Keira pillugu suliaq immikkut suliaqartitanit suliarineqaqqissaaq

Keira Kronvold qaammatit qulingiluat ingerlanerini panini angerlartinniarlugu ilungersorpoq. Zammi inunngornerminiit nalunaaquttap akunneri marluk qaangiunnerini Thisted Kommunemit pinngitsaaliissummik 2024-mi novembarimi arsaarinnissutigineqarpoq, ilaatigut angajoqqaat piginnaanerinut qallunaat misissuutaa kalaallit kulturiannik oqaasiinillu tulluanngitsut tunuliaqutaralugit.

Keira Kronvold pillugu suliaq suliat 600-t sinnillit, kalaallit angajoqqaat ukiuni kingullerni meeqqaminnik pinngitsaalisaallutik arsaarneqartartut ilaannaraat, ilaannilu arsaarinninnissamik aalajangernerit tusarliunneqartarput nutserisoqarani, aammalu kalaallit oqaasii kulturiallu immikkut isiginiarnagit. Ukiut ingerlanerini pissutsit taamaannerat suliamut ilisimasallit, kalaallit peqatigiiffiisa kiisalu inuit pisinnaatitaaffii pillugit ilisimatusarfimmik ernumalersitsipput

Misissuinerit atorunnaarnissaat

2024-mi ukiakkut isornartorsiuineq sakkortusivoq, Naalakkersuisut akuliullutik danskit naalakkersuisuinut meeqqat pillugit suliaqartoqartillugu ilaqutariinnut kalaallinut attuumassuteqartunut tarnip pissusaanik misiliisarnerit atorunnaarsinneqartariaqartut toqqaannartumik kaammattuutigalugu. 

Januaari 2025-mi – Trump Juniorip Kalaallit Nunaannut tikeraarneranit ullut marluk qaangiuttut – danskit naalakkersuisui nalunaarput ilaqutariinnut kalaallinut meerartalinnut tunngasuni tarnip pissusaanik misissuinerit atorunnaarsinneqassasut. Ukioq mannalu maajip aallaqqaataani inatsit nutaaq akuerineqarpoq, tassani, ilaqutariinnut kalaallinut tunngasuni misissuinernut taarsiullugu danskit kommunii pisussaaffilerneqarput Den Nationale Videns- og Specialrådgivningsorganisationi (VISO), immikkut ittumik sulisinneqartassasoq, taanna kalaallisut oqaasilerinermik kulturilerinermillu immikkut ilisimasaqarmat. Immikkoortortaqarfiup taassuma aamma misissuinernik pineqartunik atuilluni inissiinermut suliat maanna suliarinneqqippoq, sulisitallu taakku maanna Keira Kronvold pillugu suliamut killipput.

VISO-mi ataatsimiinneq siulleq

Misissuineq pillugu ataatsimiinneq siulleq 2025-mi aggustip 15-ani pissaaq, tassanilu Keira Kronvold eqqartuussissuserisualu Jeanette Gjørret peqataassapput, aamma Thisted Kommunemi sulisut marluk kiisalu VISO-mi immikkut sulisitat sisamat peqataassapput.

Kiera Grønvold neriuppoq, immikkut sulisitani peqataasut angajoqqaatut piginnaasani pillugit misissuisimanerit isiginiassanngikkaat, taanna Thisted Kommunip suliarisimavaa taannalu misissuineq tunngavigalugu qitornai angajulliit marluk pinngitsaaliissummik arsaarinnissutaasimapput ukiut qulit matuma siorna.

Arsaarinnissutaasup angerlartinneqarnissaanut tunngavilersuisoqassaaq

Taassuma eqqartuussissuserisua Jeanette Gjørret Stage Advokatfirmameersoq arlaleriarluni tunngavilersuisarpoq Zammi Keira Kronvoldip angerlarsimaffianut utertinneqartariaqartoq, suliami paasissutissat kukkusut eqqortumillu saqqummiunneqannginnerat pissutigalugu.

”Uppernarsarneqanngilaq, inissiinissamut Ingerlatsinissamut tunngavissaqarnersoq”, ilaatigut Sermitsiamut oqareernikuuvoq.

Tamatuma saniatigut eqqartuussissuserisup aamma qularilerpaa meeqqat angajulliit marluk 2014-imi tarnimikkut misissorneqarlutik oqalutsimillu atuineqanngitsumik pinngitsaaliissummik pinngitsaaliissummik arsaarinnissutaasimanerat tunngavissaqarnersoq. Isumaqarporlu qularutissaanngitsoq meeqqanut angajulliusunut marlunnut suliaq siulleq, aamma kukkusumik nalilerneqarsimasoq, aammalu taanna Zammip pinngitsaaliissummik arsaarinnissutaaneranut aalajangiisuusimasoq, siornatigut paasissutissat suliami tunngavissiaasimasut ilarujussuanik imaqarmata.

Eqqartuussissuserisoq Bruno Mikkelsen, 2014-imi Keira Kronvoldip eqqartuussissuserisorisaa aamma taama isumaqarpoq. Taanna Sermitsiamut oqarpoq Keira Kronvoldip Kalaallit Nunaanni inunngorsimanera peroriartorsimaneralu naammattumik qajassuunneqarsimanngitsoq, piginnaasai pillugit misissuinerup suliarineqarnerani.

 Jeanette Gjørret naapertorlugu kommunip tunngavilersuutai tunngaviginiarneqarsinnaajunnaavissapput tarnip pissusiinik misissuinerit inatsit nutaaq naapertorlugu suliamit peerneqarpata.

Sapaatip akunneranut akunnermik ataatsimi peqateqartarneq

Keira Kronvold immikkut sulisitat suliap ingerlatsilernissaannut qilanaarpoq, neriuutigaalu meeqqaminik peqateqartarneri tunngavigineqarumaartut angajoqqaatut piginnaasani nalilerneqalerpata.

– Neriuppunga meeqqakka peqatigikka takujumaaraannga, suliallu allattorsimaffii kisiisa isiginiarnagit, Keira Kronvold oqarpoq.

Thisted Kommunemit peqateqartarneq pillugu allaaserisami Sermitsiap takusaani allassimavoq ”Zammi Keira takugamiuk qungujulavoq, aamma qasulerami Keira toqqissisimaffissarsiorfigivaa”, aamma ”peqatigiinnerat peqateqartarnerisa allat assigalugit ingerlavoq”, aamma ”Keira aamma Zammi attaveqaqatigiilluartut takuneqarsinnaapput, Keirallu nalunaaquttap akunnerani ataatsimi peqatigiinnerminni qitornaminik sammisaqarnera attaveqaqatigiinnermik aallaaveqartoq takuneqarsinnaavoq, Zammillu kalerrisaarinerani naapittarpaa”.

Keira Kronvoldip panini peqatiginerujumallugu kissaateqarnerminik arlaleriarluni saaffiginnippoq. Kissaatigisaali tamanna Thisted Kommunemit suli naammassineqanngilaq.