Pele Trumpip nalunaarutaa pillugu: Ataatsimoorluta kalaallit inuiaanerat nassuiartariaqarparput
Politikerit ataatsimoorlutik kalaallit kikkuunerat uppernarsartariaqaraat, taakkualu Kalaallit Nunaat pigigaat aalajangiisutullu nalunaaruteqartariaqartut Naleqqami siulittaasoq Pele Broberg isumaqarpoq.
Assi: Leiff Josefsen
Naalakkersuisut siulittaasuata Múte B. Egedep (IA) Donald Trumpip Kalaallit Nunaat pillugu oqaaseqaataanut kingullernut atatillugu Kalaallit Nunaat kalaallit pigigaat oqaatigeqqippaa:
- Amerikarmioorusunngilagut, danskiunianngilagut kalaaliuvugummi, Múte B. Egede qisuariaateqarluni Facebookimi allappoq.
Naleqqap siulittaasua Pele Broberg Trumpip oqaaseqaataanut oqaaseqarusunngilaq. Isumaqarporli kikkut Kalaallit Nunaata siunissaanik aalajangiisinnaatitaallutik inuiannut kalaallinut ilaanersut politikkerit ataatsimoorlutik nassuiartariaqaraat.
- Nunatsinnut ilumut oqartussaarusukkutta ataasiussuseqartariaqarpugut. Qanoq eqqarsassanersugut isumaqassanersugullu allat aalajangissanngilaat, Pele Broberg oqarpoq
Oqaatsit tunngavissaqanngitsut
Kikkut kalaalliunersut pisortatigoortumik nassuiarneqanngippat ministeriunerup Mette Frederiksenip Múte B. Egedellu Kalaallit Nunaata siunissaanik kalaallit namminneq aalajangiinissaat pillugu oqaasii oqaasiinnaasut taanna isumaqarpoq.
- Kalaallit Nunaat kalaallinit pigineqarnerarlugu oqarneq tusarnertaqaaq, taamaakkaluartoq kikkut kalaallisut innuttaanersut aalajangersarniarlugu sunnguamilluunniit iliuuseqartoqanngilaq.
- Assersuutigalugu Hans Enoksenip kalaaliunini uppernarsarniarlugu ukiorpassuarni ilungersorsimavoq. Taamaaliorsinnaanngilaq. Taamaammat inuk inuiaqatigiinnut taakkununnga ilaanersoq uppernarsarneqarsinnaanngippalluunniit Kalaallit Nunaat kalaallit pigigaat oqaraanni oqaatsit kusanartut piviusorsiunngitsuupput, Pele Broberg oqarpoq.
Pele Brobergip Inuit nalunaarsorsimaffiannik, inuiaqatigiit kalaallit qanoq ittuunerannik nassuiaanissamut tunngaviusinnaasumik, pilersitsinissaq ukiorpassuarni siunnersuutigisarsimavaa. Siunnersuulli Inatsisartuni akerlerineqangaatsiartarpoq.
- Kinaanerluta ilisimasariaqarparput
Kalaallit inuiaqatigiit qanoq nassuiarneqartarnerat pillugu Pele Brobergip Namminersornermut inatsimmik suliaqarneq innersuussutigaa, tassani kalaallit inuiaqatigiit inuiaqatigiittut inuiaqatigiiunersut Danmarkimi nunanut allanut ministeriaqarfik Namminersornermut ataatsimiititaliarsuarmit aperineqarpoq.
Piumasaqaatit assigiinngiiaarsinnaasut, amerlanertigulli oqaatsit, oqaluttuarisaaneq, inuiaassuseq, kulturi upperisarsiornerlu pineqartartut nunanut allanut tunngasunut ministereqarfik akissummini ilaatigut allassimavoq.
"Kalaallit inuiaqatigiit taakkua nunanut allanut ministeriaqarfiup isumaa naapertorlugu ima immikkuullarissutigisunik ilisarnaateqartigisut, kalaallit inuiaqatigiittut taaneqarsinnaallutik“ Nunanut allanut ministeriaqarfik inerniliivoq.
- Kalaallit inui nalunaarsorsimaffeqalissapput, Pele Broberg oqarpoq nangillunilu:
- Ministeriuneq Múte B. Egedelu kalaallit pillugit oqaluttut tusaajuaannarpavut, kikkuunerpulli suli paasineqanngilaq.
- Kinaanerput siunissamilu qanoq iliornissarput maannakkut ilisimasariaqarparput. Namminiilivissimanersugut namminiilivissimannginnersugulluunniit pingaaruteqarpallaanngilaq, maannakkorpiarli nammineq aalajangiisinnaatitaaneq atortanngikkutsigu annaasinnaavarput. Ilumoorpoq Danmark oqarmat nammineq aalajangiisinnaatitaasugut, soorlu Rusland USA-lu maanna aamma oqarsimasut.
