Macronip tikeraartussaanera peqqutigalugu politiit takussaanerussapput

Franskit præsidentiat  Emmanuel Macron sapaatiuppat nunatsinnut tikissaaq, tamannalu peqqutigalugu politiit nuummi takussaanerussapput. 

Kalaallit Nunaanni Politiit taama Facebookikkut nalunaaruteqarput:

- Suliap suliarinissaanut politeeqarfinnit allanit ikiorneqassaagut. Suleqatigullu peqatigiilluta tikeraartoqarnerup eqqissisimasumik torersumillu ingerlanissaa qulakkiissavarput, taamaalilluta tamatta – tikeraat maanilu najugaqartut – toqqissisimaniassagatta, vicepolitiinspektøri Kunuk Frederiksen nangillunilu:

- Naapikkussigit ilassiukutsoorniarisigit.

Sillimaniarneq oqallisigineqassasoq

Franskit præsidentiat Nuummut sapaatiuppat tikissangatinneqarpoq, tassani ministeriuneq Mette Frederiksen tikeqatigissallugu. Tikeraarneranulli pilersaarutit pisortatigoortumik suli saqqummiunneqanngillat.

Ilisimatitsissutigineqarporli Naalakkersuisut siulittaasuat, Jens Frederik Nielsen (D) naapissagaat, tassani  Atlantikup avannaani Issittumilu isumannaallisaanissaq oqaluuserisussaavaat, kiisalu aningaasaqarnikkut ineriartorneq, silaannaap allanngoriartornera nukissiornerlu aamma oqaluuserissavaat.

Tikeraarnerli sivikitsuaraassaaq, Jens Frederik Nielsen aamma Mette Frederiksen ataasinngornermi marlunngornermilu Savalimmiuni naalagaaffeqatigiit ataatsimiissammata aamma attaveqaqatigiinnermut ataatsimiititaliap ataatsimiissammat.

Tassani Savalimmiuni lagmandi Aksel V. Johannesen ataatsimeeqatigineqassaaq, ataatsimiinnermi sillimaniarneq aamma oqaluuserineqassaaq.