu Kalaallit Nunaannut attuumassutillit naapissallugit.
- Siullermik nunat marluk akornitsinni suleqatigiinnerput, nunarsuarmilu pissutsit pillugit ministeriunermik oqaloqateqarneq ingerlateqqissavara. Siunissami suleqatigiinnissatsinnut maannakkorpiaq pilersaarusiornissarput pingaaruteqarpoq, Naalakkersuisut Siulittaasuat Jens-Frederik Nielsen oqarpoq.
Naalakkersuisut Siulittaasuat Danmarkimiinnermini aamma ataqqinartorsuaq Kunngi Frederik ilassissavaa.
Naalakkersuisut Siulittaasuat ataqqinartorsuaq kunngi peqatigalugu Kalaallit Nunaannukassapput, Nuummullu tikissallutik ataasinngornermi apriilip 28-ani 2025.
Ataqqinartorsuup kunngip Nuummut tikeraarnissaanut atatillugu pilersaarut kingusinnerusukkut saqqummiunneqassaaq.
Chefredaktør: Oqariartorneq ersarissoq
Nutaarsiassaqartitsivik Sermitsiami pisortaaneq, Masaana Egede, kunngip nunatsinnut tikeraarnissaa nunatta Danmarkillu USA-mut ersarissumik oqariartorannik isigaa.
- Danmarkip nunarput pillugu iliuuseqarusunneranik erseqqissumik oqariartorneruvoq, Masaana Egede oqarpoq, nangillunilu:
- Danmarkip Kalaallit Nunaatalu aamma Kunngikkormiut siunissami suleqatigiinnissamik pilersaaruteqarnerat Danmarkimut Kalaallit Nunaannullu aamma pingaaruteqarpoq, tamannalu taama eqqarsarnerannut uppernarsaataavoq.
- Isumaqarpunga Jens-Frederik Nielsenip, Múte B. Egedep Mette Frederiksenillu oqaasii erseqqissarneqartut, tassa piffissami matumani ataatsimoortariaqartugut, Masaana Egede oqarpoq.
USA-p præsidentiata Donald Trumpip arlaleriarluni oqaatigaa USA-p Kalaallit Nunaat tiguarniarlugulu aqukkusukkaa, tamannalu naalagaaffissuarmik suleqateqarnermi diplomatiskiusumik ajornartorsiortitsivoq.
Kunngikkormiut tikeraarnissartik Facebookikkut aamma paasissutissiissutigaat. Kunngip ilaatigut Naalakkersuisut nutaat ataatsimeeqatigissavai, Siriusillu alapernaarsuiartortitaat pulaassallugit.
