Sara Olsvigip Kalaallit Nunaata nammineq iliuuseqarsinnaanerata sunniuteqarsinnaaneratalu ilisimatusarfiginera ph.d.-nngussutigaa

Inuit Ataqatigiinni siulittaasuusimasoq Sara Olsvig 2018-imi politikkimik suliaqarunnaarpoq. Inuiaqatigiilerinermik, Aningaasaqarnermik Tusagassiornermillu Ilisimatusarfimmi Nunatsinni Ilisimatusarnermut Siunnersuisoqatigiinnit tapiiffigineqarluni 2020 ilisimatusarnini aallartippaa. Tassani Kalaallit Nunaata nunanut allanut politikkia pillugu ph.d.-nngorniarluni aallartippoq.

Inuit Issittormiut Siunnersuisoqatigiivini (ICC) siulittaasutut sulinermini saniatigut 2022-miilli ilisimatusarnini taanna suliaraa.

Ilinniarneq pillugu sammisaq uani atuaruk.

Ilisimatusarnermi allaaserisat

Ph.d.-nngorniutini ima qulequtalik marlunngornermi aggustip 19-ianni illersorpaa: "Win the hearts and minds - Superpower influence on national self-determination - How relations between Greenland and the United States affect Greenland’s selfdetermination in times of increased international focus and tension in the Arctic" (Misigissutsit isummallu tiguarlugit – Nunap nammineq aalajangiisinnaatitaanerannut sunniuteqarnissamut aqqutitsialak – Nunat tamalaat Issittumi soqutiginninnerulerneranni pissutsillu ilungersunarnerulerneranni, Kalaallit Nunaata USA-llu akornanni attaveqatigiinneq, Kalaallit Nunaata namminneq aalajangiisinnaatitaaneranut qanoq sunniuteqarpa? aaqq.)

Ph.d.-nngorniutimi saniatigut ilisimatusarnikkut allaaserisat tallimat naliliisunit nalilerneqarsimasut uku suliarai: kapitalit tunuliaqutaasut Dansk Institut for Internationale Studierimi ilisimatusartoq Ulrik Pram Gad peqatigalugu allataq ”Kalaallit Nunaat nunanut allanut sillimaniarnermullu politikkimut peqataasutut” qulequtalik, aamma Marc Jacobsenip illersornissaqarfik pillugu ilisimatusarfimmeersoq pingaarnertut allaaserisaa ”From Peary to Pompeo: The history of United States’ securitizations of Greenland”.

Aamma allaaserisat pingasut nammineerluni allaaserisarai: “Uagununa Nunarput”, “Greenland’s ambiguous action space: testing internal and external limitations between US and Danish Arctic interests” aamma “Odd Couples’ Win-Sets: Maintaining U.S. Basing Rights Through New Two-Level Game Negotiations With Greenland”. Iliuuseqarsinnaanerup isumaa ersernerluttoq

Sara Olsvigip ph.d.-nngorniutini 2025-mi januaarimi allappaa, Trump juniorip Nuummut tikinnerata nalaani. - Ph.d.-nngorniutiga atorfissaaruttoq januaarip arfineq-aappaani misigitallappara, Amerikamiulli soqutiginnilermata ilisimatusaatiga pingaaruteqarnerulersoq ingerlaannaq paasivara.

Kalaallit Nunaat nalunngisatsinniit iliuuseqarsinnaanerujussuusoq Sara Olsvigip misissueqqissaarnermini sammivaa, naalagaaffeqatigiinnermi immikkuullarissumik aaqqissuussaanitta kingunerisaanik iliuuseqarnissamut periarfissat erseqqissumik paasisassanngorlugit aaqqissuunneqarnikuunngillat.

– Iliuuseqarsinnaassutsip isumaa erseqqissummik paasissaanngimmata Kalaallit Nunaannut USA-mut tunngatillugu iluaqutaasinnaavoq, tassalu qanoq iliornissaq inississinnaasuugutsigu. Assersuutigalugu kiap Kalaallit Nunaat aqunneraa USA-miit paasiuminaatsinneqarpoq, ukiumilu kingullermi pisut ataatsimut isigigaanni Kalaallit Nunaat akuliulluarsimallunilu sunniuteqarluarsimasoq oqaatigineqarsinnaavoq. 

Sunniuteqarsinnaanermut takussutissiisoq

Kalaallit Nunaata iliuuseqarnissamut periarfissai killeqarput, killigititaali suli misissorneqanngitsut Sara Olsvig oqarpoq.

– Kalaallit tungaannit iliuuseqarsinnaanerup sunniuteqarsinnaanerullu immikkoortinnissaat ilikkarneqarsimavoq. Inatsisitiguunngitsoq, kisiannili piviusorsiortumik, tamanna ilaatigut Kalaallit Nunaata nunanut allanut illersornissamullu politikkianut periusissiaata naalagaaffeqatigiinnermi atuutsinneqarnissaanik aalajangiusimanninnikkut erserpoq. Aamma Kalaallit Nunaata Issittumi Siunnersuisoqatigiinni issiaqataanissamik aalajangiusimanninneratigut. Tamanna piviusunngortinneqassappat iliuuseqaannarani sunniuteqarsinnaaneq ersersinneqassaaq.

Kalaallit Nunaat inuiaqatigiittut namminersornerulersimasutut isiginnaartuuginnarani, politikkimut, ilaatigut naalagaaffeqatigiinni nunanilu tamalaani ingerlanneqartumut, sunniuteqarsinnaanera paasineqassasoq neriuutigaa.

Ilisimatusarneq

Sara Olsvig Københavnip Universitetiani antropologitut ilinniagaqarpoq, ph.d-nngorniarnerminili politikkimik ilisimatusarnermut nuuppoq. Ilisimatusarnerup silarsuaaniiginnarsinnaanini eqqarsaatersuuteqarfigalugu aamma nassuerutigaa, immaqa ICC-mi ukioq ataaseq qaangiuppat siulittaasuujunnaaruni.

– Misissueqqissaarneq, teoriip ilisimasanillu katersuinerup ataqatigiissarniarsarinera nuannarilluinnariga qularutissaanngilaq. Taamaattumik ilisimatusarneq qimavissinnaanerlugu ilimaginngilara. Qanorli taamaaliussanerlunga suli naluara, ukiunimi kingullerni ulapissimaqigama. Maanna ICC-mi sulinera samminerussavara. Aappaagumut angumerisassanik ulikkaarpugut.

– Tamatumalu saniatigut siulittaasuujunnaaruma sussanerlunga aamma eqqarsaatigisussaavara. Nassuerutigissavarali allaaserisama illersornera ingerlalluarmat nuanneraluartitsisimanera. Ilisimatusarfimmiit anigama qasuummeqqaqaanga, tamatumali saniatigut ilisimatusarnikkut suliniutissanut nutaanut qulinut isumassarsiaqarlunga, Sara Olsvig oqarpoq.