Christiansborgimi politikerit kalaallini ilaqutariinni
angajoqqaatut piginnaanerit pillugit misissuinerni tarnip pissusaanik
misissuinerit inerteqqutigileruttoraat Holstebromi eqqartuussisup Keira
Alexandra Kronvoldip pania Zammi, novembarimi 2024-mi inunngortoq,
pinngitsaaliissummik angerlarsimaffiup avataani inissisimaannassasoq
sisamanngormat aalajangerpaa.
Taamaalilluni Suliareqqitassanngortitsinermut
aqutsisoqarfik tapersiivoq.
Christiansborgimi politikerit kalaallini ilaqutariinni
angajoqqaatut piginnaanerit pillugit misissuinerni tarnip pissusaanik
misissuinerit inerteqqutigileruttoraat Holstebromi eqqartuussisup Keira
Alexandra Kronvoldip pania Zammi, novembarimi 2024-mi inunngortoq,
pinngitsaaliissummik angerlarsimaffiup avataani inissisimaannassasoq
sisamanngormat aalajangerpaa.
Taamaalilluni Suliareqqitassanngortitsinermut
aqutsisoqarfik tapersiivoq.
Naak Keira Alexandra Kronvold panimmi isumaginissaanut
angajoqqaatut piginnaaneqannginnerarlugu angerlarsimaffiup avataanut inissiineq
tarnip pissusaanik misissuinermik toqqaannartumik tunngaveqaraluartoq taama
pisoqarpoq.
Aalajangiineq tupinnartoq
Keirap eqqartuussissuserisuata Jeanette Gjørrettip Stage Advokatfirmameersup suliaq
paasissutissanik eqqunngitsunik imaqarlunilu eqqortumik nassuiarneqarsimanngimmat
meeqqap angerlartinneqarnissaanik kinguneqartussaasoq isumaqarami aalajangiineq
tupaallaatigingaarpaa.
– Paasissutissat eqqunngitsut amigartumillu qaammarissaaneq pissutigalugit
inissiinissamut tunngavissaqarnersoq uppernarsarneqanngilaq. Tamatuma
saniatigut Keira misissuinerni allaaserineqartuni imminut
ilisarissinnaanngilaq, Jeanette Gjørret oqarpoq nangillunilu:
– Eqqartuussiviup eqqartuussummini ”suliami kukkusumik tunngavilimmik
aalajangiisoqarsimaneranut tunngavissaqartoqanngitsoq” oqaaseqatigiit
ataasiinnaat atorlugit oqarmat eqqumiiginarpoq. Taamaattoqarpormi. Suliaq
kukkusumik nassuiarneqarsimavoq, taamaammallu inissiinermut tunngavissaq
atuutinngilaq. Keira kukkusumik tunngavilimmik meeqqaminik nukarlermik
pinngitsaalisaalluni arsaarneqaannanngilaq. Aamma meerai angajulliit marluk
kukkusumik tunngavilimmik pinngitsaalillugit
arsaarinnissutigineqarsimasinnaapput, Jeanette Gjørret oqarpoq, taassumalu
Keirap 2014-imi qallunaat tarnip pissusaanik misissueqqissaarnerat
tunngavigalugu oqalutseqartinneqarani meeqqaminik angajullernik marlunnik pinngitsaalisaasumik
arsaarneqarsimanera innersuussutigaa.
Inatsisissatut siunnersuut naliliinermut allannguinngitsoq
”Immikkoortortamik kalaallit oqaasiinik kulturikkullu atugaannik immikkut
ittumik ilisimasalimmik pilersitsinissamik (L139) inatsisissatut siunnersuuteqartoqarnera,
immikkoortortallu taassuma ilaqutariinni meeqqamik, inuusuttumik,
angajoqqaanngortussanik imaluunniit angajoqqaatut oqartussaassuseqartussanik
Kalaallit Nunaanni inunngorsimasunik peroriartorsimasunilluunniit ilaqutariinni
inissiinerni tamani misissuisartussanngorlugu kommunalbestyrelsimut
qinnuteqartassasoq, aammalu meeqqap angajoqqaallu misissorneqarnerannut
naliliineranilu tarnip pissusaanik misissuut nalinginnaasoq atorneqarsimasoq
imaluunniit atorneqarsimasorineqarsinnaasoq allatut naliliinermik
kinguneqanngitsoq" eqqartuussinermi aamma oqaatigineqarpoq.
– Tarnip pissusaanik misissuinerit atorunnaarsinneqassasut inatsisissatut
siunnersuummi allassimavoq. Keira pillugu suliami tamanna pippat kommunip aamma
Isumaginninnermut Nakkutilliisoqarfiup tunngavilersuutaat atorunnaassapput,
tassami Zammip meeqqallu angajulliit marluk arsaarinnissutigineqarneri 2014-imi
aamma 2024-mi tarnip pissusaanik misissuinerit kukkusut tunngavigalugit pivoq,
Jeanette Gjørret oqarpoq, taassumalu taama pisoqassappat inatsisissaq ilumut
sunniuteqassanersoq ernumassutigaa.
Allatut inerneqassasoq ilimagigaluaraa
– Inatsisissaq kommunimi, Isumaginninnermut Nakkutilliisoqarfimmi
eqqartuussivinnilu allatut naliliinermik kinguneqassannginnami
allannguutaassanngitsoq eqqartuussinermi erseqqippoq. Meeqqat pillugit
misissuinerni paasissutissat eqqunngitsut pimoorullugit misissorneqanngippata
allannguisoqarnavianngilaq, Jeanette Gjørret oqarpoq nangillunilu: – Allatut inerneqarnissaa ilimagigaluarakku pakatseqaanga. Inatsit tamanna
pissutigalugu kalaallit meerartaat angerlartinneqarnavianngitsut ajoraluartumik
erseqqilluinnarpoq.
Jeanette Gjørrettip maanna Keira Alexandra Kronvold pillugu suliap
eqqartuussivimmut suliassanngortinnissaanut akuersissuteqartarnermut
ataatsimiititaliaq qinnuigissavaa.
– Tarnip pissusaanik misissuinerit atorunnaarsinneqassasut inatsisissatut siunnersuummi allassimavoq. Keira pillugu suliami tamanna pippat kommunip aamma Isumaginninnermut Nakkutilliisoqarfiup tunngavilersuutaat atorunnaassapput, tassami Zammip meeqqallu angajulliit marluk arsaarinnissutigineqarneri 2014-imi aamma 2024-mi tarnip pissusaanik misissuinerit kukkusut tunngavigalugit pivoq, eqqartuussissuserisoq Jeanette Gjørret oqarpoq.
Assi: Stage Advokatfirma
